ມີເດຍລາວແຂວງຫົວພັນ ພິທີປະກາດ ບ້ານໂຊດ ເມືອງແອດ ແຂວງຫົວພັນ ເປັນບ້ານປ້ອງກັນຄວາມສະຫງົບດີ ໄດ້ຈັດຂຶ້ນຢ່າງເປັນທາງການ ໃນວັນທີ 21 ມິຖຸນາ 2021 ນີ້ ຢູ່ທີ່ສະໂມສອນບ້ານໂຊດ, ໃຫ້ກຽດເຂົ້າຮ່ວມໂດຍທ່ານ ທອງສຸກ ສົມພາວັນ ກຳມະການພັກແຂວງ ເລຂາພັກເມືອງ ເຈົ້າເມືອງໆແອດ, ມີ ພັທ ນ. ຄຳບາງ ທິບບຸດດາ ຮອງຫົວໜ້າກອງບັນຊາການ ປກສ ເມືອງແອດ, ມີຄະນະຮັບຜິດຊອບຂັ້ນເມືອງ, ອຳນາດການປົກຄອງບ້ານ ຕະຫຼອດຮອດປະຊາຊົນເຂົ້າຮ່ວມ.

ບ້ານໂຊດ ມີ 108 ຫຼັງຄາເຮືອນ, 131 ຄອບຄົວ, ມີຊົນເຜົ່າໄຕດຳ ແລະ ກຶມມຸ ອາໄສຢູ່ຮ່ວມກັນ, ພົນລະເມືອງທັງໝົດ 532 ຄົນ, ຍິງ 263 ຄົນ, ຖືອາຊີບເຮັດນາ ເປັນຕົ້ນຕໍ ແລະ ປູກຝັງ-ລ້ຽງສັດໃຫຍ່ ເປັນສິນຄ້າເພີ່ມຕື່ມ, ບ້ານໂຊດມີເນື້ອທີ່ນາທັງໝົດ 32 ຮຕ ກວ່າ, ສາມາດເຮັດນາໄດ້ 2 ລະດູ, ປະຊາຊົນມີຄວາມສາມັກຄີປອງດອງຮັກແພງເຊິ່ງກັນ ແລະ ກັນ, ພ້ອມກັນຕັ້ງໜ້າອອກແຮງງານ ແກ້ໄຂຊີວິດການເປັນຢູ່ ຕາມແນວທາງນະໂຍບາຍຂອງພັກ-ລັດວາງອອກ, ມີສ່ວນຮ່ວມເປັນຫູເປັນຕາ ປະກອບສ່ວນເຂົ້າໃນວຽກງານປ້ອງກັນຊາດປ້ອງກັນຄວາມສະຫງົບ ມີຄວາມຈົ່ງຮັກພັກດີຕໍ່ປະເທດຊາດ ແລະ ເປັນເຈົ້າການສະກັດກັ້ນບັນຫາ ປະກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມ, ດັ່ງນັ້ນ ຄະນະຮັບຜິດຊອບບ້ານປ້ອງກັນຄວາມສະຫງົບດີ ຂອງກອງບັນຊາການ ປກສ ເມືອງ ໄດ້ປະເມີນຕາມມາດຖານເງື່ອນໄຂ ເຫັນວ່າສາມາດປະກາດຮັບຮອງ ບ້ານໂຊດ ເປັນບ້ານປ້ອງກັນຄວາມສະຫງົບດີ ຮອບບຽນທີ 1, ເປັນບ້ານທີ 36 ຂອງເມືອງ ແລະ ບ້ານທີ 425 ຂອງແຂວງຫົວພັນ.

ໂອກາດນີ້ ທ່ານເຈົ້າເມືອງ ມີຄຳເຫັນໂອ້ລົມ ເຊິ່ງທ່ານໄດ້ຍ້ອງຍໍຊົມເຊີຍຕໍ່ຜົນງານທີ່ບ້ານໂຊດ ຍາດມາໄດ້ ແລະ ຮຽກຮ້ອງໃຫ້ປະຊາຊົນເອົາໃຈໃສ່ເປັນເຈົ້າການ ຕ້ານ ແລະ ສະກັດກັ້ນປະກົດການຫຍໍ້ທໍ້ຕ່າງໆພາຍໃນສັງຄົມ, ບໍ່ໃຫ້ຫຼົງເຊື່ອກົນອຸບາຍຂອງກຸ່ມຄົນບໍ່ດີທີ່ມາຕົວະຍົວະຫຼອກລວງ, ເອົາໃຈໃສ່ພັດທະນາບ້ານ, ຊອກຫາອາຊີບທີ່ຫໝັ້ນຄົງ ເພື່ອໃຫ້ປະຊາຊົນມີຢູ່ມີກິນຂຶ້ນເລື້ອຍໆ.