ໃນລະຫວ່າງວັນທີ 10-11 ມີນາ 2021 ຜ່ານມານີ້ ຫ້ອງການແນວລາວສ້າງຊາດ ເມືອງໂພນທອງ ແຂວງຫຼວງພະບາງ ສົມທົບກັບຫ້ອງການສາທາລະນະສຸກ ແລະຫ້ອງການຖະແຫຼງຂ່າວວັດທະນະທໍາ ແລະ ທ່ອງທ່ຽວເມືອງ, ໄດ້ຈັດພິທີປະກາດບ້ານສົບ ແລະໂພນສຸກ ເປັນບ້ານສາມັກຄີປອງດອງ, ບ້ານວັດທະນະທຳ ແລະບ້ານສາທາລະນະສຸກແບບຢ່າງ, ໂດຍມີ ທ່ານ ກອງ ແສງພະຈັນ ປະທານແນວລາວສ້າງຊາດເມືອງ, ພ້ອມດ້ວຍຫົວໜ້າຫ້ອງການ ກ່ຽວຂ້ອງຂອງເມືອງ, ອົງການປົກຄອງບ້ານ, ແຂກຮັບເຊີນ ແລະປະຊາຊົນສອງບ້ານ ເຂົ້າຮ່ວມ.


ພິທີ ໄດ້ຮັບຟັງການຜ່ານບົດສະຫຼຸບ ການສ້າງຄອບຄົວ ແລະບ້ານວັດທະນະທຳ, ບ້ານສາທາລະນະສຸກແບບຢ່າງ ແລະບ້ານສາມັກຄີປອງດອງ, ບ້ານສົບພົນ ແລະບ້ານໂພນສຸກ ຫ່າງຈາກເທດສະບານເມືອງໂພນທອງປະມານ 91 ກິໂລແມັດ, ເປັນບ້ານປະສົມ 3 ເຜົ່າຢູ່ຮ່ວມກັນ ທັງສອງບ້ານມີ 89 ຄອບຄົວ, ມີພົນລະເມືອງທັງໝົດ 488 ຄົນ,ຍິງ 236 ຄົນ, ປະຊາຊົນສ່ວນໃຫຍ່ມີອາຊີບເຮັດນາ ແລະປູກຝັງລ້ຽງສັດ, ທັງໄດ້ເຮັດຕໍ່າຫູກທໍໄໝ,ຄ້າຂາຍເປັນອາຊີບສຳຮອງ, ຜ່ານການກໍ່ສ້າງຄອບ ແລະບ້ານວັດທະນະທຳ ເຫັນວ່າມີຄອບຄົວບັນລຸຕາມມາດຖານເງື່ອນໄຂ 75 ຄອບຄົວ, ກວມເອົາ 90%, ປະເມີນ 10 ມານຖານ 30 ຕົວຊີວັດຂອງຄອບຄົວ ແລະບ້ານສາທາລະນະສຸກແບບຢ່າງ ບັນລຸໄດ້ 73 ຄອບຄົວ, ກວມ 90%, ການສ້າງຄອບຄົວ ແລະບ້ານສາມັກຄີປອງດອງມີ 88 ຄອບຄົວ ກວມ 99%.

ຈາກນັ້ນ ໄດ້ມີການມອບໃບຢັງຢື້ນໃຫ້ແກ່ອົງການປົກຄອງບ້ານຢ່າງສົມກຽດ. ຕອນທ້າຍພິທີ ຄະນະປະທານພ້ອມດ້ວຍຜູ້ເຂົ້າຮ່ວມ ໄດ້ພ້ອມກັນ ລັ່ນຄ້ອງ 9 ບາດ ແລະເປີດປາຍ ບ້ານສົບພົນ ແລະບ້ານໂພນສຸກ ເປັນບ້ານວັດທະນະທຳ, ບ້ານສາທາລະນະສຸກແບບຢ່າງ ແລະບ້ານສາມັກຄີປອງດອງ ຢ່າງເປັນທາງການ.
ພາບ-ຂ່າວ: ສົມເພັດ ໄຊມີກອນ ນັກຂ່າວເມືອງໂພນທອງ.