ມີເດຍລາວແຂວງຄຳມ່ວນ ຂ່າວ: ກອງຄຳ ເມືອງຍົມມະລາດ ສືບຕໍ່ເອົາໃຈໃສ່ປັບປຸງລະບົບພື້ນຖານໂຄງລ່າງ ໂດຍສະເພາະການສ້ອມແປງ ບັນດາເສັ້ນທາງ ຫຼັກ ທີ່ນອນຢູ່ໃນຄວາມຮັບຜິດຊອບຂອງເມືອງ ແລະ ເສັ້ນທາງລະຫວ່າງບ້ານຕໍ່ບ້ານ ເພື່ອຄວາມ ສະດວກໃນການ ສັນຈອນໄປ-ມາ ແລະ ການຂົນສົ່ງຜົນຜະລິດຂອງພໍ່ແມ່ປະຊາຊົນ.

ທ່ານ ຄຳເພັດ ກັນລິຍາວົງ ຮອງຫົວໜ້າຫ້ອງການໂຍທາທິການ ແລະ ຂົນສົ່ງ ເມືອງຍົມມະລາດ ແຂວງຄຳມ່ວນ ລາຍງານຜ່ານສື່ມວນຊົນ ໃນວັນທີ 15 ພຶດສະພາ 2021 ໃຫ້ຮູ້ວ່າ: ເມືອງຍົມມະລາດ ປະກອບມີ 46 ບ້ານ, ມີ 4 ກຸ່ມບ້ານພັດທະນາ ແລະ 22 ບ້ານໃຫຍ່ທີ່ຂຶ້ນກັບເມືອງ, ຕາໜ່າງເສັ້ນທາງມີຄວາມຍາວທັງໝົດ 262,60 ກິໂລແມັດໃນນັ້ນ ປະກອບມີທາງເບຕົງ 2,6 ກິໂລແມັດ, ທາງປູຢາງ 90 ກິໂລແມັດ, ທາງດິນແດງ 75 ກິໂລແມັດ ແລະ ທາງດິນທຳມະຊາດ 94 ກິໂລແມັດ. ເຊິ່ງໃນປະຈຸບັນ ເມືອງຍົມມະລາດ ແມ່ນພວມສຸມໃສ່ໃນການປັບປຸງ, ສ້ອມແປງ ບັນດາເສັ້ນທາງ, ຂົວທີ່ມີການເປ່ເພ

ໃນນັ້ນສິ່ງທີ່ພົ້ນເດັ່ນແມ່ນການກໍ່ສ້າງຂົວຂ້າມນໍ້າພີດ ໂດຍມີປະຊາຊົນຈຳນວນ 02 ບ້ານທີ່ຈະໄດ້ຮັບຜົນປະໂຫຍດຄື: ບ້ານໂຄກສະຫວ່າງ ແລະ ບ້ານໂພນສັງ ເຊິ່ງຂົວດັ່ງກ່າວແມ່ນເປັນຂົວປະເພດ ເບຕົ່ງປະສົມໄມ້, ມີຄວາມຍາວ 70 ແມັດ ແລະ ກວ້າງ 3,5 ແມັດ ເຊິ່ງສາມາດຮອງຮັບນ້ຳໜັກໄດ້ປະມານ 06 ໂຕ່ນ. ໂດຍໄດ້ເລີ່ມລົງມືການກໍ່ສ້າງໃນກາງເດືອນພຶດສະພາ 2021 ມາຮອດປະຈຸບັນບັນແມ່ນໄດ້ສຳເລັດໃນການຕັ້ງເສົາຂົວ ແລະ ເທຄານຂົວ ໂດຍໄດ້ຮັບທຶນ ແລະ ການສະໜອງທາງດ້ານວັດຖຸຈາກອຳນາດການປົກຄອງຂັ້ນແຂວງ, ຂັ້ນເມືອງ ແລະ ການປະກອບສ່ວນຈາກສັງຄົມ. ສ່ວນທາງດ້ານແຮງງານແມ່ນພະນັກງານ-ລັດຖະກອນ, ຊາວໜຸ່ມຈາກບັນດາ ຫ້ອງການອ້ອມຂ້າງເມືອງ ແລະ ພໍ່ແມ່ປະຊາຊົນໃນຈຳນວນ 02 ບ້ານດັ່ງກ່າວ ເປັນຜູ້ຈັດຕັ້ງປະຕິບັດ.

ແຕ່ເນື່ອງຈາກ ໃນປະຈຸບັນແມ່ນຢູ່ໃນໜ້າຝົນ ແລະ ລະດູທຳການຜະລິດຂອງພໍ່ແມ່ປະຊາຊົນ ຈຶ່ງເຮັດໃຫ້ມີຄວາມຫຍຸ້ງຍາກ ໃນການກໍ່ສ້າງ ເຊິ່ງຄາດວ່າໃນລະດູແລ້ງທີ່ຈະມາເຖິງນີ້ແມ່ນຈະໄດ້ປຸກລະດົມພໍ່ແມ່ປະຊາຊົນ ສືບຕໍ່ຈັດຕັ້ງປະຕິບັດ ໃຫ້ສຳເລັດ ແລະ ສາມາດທຽວໄປ-ມາໄດ້. ນອກນີ້ຍັງມີໂຄງການກໍ່ສ້າງນໍ້າປະປາຂອງເມືອງ ເຊິ່ງຮັບເໝົາກໍ່ສ້າງ ໂດຍບໍລິສັດ ເກດສຸວັນ ກໍ່ສ້າງ ແລະ ສ້ອມແປງ ຂົວ-ທາງ ຈຳກັດ ເຊິ່ງເປັນລະບົບນໍ້າປະປາທີ່ໄດ້ມາດຕະຖານ, ສາມາດຜະລິດໄດ້ 1.000 ກວ່າແມັດກ້ອນຕໍ່ມື້ ເຊິ່ງໂຄງການແມ່ນໄດ້ເລີ່ມລົງມືຈັດຕັ້ງປະຕິບັດໃນເດືອນກຸມພາ 2020 ແລະ ຄາດວ່າຈະໃຫ້ສຳເລັດ ພ້ອມເປີດການນຳໃຊ້ໃນທ້າຍປີ 2021 ນີ້.

ທ່ານ ຄຳເພັດ ກັນລິຍາວົງ ກ່າວຕື່ມວ່າ: ສຳລັບແຜນການໃນຕໍ່ໜ້າແມ່ນຈະໄດ້ເລັ່ງໃສ່ໃນການສ້ອມແປງ ເສັ້ນ ທາງລະຫວ່າງບ້ານຕໍ່ບ້ານທີ່ມີການເປ່ເພ ໂດຍສະເພາະເສັ້ນທາງເຂົ້າຫາກຸ່ມບ້ານວຽງຫຼວງ ໃນເຂດພູຊ້າງນ້ອຍ ເຊິ່ງເປັນ ທາງເສັ້ນດຽວຂອງເມືອງຍົມມະລາດ ທີ່ທຽວໄປ-ມາໄດ້ພຽງແຕ່ລະດູດຽວ ທັງນີ້ກໍ່ເພື່ອຄວາມສະດວກໃນການສັນຈອນ ໄປ-ມາຫາສູ່ ແລະ ການລຳລຽງຂົນສົ່ງສິນຄ້າຂອງພໍ່ແມ່ປະຊາຊົນໃນເຂດດັ່ງກ່າວ.