ກອງປະຊຸມສະຫຼຸບການຈັດຕັ້ງປະຕິບັດໂຄງການສົ່ງເສີມການປູກມອນ-ລ້ຽງມ້ອນ ຂອງບໍລິສັດຊວງໄຊພັດທະນາກະສິກຳ ຈຳກັດ ຢູ່ແຂວງອຸດົມໄຊ ປະຈຳປີ 2020 ໄດ້ຈັດຂື້ນໃນຕອນເຊົ້າຂອງວັນທີ່ 15 ມີນານີ້ ທີ່ຫ້ອງປະຊຸມຂອງບໍລິສັດຊວງໄຊ ບ້ານດອນແກ້ວ ໂດຍການເຂົ້າຮ່ວມຂອງ ທ່ານ ອ່ອນແກ້ວ ອຸ່ນອາລົມ ຮອງເຈົ້າແຂວງອຸດົມໄຊ, ມີທ່ານ ຈາງທີງຈຽງ ປະທານບໍລິສັດຊວງໄຊພັດທະນາກະສິກຳຈຳກັດ,  ມີເຈົ້າເມືອງ, ຕາງໜ້າພະແນກການ ແລະ ຫ້ອງການທີ່ກ່ຽວຂ້ອງ ແລະຄະປະສານງານຂອງບໍລິສັດເຂົ້າຮ່ວມ.

ຈຸດປະສົງ ກໍ່ເພື່ອສະຫຼຸບການຈັດຕັ້ງປະຕິບັດການປູກມອນ-ລ້ຽງມ້ອນ ຂອງບໍລິສັດ ຢູ່ພາຍໃນແຂວງອຸດົມໄຊ ໃນປິ2020 ຜ່ານມາ ພ້ອມທັງວາງທິດທາງແຜນການ ປີ2021 ໂດຍໂຄງການມີຈຸດປະສົງເປັນພື້ນຖານຄໍ້າປະກັນໃນການຕອບສະໜອງວັດຖຸດິບໃຫ້ແກ່ໂຮງງານຜະລິດໄໝມ້ອນໃຫ້ພຽງພໍກັບຄວາມຕ້ອງການໃນແຕ່ລະປີ,  ເພື່ອເປັນການສ້າງວຽກເຮັດງານທໍາທີ່ເປັນອາຊີບທີ່ໝັ້ນຄົງ ແລະ ແກ້ໄຂຄວາມທຸກຍາກໃຫ້ແກ່ປະຊາຊົນ ຕິດພັນກັບການປົກປັກຮັກສາສິ່ງແວດລ້ອມ ກ້າວໄປສູ່ການຢຸດຕິຖາງປ່າເຮັດໄຮ່ຂອງປະຊົນ. ນອກຈາກນັ້ນຍັງເປັນການປະກອບສ່ວນສ້າງຖານລາຍຮັບໃຫ້ແກ່ລັດ ແລະ ສ້າງໃຫ້ມີຜະລິດຕະພັນສິນຄ້າຂອງແຂວງໃນອະນາຄົດຄາດໝາຍຮອດເດືອນ 12 ປີ 2021 ບໍລິສັດຈະສູ້ຊົນຂະຫຍາຍເນື້ອທີ່ປູກຂອງປະຊາຊົນໃນ 6 ເມືອງໃຫ້ໄດ້ 500 ເຮັກຕາຂຶ້ນໄປໃນນັ້ນ: ເມືອງໄຊ 80 ເຮັກຕາ, ເມືອງແບງ 100 ເຮັກຕາ, ເມືອງຮຸນ 100 ເຮັກຕາ, ເມືອງນາໝໍ້ 60 ເຮັກຕາ, ເມືອງງາ 100 ເຮັກຕາ ແລະ ເມືອງຫຼາ 60 ເຮັກຕາ ຊຸກຍູ້ ສ້າງເງື່ອນໄຂ ແລະ ຊຸກຍູ້ໃຫ້ບໍລິສັດສ້າງຕັ້ງໂຮງງານດຶງເສັ້ນໄໝມ້ອນຂະໜາດ 10 ຊຸດສາຍການຜະລິດ ເພື່ອຮອງຮັບໃຫ້ແກ່ການປູກມອນ-ລ້ຽງມ້ອນ.

ໃນໂອກາດທີ່ທ່ານຮອງເຈົ້າແຂວງເຂົ້າຮ່ວມກອງປະຊຸມ ທ່ານໄດ້ມີຄຳເຫັນ ກ່ອນອື່ນທ່ານໄດ້ກ່າວຍ້ອງຍໍຊົມເຊີຍຕໍ່ຜົນງານການເຄື່ອນໄຫວຂອງບໍລິສັດໃນໄລຍະຜ່ານມາ ແມ່ນໄດ້ສ້າງວຽກເຮັດງານທຳ ແລະ ສ້າງລາຍຮັບໃຫ້ແກ່ປະຊາຊົນຜູ້ທີ່ປູກມອນ-ລ້ຽງມ້ອນໄດ້ດີພໍສົມຄວນ ແລະ ອີກບັນຫາໜື່ງທີ່ຕ້ອງໄດ້ປຶກສາຫາລືກັນ ບັນຫາການຂະຫຍາຍສວນມອນ, ການເກັບຊື້ ແລະ ບັນກາອື່ນໆທີ່ຕ້ອງໄດ້ປຶກສາຫາລືກັນ ລະຫວ່າງພາກລັດ, ບໍລິສັດ ແລະ ປະຊາຊົນ ຜູ້ປູກມອນ-ລ້ຽງມ້ອນ ເພື່ອຫາວີທີການແກ້ໄຂບັນຫາທີ່ຍັງຄ້າງ, ນອກນີ້ກອງປະຊຸມຍັງໄດ້ເປີດກ້ວາງໃຫ້ບັນດາຜູ້ເຂົ້າຮ່ວມ ໄດ້ປະກອບຄວາມຄິດເຫັນໃສ່ວຽກງານຕ່າງໆ ໃຫ້ສອດຄ່ອງຕ່າງຝ່າຍຕ່າງໄດ້ຮັບຜົນປະໂຫຍດ.

ພາບ-ຂ່າວ: ແສງອາທິດ