ມີເດຍລາວແຂວງອັດຕະປື ຂ່າວ: ວັດທະນາ ໃນໄລຍະຂອງການສະເຫຼີມສະຫຼອງບຸນປີໃໝ່ລາວ ພສ 2564 ທົ່ວແຂວງອັດຕະປື ມີອຸບັດຕິເຫດເກີດຂື້ນທັງໝົດ 10 ລາຍ,ໃນນັ້ນມີຜູ້ໄດ້ຮັບບາດເຈັບເລັກນ້ອຍ 3 ຄົນ,ບາດເຈັບສົມຄວນ 12 ຄົນ ແລະ ມີຜູ້ເສຍຊີວິດ 1 ຄົນ.


ໂດຍອີງຕາມສະຖິຕິສັງລວມການເກີດອຸບັດຕິເຫດຂອງພະແນກຕໍາຫຼວດຈະລາຈອນ ກອງບັນຊາການປ້ອງກັນຄວາມສະຫງົບ ແຂວງອັດຕະປື ໃຫ້ຮູ້ວ່າ: ໄລຍະຂອງການສະ ເຫຼີມສະຫຼອງບຸນປີໃໝ່ລາວ ພສ 2564 ຢູ່ແຂວງອັດຕະປື ນັບແຕ່ວັນທີ 11-18 ເມສາ 2021 ທົ່ວແຂວງ ມີການເກີດອຸບັດຕິເຫດຕາມທ້ອງຖະໜົດທັງໝົດ 10 ຄັ້ງ,ໃນນີ້ ອຸບັດ​ຕິເຫດທີ່ເກີດຂື້ນສ່ວນໃຫຍ່ ປະກອບມີ: ລົດຈັກຕໍາລົດຈັກ 3 ລາຍ,ລົດຈັກລົ້ມເອງ ມີ 3 ລາຍ,ລົດຈັກຕໍາລົດໃຫຍ່ ມີ 2 ລາຍ ແລະ ລົດໃຫຍ່ຕໍາລົດຖີບ ມີ 1 ລາຍ,ພາຫະນະເປ້ເພເລັກໜ້ອຍມີ 12 ຄັນ,ເປ້ເພສົມຄວນ 3 ຄັນ,ໃນຄະນະດຽວກັບມີຜູ້ໄດ້ຮັບບາດເຈັບຈາກການເກີດອຸບັດຕິເຫດ ມີເຈັບເລັກນ້ອຍ 3 ຄົນ,ເຈັບສົມຄວນ 12 ຄົນ ແລະ ເສຍຊີວິດ 1 ຄົນ,ສ່ວນເມືອງທີ່ມີການເກີດອຸບັດຕິເຫດໃນໄລຍະປີໃໝ່ ມີເມືອງສາມັກຄີໄຊ ເກີດຂື້ນ 6 ຄັ້ງ,ເມືອງ ພູວົງ 3 ຄັງ​,ເມືອງໄຊເສດຖາ 1 ຄັ້ງ,ສ່ວນເມືອງສະໜາມໄຊ ແລະ ເມືອງຊານໄຊ ແມ່ນບໍ່ມີອຸບັດຕິເຫດເກີດຂື້ນ,ສໍາລັບສະພາບຂອງການເກີດອຸບັດຕິເຫດສ່ວນໃຫຍ່ທີ່ເກີດຂື້ນແມ່ນຍ້ອນຜູ້ຂັບຂີ້ດື່ມສິ່ງມືນເມົາ,ຂີ້ລົດໄວ ແລະ ການບໍ່ເຄົາລົບລະບຽບການສັນຈອນ,ເມື່ອທຽບໃສ່ປີຜ່ານມາຖືວ່າອຸບັດຕິຫຼຸດລົງຫຼາຍ ຍ້ອນມີການວາງມາດຕະການເຂັ້ມງວດຫຼາຍຢ່າງຂອງຂັ້ນເທິ່ງ ເປັນຕົ້ນມາດຕະການປ້ອງກັນພະຍາດໂຄວິດ 19 ບວດກັບຄວາມເປັນເຈົ້າການຂອງເຈົ້າໜ້າທີ່ຈະລາຈອນທີ່ໄດ້ເຮັດວຽກງານໂຄສະນາດ້ານຄວາມປອດໄພຕາມທ້ອງທະໜົນຫຼວງ​ ຈຶ່ງເຮັດໃຫ້ອຸບັດຕິເຫດມີການຫຼຸດລົງ.