ເນື່ອງໃນໂອກາດວັນເດັກນ້ອຍສາກົນ ວັນທີ 1 ມິຖຸນາ ໄດ້ໝູນວຽນມາບັນຈົບຄົບຮອບອີກວາລະໜຶ່ງ, ຂ້າພະເຈົ້າຕາງໜ້າໃຫ້ການນຳ ພັກ-ລັດ ຂໍຝາກຄວາມຮັກແພງ ແລະ ຄວາມຢ້ຽມຢາມຖາມຂ່າວອັນອົບອຸ່ນ ມາຍັງລູກໆ ຫລານໆ ເດັກນ້ອຍລາວບັນດາເຜົ່າ ທຸກຖ້ວນໜ້າໃນທົ່ວປະເທດ.ການສະເຫລີມສະຫລອງວັນເດັກນ້ອຍສາກົນ ໃນທຸກໆປີຜ່ານມາ ແມ່ນປາງບຸນໃຫຍ່ຂອງເດັກນ້ອຍໃນທົ່ວໂລກ ກໍ່ຄື ເດັກນ້ອຍລາວ. ແຕ່ເປັນໜ້າເສຍດາຍທີ່ວ່າ ການສະເຫລີມສະຫລອງຢູ່ປະເທດເຮົາໃນປີນີ້ ແມ່ນບໍ່ສາມາດຈັດພິທີສະຫລອງໃຫຍ່ ແລະ ບໍ່ສາມາດເຕົ້າໂຮມລູກຫລານ ເພື່ອສະແດງອອກເຖິງຄວາມຮູ້ຄວາມສາມາດໃນ ລາຍການສິລະປະວັນນະຄະດີ ແລະ ການແຂ່ງຂັນຕ່າງໆ ຕິດພັນກັບຂະບວນການປູກຕົ້ນໄມ້ແຫ່ງຊາດ ຢ່າງກວ້າງຂວາງໄດ້, ເນື່ອງຈາກມີການແຜ່ລະບາດຂອງເຊື້ອພະຍາດໂຄວິດ-19 ເປັນວົງກວ້າງຢູ່ຫລາຍບໍລິເວນ, ຊຶ່ງເປັນໄພອັນຕະລາຍຕໍ່ ຄວາມປອດໄພດ້ານສຸຂະພາບ ແລະ ຊີວິດຂອງປະຊາຊົນເຮົາ ກໍ່ຄື ເດັກນ້ອຍເຮົາ.

ໃນປັດຈຸບັນ ທົ່ວພັກ, ທົ່ວລັດ ແລະ ທົ່ວປວງຊົນລາວທັງຊາດ ກຳລັງສຸມໃສ່ຈັດຕັ້ງຜັນຂະ ຫຍາຍມະຕິກອງປະຊຸມໃຫຍ່ຄັ້ງທີ XI ຂອງ ພັກປະຊາຊົນປະຕິວັດລາວ ແລະ ແຜນພັດທະນາເສດ ຖະກິດ-ສັງຄົມ 5 ປີ ຄັ້ງທີ IX (2021-2025) ຊຶ່ງໃນປັດຈຸບັນ ກໍ່ຄືໄລຍະຜ່ານມາ ພັກ-ລັດຖະບານເຮົາ ແມ່ນໄດ້ເອົາໃຈໃສ່ຢ່າງສະເໝີຕົ້ນສະເໝີປາຍ ຕໍ່ກັບວຽກງານການສົ່ງເສີມ, ການປົກປ້ອງເດັກ, ການຕ້ານສະກັດກັ້ນ ແລະ ແກ້ໄຂການໃຊ້ຄວາມຮຸນແຮງຕໍ່ເດັກນ້ອຍ. ໃນໂອກາດວັນຄົບຮອບ 30 ປີ ຂອງສົນທິສັນຍາວ່າດ້ວຍສິດທິເດັກ ແລະ ວັນຖະແຫລງການວ່າດ້ວຍສິດທິເດັກ ຄົບຮອບ 60 ປີ, ພວກເຮົາໄດ້ມີການສະຫລຸບຕີລາຄາຄືນ ໝາກຜົນການຈັດຕັ້ງປະຕິບັດສົນທິສັນຍາສິດທິເດັກ ຕະຫລອດໄລຍະ 30 ປີ ທີ່ຜ່ານມາ ແລະ ໄດ້ກໍານົດທິດທາງການພັດທະນາເດັກນ້ອຍລາວບັນດາເຜົ່າ ຮອດປີ 2030.

ນອກນັ້ນ, ການຈັດຕັ້ງ ພັກ-ລັດ ທຸກພາກສ່ວນແມ່ນໄດ້ໃຫ້ຄວາມໝາຍໝັ້ນ ໃນການຈັດຕັ້ງປະຕິບັດສົນທິສັນຍາວ່າດ້ວຍສິດທິເດັກ ໂດຍການນຳໃຊ້ກາລະໂອກາດ ພັດທະນາທ່າແຮງ ຂອງເດັກນ້ອຍລາວບັນດາເຜົ່າ ແຕ່ນີ້ຮອດປີ 2030 ແລະ ການບັນລຸເປົ້າຫມາຍການພັດທະນາແບບຍືນຍົງ.ໃນໂອກາດນີ້ ຂ້າພະເຈົ້າຕາງໜ້າໃຫ້ ພັກ ແລະ ລັດຖະບານ, ຂໍສະແດງຄວາມຍ້ອງຍໍຊົມເຊີຍ ແລະ ສະແດງຄວາມຂອບໃຈ ຕໍ່ຄະນະກໍາມາທິການເພື່ອຄວາມກ້າວໜ້າຂອງແມ່ຍິງ ແລະ ຄະນະກຳ ມາທິການເພື່ອແມ່ ແລະ ເດັກ ທຸກຂັ້ນ, ອົງການຈັດຕັັ້ງພັກ-ລັດ ຂັັ້ນສູນກາງ ແລະ ທ້ອງຖິ່ນ, ອົງການແນວລາວສ້າງຊາດ, ອົງການຈັດຕັ້ງມະຫາຊົນ, ອົງການຈັດຕັ້ງສາກົນ, ພາກສ່ວນທຸລະກິດຂອງລັດ, ຂອງເອກະຊົນ ຕະຫລອດຮອດພໍ່ແມ່ປະຊາຊົນລາວ ລວມທັງເດັກນ້ອຍລາວ ໃນທົ່ວປະເທດ ທີ່ໄດ້ສະໜັບສະໜູນ ແລະ ປະກອບສ່ວນຢ່າງຕັ້ງໜ້າ ເຮັດໃຫ້ວຽກ ແມ່ ແລະ ເດັກ ໄດ້ຮັບການປັບປຸງດີຂຶ້ນ ແລະ ມີຜົນສໍາເລັດເປັນກ້າວໆມາ.

ຄຽງຄູ່ກັບຜົນສຳເລັດນັ້ນ, ພວກເຮົາ ຍັງປະເຊີນໜ້າກັບສິ່ງທ້າທາຍຫລາຍດ້ານ ເປັນຕົ້ນແມ່ນ ບັນຫາທາງດ້ານໂພຊະນາການ-ພາວະເດັກຂາດສານອາຫານ, ອັດຕາການເຂົ້າຮຽນໃນພາກການສຶກສາ ກ່ອນໄວຮຽນ ແລະ ການສຶກສາພາກບັງຄັບ, ການນໍາໃຊ້ສື່ສັງຄົມອອນລາຍຂອງເດັກ, ບັນຫາຢາເສບຕິດ ແລະ ບັນຫາອື່ນໆ ທີ່ຍັງເປັນໄພຄຸກຄາມ ແລະ ຈໍາກັດການພັດທະນາຂອງເດັກ. ນອກຈາກນັັ້ນ, ຄວາມຮັບຮູ້ ແລະ ຄວາມເຂົ້າໃຈໃນສັງຄົມ ແລະ ຮີດຄອງປະເພນີຂອງບາງທ້ອງຖິ່ນໃນເຂດທຸກຍາກ, ເຂດຫ່າງໄກສອກຫລີກ ຍັງຍຶດຖືທັດສະນະຄະຕິແບບງົມງາຍຄອງເດີມ ແລະ ປັບປຸງປ່ຽນແປງໄດ້ຊ້າ ຊຶ່ງບັນຫາເຫລົ່ານີ້ ການຈັດຕັ້ງພັກ-ລັດ, ອົງການແນວລາວສ້າງຊາດ, ອົງການຈັດຕັ້ງມະຫາຊົນທຸກຂັ້ນ ຕະຫລອດຮອດປະຊາຊົນລາວບັນດາເຜົ່າທຸກຊັ້ນຄົນ ຈະຕ້ອງຮ່ວມແຮງຮ່ວມໃຈກັນ ແກ້ໄຂບັນຫາດັ່ງກ່າວນີ້ ໃຫ້ນັບມື້ນັບຫລຸດລົງເປັນກ້າວໆ.

ໃນໂອກາດສະເຫລີມສະຫລອງວັນເດັກນ້ອຍສາກົນ 1 ມິຖຸນາ ນີ້, ໃນນາມລັດຖະບານ, ຂ້າພະເຈົ້າ ຂໍຮຽກຮ້ອງມາຍັງ ບັນດາອົງການການຈັດຕັ້ງຂອງ ພັກ-ລັດ, ແນວລາວສ້າງຊາດ, ອົງການຈັດຕັ້ງມະຫາຊົນ ແລະ ຫົວໜ່ວຍທຸລະກິດທັງພາກລັດ ແລະ ເອກະຊົນ ຕະຫລອດເຖິງປະຊາຊົນ ແລະ ເດັກນ້ອຍລາວບັນດາເຜົ່າ ໃນຂອບເຂດທົ່ວປະເທດ ຈົ່ງສືບຕໍ່ຍົກສູງຄວາມຮັບຜິດຊອບຂອງຕົນຕໍ່ການປະຕິບັດວຽກງານແມ່ ແລະ ເດັກ, ແກ້ໄຂບັນຫາທີ່ຍັງຄົງຄ້າງໃນໄລຍະຜ່ານມາ, ສ້າງເງື່ອນໄຂ ແລະ ໂອກາດໃຫ້ລູກຫລານພວກເຮົາໄດ້ຮັບການພັດທະນາ ແລະ ມີອະນາຄົດທີ່ສົດໃສ, ມີຄວາມຈະເລີນກ້າວໜ້າຢ່າງມີຄຸນນະພາບ, ເປັນກຳລັງຊັບພະຍາກອນມະນຸດ ທີ່ມີຄວາມເຂັ້ມແຂງຂອງຊາດ ເພື່ອສືບຕໍ່ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ຈະເລີນຮຸ່ງເຮືອງ ຕາມທິດທີ່ພັກເຮົາໄດ້ວາງໄວ້. ອີກປະການໜຶ່ງ, ໃນໄລຍະນີ້ເປັນໄລຍະເວລາແຫ່ງການປ່ຽນແປງການດຳລົງຊີວິດ ໃຫ້ໄປຕາມວິຖີຊີວິດປົກກະຕິແບບໃໝ່ ເພື່ອປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດໂຄວິດ-19.

ພ້ອມກັນນີ້ ພວກເຮົາກໍ່ມີຄວາມຈຳເປັນຕ້ອງໄດ້ ກະກຽມຈັດຕັ້ງການຮຽນ-ການສອນຄືນໃໝ່ ເພື່ອໃຫ້ລູກຫລານຂອງພວກເຮົາໄດ້ສືບຕໍ່ສຶກສາຮໍ່າຮຽນ, ຂ້າພະເຈົ້າ ຈຶ່ງຂໍຮຽກຮ້ອງມາຍັງກະຊວງສຶກສາທິການ ແລະ ກິລາ, ຄູ-ອາຈານ ແລະ ພາກສ່ວນທີ່ກ່ຽວຂ້ອງ ກໍ່ຄືໂຮງຮຽນ, ສະຖາບັນການສຶກສາຊັ້ນຕ່າງໆ ຕະຫລອດຮອດຄະນະພັກ-ອຳນາດການປົກຄອງທຸກຂັ້ນ ຈົ່ງໄດ້ເອົາໃຈໃສ່ຮັບປະກັນຄວາມປອດໄພ ຢູ່ໃນໂຮງຮຽນ ແລະ ສະຖານທີ່ການສຶກສາ ທັງຮັບປະກັນຄຸນນະພາບຂອງການສຶກສາໃນທຸກຊັ້ນຮຽນ ແລະ ກ້າວສູ່ການຈັດການສອບເສັງ ໃຫ້ທັນຕາມກຳນົດເວລາຂອງການເປີດສົກຮຽນໃໝ່.

ສໍາລັບການຈັດຕັ້ງການປູກຕົ້ນໄມ້ແຫ່ງຊາດ ໃນທົ່ວປະເທດ ກໍ່ໃຫ້ປະຕິບັດຕາມເງື່ອນໄຂທີ່ສອດຄ່ອງ ຊຶ່ງບໍ່ຈຳເປັນຈັດພິທີແບບຮູບການ ດັ່ງທີ່ເຄີຍປະຕິບັດຜ່ານມາ, ສຳຄັນແມ່ນປູກຢ່າງມີແຜນການ ປູກແລ້ວຕ້ອງປົກປັກຮັກສາໃຫ້ຈະເລີນເຕີບໂຕໄດ້ດີ.ໃນໂອກາດທ້າຍສຸດນີ້, ຂ້າພະເຈົ້າ ຂໍຮຽກຮ້ອງຍັງພໍ່ແມ່ປະຊາຊົນ, ພະນັກງານ, ທະຫານ, ຕຳຫລວດ, ຄູ-ອາຈານ, ນັກຮຽນ-ນັກສຶກສາ ກໍ່ຄືທຸກພາກສ່ວນໃນສັງຄົມ ຈົ່ງເອົາໃຈໃສ່ດຳລົງຊີວິດປົກກະຕິແບບໃໝ່, ຍົກສູງສະຕິການປ້ອງກັນຕົນເອງໃຫ້ດີ, ມີຄວາມຮັບຜິດຊອບສູງຕໍ່ຕົນເອງ, ຄອບຄົວ, ສັງຄົມ ແລະ ປະເທດຊາດ, ພ້ອມກັນຕື່ນຕົວປະຕິບັດບັນດາມາດຕະການປ້ອງກັນພະຍາດ ໂຄວິດ-19 ທີ່ ພັກ-ລັດ ແຕ່ລະຂັ້ນວາງອອກ ຢ່າງເຂັ້ມງວດ.

ວັນເດັກນ້ອຍສາກົນ ວັນທີ 1 ມິຖຸນາ ປີນີ້, ຂໍໃຫ້ເດັກນ້ອຍລາວທຸກຖ້ວນໜ້າ ໃນຂອບເຂດທົ່ວປະເທດ ຈົ່ງມີສຸຂະພາບແຂງແຮງ, ເປັນເດັກຄຳຮູ້ຂອງພໍ່ແມ່, ເປັນນັກຮຽນດີ ນັກຮຽນເກັ່ງຂອງ ຄູ-ອາຈານ ແລະ ເປັນລູກຫລານທີ່ດີຂອງປະເທດຊາດ ອັນແສນຮັກຂອງພວກເຮົາ.

Medialaos MMD