ມີເດຍລາວແຂວງບໍ່ແກ້ວ
ອົງການປົກຄອງບ້ານ ຕູບ ເມືອງຫ້ວຍຊາຍ ໄດ້ຈັດກອງປະຊຸມໃຫຍ່ຄັ້ງທີ 4 ຢູ່ທີ່ຫໍປະຊຸມຂອງບ້ານ ໃນວັນທີ 22 ມິຖຸນານີ້, ໃຫ້ກຽດເຂົ້າຮ່ວມຂອງທ່ານ ທອງພັນ ຈັນທະວົງ ຄະນະປະຈຳພັກເມືອງ, ປະທານແນວລາວສ້າງຊາດເມືອງຫ້ວຍຊາຍ, ມີບັນດາຄະນະພັກຜູ້ຊີ້ນຳກຸ່ມບ້ານ, ເລຂາຄະນະພັກຮາກຖານ, ເລຂາພັກບ້ານ, ການຈັດຕັ້ງບ້ານ, ເຖົ້າແກ່ແນວໂຮມ, ພະນັກງານຫ້ອງການທີ່ກ່ຽວຂ້ອງ ແລະ ປະຊາຊົນເຂົ້າຮ່ວມ.

ທ່ານ ໄຈວ່າ ຮອງນາຍບ້ານ ຕູບ ໄດ້ຜ່ານບົດສະຫຼຸບຕີລາຄາການເຄື່ອນໄຫວ ຂອງບ້ານໄລຍະຜ່ານມາ ບ້ານ ຕູບ ເປັນບ້ານໜຶ່ງທີ່ຂຶ້ນກັບກຸ່ມບ້ານດອນໃຈ ເມືອງຫ້ວຍຊາຍ ແຂວງບໍ່ແກ້ວ ມີ 85 ຄົວເຮືອນ, 115 ຄອບຄົວ, ມີພົນລະເມືອງທັງໝົດ 634 ຄົນ, ຍິງ 320 ຄົນ, ເປັນຊົນເຜົ່າ ມົ້ງ ຍຶດຖືອາຊີບ ເຮັດນາ ເປັນຕົ້ນຕໍ່ ປູກຝັງ-ລ້ຽງສັດເປັນສຳຮອງ. ໄລຍະຜ່ານມາ ອົງການປົກຄອງບ້ານໄດ້ ສົມທົບກັບ ຄະນະພັກ, ການຈັດຕັ້ງທຸກຂັ້ນ ຈັດຕັ້ງເຊື່ອມຊຶມບັນດາມະຕິ, ຄຳສັ່ງ, ນິຕິກຳ, ແຈ້ງການ, ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ຕິດພັນກັບ ການສຶກສາອົບຮົມການເມືອງ-ແນວຄິດ, ເຕົ້າໂຮມຄວາມສາມັກຄີປະຊາຊົນບັນດາເຜົ່າ ເອົາໃຈໃສ່ປະຕິບັດມາດຕະການຕ້ານ, ສະກັດກັ້ນການລະບາດພະຍາດ ໂຄວິດ 19 ກໍ່ຄືພະຍາດລະບາດຕາມລະດູການຢ່າງເປັນປົກກະຕິ ເຮັດໃຫ້ບ້ານມີສະຖຽນລະພາບດ້ານການເມືອງ, ມີຄວາມສະຫງົບໂດຍພື້ນຖານ, ໂຄງລ່າງພື້ນຖານ ດ້ານເສດຖະກິດ, ຊີວິດການເປັນຢູ່ ຂອງປະຊາຊົນ ໄດ້ຮັບການປັບປຸງແກ້ໄຂດີຂຶ້ນເລື້ອຍໆ ຈາກນັ້ນ, ປະຊາຊົນຜູ້ມີສິດປ່ອນບັດ ໄດ້ໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາອົງການປົກຄອງບ້ານຊຸດໃໝ່ ຜ່ານການປ່ອນບັດຕົວຈິງສາມາດເລືອກເອົາທ່ານ ໄຈ ວ່າ ເປັນນາຍບ້ານໆ ຕູບ, ທ່ານ ວື ເລົ່າ ແລະ ທ່ານ ເຢຍວາ ເລົ່າ ເປັນຮອງນາຍບ້ານ ຕູບ ຊຸດໃໝ່ ພ້ອມທັງ ເລືອກເອົາຫົົວໜ້າ-ຮອງຫົວໜ້າກວດກາຂັ້ນບ້ານ ຈຳນວນ 2 ທ່ານ, ຍິງ 1 ທ່ານ.


ໂອກາດນີ້, ທ່ານ ທອງພັນ ຈັນທະວົງ ໄດ້ມີຄຳເຫັນສະແດງຄວາມຍ້ອງຍໍຊົມເຊີຍ ຕໍ່ຜົນງານດ້ານດີ ທີ່ອົງການປົກຄອງບ້ານຊຸດເກົ່າຍາດມາໄດ້ ເນັ້ນໜັກ ໃຫ້ອົງການປົກຄອງບ້ານຊຸດໃໝ່ ຕ້ອງສືບຕໍ່ເອົາໃຈໃສ່ສຶກສາອົບຮົມການເມືອງ-ແນວຄິດ, ເຕົ້າໂຮມຄວາມສາມັກຄີປອງດອງພາຍໃນ ເປັນສຳຄັນ ຕິດພັນກັບ ການປັບປຸງແກ້ໄຂບັນຫາດ້ານອ່ອນ, ຂໍ້ຄົງຄ້າງ, ແບບແຜນວິທີການເຮັດວຽກໃຫ້ກົມກຽວ, ສົ່ງເສີມໃຫ້ປະຊາຊົນບັນດາເຜົ່າຫັນມາຜະລິດເປັນສິນຄ້າ, ປົກປັກຮັກສາປ່າໄມ້ເປັນກົກ ຍົກສູງການປັບປຸງການຈັດຕັ້ງຂັ້ນບ້ານໃຫ້ມີປະສິດທິພາບ ຮຽກຮ້ອງໃຫ້ທຸກການຈັດຕັ້ງບ້ານ ແລະ ປະຊາຊົນຈົ່ງໃຫ້ການຮ່ວມມືຊ່ວຍເຫຼືອ ຄະນະບ້ານຊຸດໃໝ່ ໃຫ້ສາມາດປະຕິບັດໜ້າທີ່ໄດ້ຢ່າງສະດວກ ເພື່ອພ້ອມກັນສ້າງສາພັດທະນາ ບ້ານ ຕູບ ໃຫ້ມີຄວາມຈະເລີນກ້າວໜ້າຂຶ້ນເລື້ອຍໆ. ພ້ອມທັງ ມອບໃບຍ້ອງຍໍຂອງທ່ານເຈົ້າເມືອງໆຫ້ວຍຊາຍ ໃຫ້ທ່ານ ຈໍາປາ ແກ້ວມະນີ ທີ່ໄດ້ປະກອບສ່ວນທຶນຮອນໃນການສ້າງສາພັດທະນາໂຮງຮຽນ ປະຖົມບ້ານຕູບ ຢ່າງສົມກຽດ.
ຂ່າວ ທອງເພັດ