ມີເດຍລາວແຂວງໄຊສົມບູນ ຂ່າວ: ພຸດທະສອນ ເວດສະວົງ
ໂຮງໝໍ ແຂວງໄຊສົມບູນ ໄດ້ເລີ່ມເປີດການສັກວັກຊິນກັນພະຍາດໂຄວິດ 19 ໃຫ້ແກ່ບຸກຄະລາກອນກຸ່ມທີ່ມີຄວາມສ່ຽງຮອບທີ 1 ມາແຕ່ວັນທີ 10 ມີນາ 2021 ເປັນຕົ້ນມາ ຊຶ່ງມີບຸກຄະລາກອນພາຍໃນແຂວງໄດ້ພ້ອມກັນໄປຮັບການສັກວັກຊິ່ນຢ່າງຫລວງຫລາຍ ທ່ານ ດຣ ຢ່າງຮື ຊາວາ ອຳນວຍການໂຮງໝໍ ແຂວງໄຊສົມບູນ ໄດ້ໃຫ້ຮູ້ວ່າ: ມາຮອດປັດຈຸບັນ ໂຮງໝໍແຂວງ ສາມາດສັກວັກຊິນກັນພະຍາດໂຄວິດ 19 ຊະນິດ ຊິນໂນຟາມ ຮອບທີ 1 ໃຫ້ແກ່ບຸກຄະລາກອນກຸ່ມທີ່ມີຄວາມສ່ຽງ ເຂັມທີ 1 ໄດ້ທັງໝົດ 540 ກ່າວຄົນ ເທົ່າກັບ 77,28%, ເຂັມທີ 2 ສັກໄດ້ 100 ກວ່າຄົນ ເທົ່າກັບ 14,42% ແລະ ຄາດວ່າຈະສັກຢາກັນໂຄວິດຮອບທີ 1 ໃຫ້ສຳເລັດພາຍໃນເດືອນເມສານີ້.

ທ່ານ ດຣ ຢ່າງຮື ຊາວາ ຍັງໃຫ້ຮູ້ຕື່ມອີກວ່າ: ໃນສະພາບການແຜ່ລະບາດຂອງພະຍາດໂຄວິດ 19 ຢູ່ໃນປະເທດເຮົາເພີ່ມຂຶ້ນ ຈຶ່ງຈຳເປັນຕ້ອງໄດ້ເພີ່ມທະວີ ໃນການສັກຍາກັນພະຍາດໂຄວິດ 19 ໃຫ້ຫລາຍ ແລະ ທົ່ວເຖິງ ເພື່ອເປັນການຕ້ານການແຜ່ລະບາດຂອງພະຍາດໂຄວິດ 19 ເມື່ອໄດ້ສັກວັກຊິນກັນໂຄວິດ 19 ແລ້ວ ຈະເຮັດໃຫ້ຮ່າງກາຍຂອງຄົນເຮົາສ້າງພູມຄຸ້ມກັນຕ້ານກັບພະຍາດໂຄວິດ 19 ທີ່ເຂົ້າມາຮ່າງກາຍຂອງພວກເຮົາ.


ພ້ອມນີ້ຜູ້ທີ່ໄດ້ຮັບການສັກວັກຊິນແຕ່ລະຄົນກໍຄວາມຮູ້ສຶກສຶກດີໃຈທີ່ໄດ້ສັກວັກຊິນປ້ອງກັນພະຍາດໂຄວິດ 19 ໃນຄັ້ງນີ້ ຈະເຮັດໃຫ້ຮ່າງກາຍຂອງຕົນຈະໄດ້ມີພູມຕ້ານຕໍ່ພະຍາດດັ່ງກ່າວ ປັດຈຸບັນຢູ່ໂຮງໝໍ ແຂວງໄຊສົມບູນ ໄດ້ມີຜູ້ເຂົ້າມາຮັບການສັກວັກຊິນຢ່າງເປັນຂະບວນການຟົດຟື້ນ ທາງໂຮງໝໍແຂວງ ກໍໄດ້ມີຄວາມພ້ອມຮອບດ້ານ ເພື່ອຮັບມືກັບການຕ້ານພະຍາດໂຄວິດ 19 ແລະ ຂໍຮຽກຮ້ອງໃຫ້ຜູ້ທີ່ເປັນກຸ່ມສ່ຽງ ຈົ່ງພ້ອມກັນມາສັກຢາໃຫ້ຄົບຕາມກຳນົດ ພ້ອມທັງ ເອົາໃຈໃສ່ໃນການປ້ອງກັນຕົນເອງ ເປັນຕົ້ນແມ່ນໃສ່ຜ້າອັດປາກ-ດັງ, ຮັກສາໄລຍະຫ່າງ 1 ແມັດຂຶ້ນໄປ, ໝັ້ນລ້າງໃສ່ສະບູດ້ວຍນຳ້ສະອາດ ຫລື ເຈວລ້າງມືເປັນປະຈຳ ເພື່ອປ້ອງກັນບໍ່ໃຫ້ຕິດເຊື້ອ.