ມີເດຍລາວແຂວງຫົວພັນ
ພິທີປະກາດ ບ້ານແກ່ວກູ້ ເມືອງແອດ ແຂວງຫົວພັນ ເປັນບ້ານປ້ອງກັນຄວາມສະຫງົບດີ ຮອບວຽນທີ 1 ໄດ້ຈັດຂື້ນໃນວັນທີ 15 ມີຖຸນາ 2021 ນີ້ ທີ່ບ້ານແກ່ວກູ້ ໂດຍການເຂົ້າຮ່ວມຂອງ ທ່ານ ທອງສຸກ ສົມພາວັນ ກຳມະກຳພັກແຂວງ ເລຂາພັກເມືອງ ເຈົ້າເມືອງໆແອດ ທ່ານ ນາງ ຄຳບາງ ທິບບຸດດາ ຮອງຫົວໜ້າກອງບັນຊາການ ປກສ ເມືອງແອດ; ມີພະນັກງານຫ້ອງການທີ່ກ່ຽວຂ້ອງຂັ້ນເມືອງ ອົງການປົກຄອງບ້ານ ແລະ ປະຊາຊົນບ້ານດັ່ງກ່າວເຂົ້າຮ່ວມ.

ບ້ານແກ່ວກູ້ ມີ 65 ຫຼັງຄາເຮືອນ, ມີ 65 ຄອບຄົວ ມີພົນລະເມືອງທັງໝົດ 448 ຄົນ, ຍິງ 212 ຄົນ ເປັນເຜົ່າມົ້ງ 100% ອາຊິບຕົ້ນຕໍແມ່ນລ້ຽງສັດໃຫ່ຍ ເຮັດໄຮ່ເຂົ້າ ຕາມເງື່ອນໄຂຂອງແຕ່ລະຄອບຄອບ ປະຊາຊົນມີຄວາມສາມັກຄີປອງດອງເຊິ່ງກັນ ແລະ ກັນ ພ້ອມກັນຕັ້ງໜ້າອອກແຮງງານ ແກ້ໄຂຊິວິດການເປັນຢູ່ ຕາມແນວທາງນະໂຍບາຍຂອງພັກ-ລັດວາງອອກ, ມີສ່ວນຮ່ວມເປັນຫູເປັນຕາໃນການປະກອບສ່ວນເຂົ້າວຽກງານປ້ອງກັນຊາດປ້ອງກັນຄວາມສະຫງົບ ມີຄວາມຈົ່ງຮັກພັກດີຕໍ່ປະເທດຊາດ ແລະ ເປັນເຈົ້າການໃນການຕ້ານ ແລະ ສະກັດກັ້ນ ບັນຫາປະກົດການຫຍໍ້ທໍ້ຕ່າງທີ່ເກິດຂື້ນໃນສັງຄົມ.

ດັ່ງນັ້ນຄະນະຮັບຜິດຊອບສ້າງບ້ານປ້ອງກັນຄວາມສະຫງົບດີ ຂອງກອງບັນຊາການ ປກສ ເມືອງ ໄດ້ປະເມີນຕາມມາດຖານເງື່ອນໄຂ ເຫັນວ່າສາມາດປະກາດຮັບຮອງ ບ້ານແກ່ວກູ້ ເປັນບ້ານປ້ອງກັນຄວາມສະຫງົບດີ ບ້ານທີ 33 ຂອງເມືອງແອດ ແລະ ເປັນບ້ານທີ 422 ຂອງແຂວງຫົວພັນ.
ໂອກາດນີ້ທ່ານ ເຈົ້າເມືອງ ໄດ້ຍ້ອງຍໍຊົມເຊີຍຜົນງານທີ່ບ້ານແກ່ວກູ້ຍາດມາໄດ້ ແລະ ໄດ້ເນັ່ນໜັກໃຫ້ປະຊາຊົນເປັນເຈົ້າການ ໃນການປົກປ້ອງສິດເປັນເຈົ້າຂອງປະເທດ ບໍ່ໃຫ້ຫຼົງເຊື່ອໃນເລກົນຂອງກຸ່ມຄົນທີ່ມາຕົວະຢົວະຫຼອກລວງ, ເອົາໃຈໃສ່ພັດທະນາບ້ານ ແລະ ຊອກຫາອາຊີບທີ່ໝັ້ນຄົງ ປະຊາຊົນມີຢູ່ມີກິນ ກ້າວໄປເຖິງການຫຼຸດພົ້ນຈາກຄວາມທຸກຍາກໃນອະນາຄົດ.