ໃນທ່າມກາງການແຜ່ລະບາດຂອງພະຍາດໂຄວິດ-19 ຢູ່ປະເທດເຮົາ; ແຕ່ທຸກວຽກງານຍັງຄົງດຳເນີນໄປຢ່າງຕໍ່ເນື່ອງ; ເຂັ້ມແຂງ ໂດຍສະເພາະແມ່ນວຽກງານຂອງຄະນະພັກ-ຄະນະນຳ ຄະນະໂຄສະນາອົບຮົມສູນກາງພັກ; ບາດກ້າວໃໝ່ ຂອງວຽກງານນີ້ແມ່ນການສ້າງເອກະສານ ກ່ຽວກັບການຈັດຕັ້ງເຊື່ອມຊືມ ແລະ ຜັນຂະຫຍາຍມະຕິກອງປະຊຸມໃຫຍ່ຜູ້ ແທນທົ່ວປະເທດ ຄັ້ງທີ XI ຂອງພັກ,  ຂອງຄະນະພັກ ຄະນະໂຄສະນາອົບຮົມສູນກາງພັກ ເລກທີ 53/ຄພ.ຄອສພ ລົງວັນທີ 3 ມິຖຸນາ 2021.

ສຳລັບຈຸດປະສົງ ແລະ ລະດັບຄາດໝາຍຂອງເອກະສານມີດັ່ງນີ້:

  • ເພື່ອສ້າງການຫັນປ່ຽນທາງດ້ານແນວຄິດ-ຈິນຕະນາການຢ່າງແຂງແຮງ, ປັບປຸງຍົກສູງຫຼັກໝັ້ນການເມືອງ, ຍົກສູງນໍ້າໃຈເສຍສະຫຼະ ແລະ ຍຶດໝັ້ນອຸດົມການປະຕິວັດ  ຂອງສະມາຊິກພັກ, ພະນັກງານ-ລັດຖະກອນພາຍໃນຄະນະໂຄສະນາອົບຮົມສູນກາງພັກ ໃຫ້ມີຄຸນທາດການເມືອງທີ່ໜັກແໜ້ນ, ມີຄຸນສົມບັດສິນທຳປະຕິວັດ; ເດັດດ່ຽວແກ້ໄຂການເສື່ອມຖອຍດ້ານແນວຄິດ ແລະ ປະກົດການຫຍໍ້ທໍ້ຕ່າງໆ ທີ່ເກີດຂື້ນ ຂອງສະມາຊິກພັກ, ພະນັກງານ-ລັດຖະກອນ, ເພີ່ມທະວີຄວາມສາມັກຄີເປັນເອກະພາບພາຍໃນຄະນະພັກ ແລະ ສະມາຊິກພັກ, ພະນັກງານ-ລັດຖະກອນໃຫ້ໜັກແໜ້ນຂື້ນຕື່ມ.
  • ເພື່ອສ້າງຄວາມເປັນເອກະພາບ ແລະ ຄວາມຕັດສິນໃຈສູງຂອງສະມາຊິກພັກ, ພະນັກງານ-ລັດຖະກອນໃນການເສີມຂະຫຍາຍສະຕິປັນຍາ, ຫົວຄິດປະດິດສ້າງ, ສ້າງຄວາມຮັບຮູ້ເຂົ້າໃຈ ກ່ຽວກັບການສ້າງການຫັນປ່ຽນດ້ານແນວຄິດ-ຈິນຕະນາການ ໃນການຈັດຕັ້ງເຊື່ອມຊືມ ແລະ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ຕິດພັນກັບແຜນພັດທະນາວຽກງານໂຄສະນາອົບຮົມ ເພື່ອກໍ່ໃຫ້ເກີດການຫັນປ່ຽນດ້ານແນວຄິດ, ການຈັດຕັ້ງ ແລະ ການເຄື່ອນໄຫວວຽກງານໂຄສະນາອົບຮົມໃຫ້ມີປະສິດທິພາບ ແລະ ມີປະສິດທິຜົນ.
  • ເພື່ອເປັນບ່ອນອີງໃຫ້ຄະນະພັກ ຄະນະໂຄສະນາອົບຮົມສູນກາງພັກ ແລະ ບັນດາກົມ ໃນການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ຂອງລັດ ແລະ ມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກ ຄະນະໂຄສະນາອົບຮົມສູນກາງພັກ, ວິໄສທັດ ແລະ ແຜນຍຸດທະສາດພັດທະນາວຽກງານໂຄສະນາອົບຮົມໃຫ້ເປັນແຜນງານ, ໂຄງການວຽກງານອັນລະອຽດ ຂອງຄະນະໂຄສະນາອົບຮົມສູນກາງພັກ, ຂອງກົມ ແລະ ຊີ້ນຳ-ນຳພາຈັດຕັ້ງປະຕິບັດເຂົ້າສູ່ຊີວິດຕົວຈີງຕາມພາລະບົດບາດ, ໜ້າທີ່ ເພື່ອສ້າງການຫັນປ່ຽນຢ່າງແຂງແຮງ, ເລີກເຊີ່ງ, ຮອບດ້ານ ແລະ ມີຜົນສຳເລັດ ໃນຂົງເຂດວຽກງານຂອງຕົນ.

ສ່ວນແຜນພັດທະນາວຽກງານໂຄສະນາອົບຮົມ 5 ປີ (2021-2025) ແລະ ຍຸດທະສາດ ຮອດປີ 2030 ແມ່ນສືບຕໍ່ຈັດຕັ້ງປະຕິບັດ 7 ແຜນງານ ແລະ ໂຄງການຈຸດສຸມແຕ່ປີ 2021-2025 ແລະ ຮອດປີ 2030; ໂດຍສະເພາະໂຄງການຈຸດສຸມມີບາງຈຸດສຳຄັນດັ່ງນີ້:

ແຜນພັດທະນາໂຄງການຈຸດສຸມແຕ່ປີ 2021-2025 ລວມມີ 7 ແຜນງານ; ແຜນງານທີ 1: ຈັດຕັ້ງເຜີຍແຜ່, ຄົ້ນຄ້ວາເຊື່ອມຊືມ ແລະ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5  ປີ ຄັ້ງທີ IX ຂອງລັດ ໃນຂົງເຂດວຽກງານໂຄສະນາອົບຮົມ ມີ 4 ໂຄງການ. ແຜນງານທີ 2: ສ້າງ ແລະ ປັບປຸງເອກະສານໂຄສະນາສຶກສາອົບຮົມ ແລະ ຈັດຕັ້ງຝຶກອົບຮົມເປົ້າໝາຍຕ່າງໆ ມີ 6 ໂຄງການ. ແຜນງານທີ 3: ເກັບກຳສະພາບແນວຄິດ; ຫາງສຽງສັງຄົມ; ສະໜອງຂໍ້ມູນຂ່າວສານດ້ານຕ່າງໆ;  ສະຫຼຸບສັງລວມການເຄື່ອນໄຫວວຽກງານໂຄສະນາອົບຮົມ ມີ 8 ໂຄງການ. ແຜນງານທີ 4: ປັບປຸງຍົກສູງຄຸນນະພາບ ຂອງວາລະສານອະລຸນໃໝ່ ແລະ ວາລະສານໂຄສະນາ ມີ 2 ຂໍ້. ແຜນງານທີ 5: ການນຳໃຊ້ສື່ ແລະ ກຳລັງແຮງສັງລວມເຂົ້າໃນວຽກງານໂຄສະນາອົບຮົມ ແລະ ກໍ່ສ້າງພະນັກງານໂຄສະນາອົບຮົມ ມີ 5 ໂຄງການ. ແຜນງານທີ 6: ປັບປຸງກົງຈັກການຈັດຕັ້ງ; ພາລະບົດບາດ ແລະ ບຸກຄະລາກອນທີ່ເຮັດວຽກງານໂຄສະນາອົບຮົມທັງຢູ່ສູນກາງ ແລະ ທ້ອງຖີ່ນ; ສ້າງພື້ນຖານໂຄງລ່າງ ແລະ ກົນໄກປະສານງານ ຂອງຄະນະໂຄສະນາອົບຮົມສູນກາງພັກ ມີ 4 ໂຄງການ ແລະ ສຸດທ້າຍແຜນງານທີ 7: ເພີ່ມທະວີການພົວພັນຮ່ວມມື ກັບບັນດາອົງການທີ່ເຮັດວຽກງານໂຄສະນາສຶກສາອົບຮົມການເມືອງ-ແນວຄິດ ຂອງປະເທດເພື່ອນມິດຍຸດທະສາດ; ບັນດາປະເທດໃນພາກພື້ນ ແລະ ສາກົນ ມີ 5 ຂໍ້.

ອີງຕາມພາລະບົດບາດ, ໜ້າທີ່ ຂອງຄະນະໂຄສະນາອົບຮົມສູນກາງພັກ ນອກຈາກຈັດຕັ້ງປະຕິບັດ 7 ແຜນງານ ແລະ ໂຄງການວຽກງານຈຸດສຸມທີ່ກ່າວມາຂ້າງເທີງນັ້ນ ກໍຍັງຈະໄດ້ປະກອບສ່ວນຢ່າງຕັ້ງໜ້າເຂົ້າໃນການສະເຫຼີມສະຫຼອງວັນປະຫັວດສາດສຳຄັນຂອງຊາດ, ຂອງພັກ, ຂອງຜູ້ນຳ ເຊັ່ນ: ວັນສ້າງຕັ້ງພັກປະຊາຊົນປະຕິວັດລາວ, ວັນສະຖາປະນາ ສປປ ລາວ, ວັນສ້າງຕັ້ງກອງທັບປະຊາຊົນປະຕິວັດລາວ, ວັນຄ້າຍວັນເກີດຂອງປະທານໄກສອນ ພົມວິຫານ, ວັນເກີດປະທານສຸພານຸວົງ ແລະ ວັນສຳຄັນອື່ນໆ ດ້ວຍການສ້າງເອກະສານສຶກສາອົບຮົມ, ການຈັດຕັ້ງສຳມະນາໃນຫົວຂໍ້ຕ່າງໆ ການໂຄສະນາເຜີຍແຜ່ຢ່າງກວ້າງຂວາງ ແລະ ເລີກເຊີ່ງ.

ແຜນງານ ແລະ ໂຄງການວຽກງານຈຸດສຸມ ແຕ່ປີ 2021-2025 ແມ່ນສືບຕໍ່ຜັນຂະຫຍາຍແຜນງານ ແລະ ວຽກງານຈຸດສຸມ ປີ 2016-2020 ວຽກງານໃດເຮັດໄດ້ດີມີຄວາມໂດດເດັ່ນສືບຕໍ່ເສີມຂະຫຍາຍໃຫ້ດີຍີ່ງຂື້ນ, ອັັນໃດຄົງຄ້າງຈະສືບຕໍ່ປັບປຸງແກ້ໄຂ ເພື່ອເຮັດໃຫ້ໄດ້ຕາມຄາດໝາຍ.

ສຳລັບຍຸດທະສາດພັດທະນາວຽກງານໂຄສະນາອົບຮົມ ຮອດປີ 2030 ນັ້ນລວມມີ 7 ຈຸດໝາຍໃຫຍ່ ເຊີ່ງເວົ້າລາຍລະອຽດໃນເອກະສານ. ອັນສຳຄັນຕັດສິນຜົນໄດ້ຮັບ ຂອງເອກະສານນີ້ແມ່ນມາດຕະການຈັດຕັ້ງປະຕິບັດ ເຊີ່ງລວມມີດັ່ງນີ້:

  1. ຄະນະພັກ ຄະນະໂຄສະນາອົບຮົມສູນກາງພັກ ນຳພາຈັດຕັ້ງຄົ້ນຄວ້າ, ເຊື່ອມຊືມ, ກຳແໜ້ນເນື້ອໃນມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກ ຄະນະໂຄສະນາອົບຮົມສູນກາງພັກ ໃຫ້ສະມາຊິກພັກ, ພະນັກງານ-ລັດຖະກອນ ຮັບຮູ້ເຂົ້າໃຈຢ່າງເລີກເຊີ່ງ ແລະ ທົ່ວເຖີງ.
  2. ຄະນະພັກ ຄະນະໂຄສະນາອົບຮົມສູນກາງພັກ ເພີ່ມທະວີການຊີ້ນຳ-ນຳພາ ຄະນະໂຄສະນາອົບຮົມແຕ່ລະຂັ້ນ, ລວມທັງຕິດຕາມ, ກວດກາ, ຊຸກຍູ້-ຊີ້ນຳການເຄື່ອນໄຫວໜ້າທີ່ການເມືອງຕະຫຼອດຮອດການສ້າງເງື່ອນໄຂຄວາມສະດວກດ້ານຕ່າງໆ ໃຫ້ດີຂື້ນກ່ວາເກົ່າ.
  3. ຄະນະພັກ ຄະນະໂຄສະນາອົບຮົມສູນກາງພັກ ຊີ້ນຳບັນດາກົມຫັນເອົາມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກ ຄະນະໂຄສະນາອົບຮົມສູນກາງພັກ ເປັນແຜນງານ, ໂຄງການ ແລະ ເປັນແຜນການເຄື່ອນໄຫວວຽກງານອັນລະອຽດ ປະຈຳເດືອນ, ປະຈຳໄຕມາດ ແລະ ປະຈຳປີ ຕາມພາລະບົດບາດຂອງຕົນ ແລະ ພ້ອມກັນຈັດຕັ້ງປະຕິບັດໃຫ້ມີຜົນສຳເລັດ.
  4. ຫ້ອງການ ຂອງຄະນະໂຄສະນາອົບຮົມສູນກາງພັກ ເປັນໃຈກາງປະສານສົມທົບກັບບັນດາກົມ ແລະ ຄະນະໂຄສະນາອົບຮົມແຕ່ລະຂັ້ນໃນທົ່ວປະເທດ ຕິດຕາມການຈັດຕັ້ງເຊື່ອມຊືມ ແລະ ຜັນຂະຫຍາຍມະຕິ XI ຂອງພັກ ຕິດພັນກັບແຜນພັດທະນາເສດຖະກິດ-ສັງຄົມ ຂອງບັນດາຂະແໜງການ ແລະ ທ້ອງຖີ່ນ ພ້ອມທັງສະຫຼຸບລາຍງານຄະນະໂຄສະນາອົບຮົມສູນກາງພັກ, ຫ້ອງວ່າການສູນກາງພັກ, ຄະນະເລຂາທິການສູນກາງພັກ ຮັບຊາບເປັນແຕ່ລະໄລຍະ.

ເອກະສານສະບັບນີ້ລົງນາມ ໂດຍທ່ານຫົວໜ້າຄະນະໂຄສະນາອົບຮົມສູນກາງພັກ ເຊີ່ງຖືວ່າເປັນບາດກ້າວໃໝ່ ຂອງວຽກງານໂຄສະນາອົບຮົມສູນກາງພັກ.

ທິດດີ