ມີເດຍລາວແຂວງຈຳປາສັກ ຂ່າວ: ທັດຊະນະ ບໍລິສັດ ຈຸງຢາ ອິຊິ ຊີມັງລາວ ແຂວງສາລະວັນ ໄດ້ມອບປູນຊີມັງ ຈຳນວນ 50 ໂຕນ, ມູນຄ່າ 30 ລ້ານກີບ ໃຫ້ອົງການປົກຄອງແຂວງຈຳປາສັກ ເພື່ອນຳໃຊ້ເຂົ້າໃນກິດຈະກຳບູລິມະສິດຂອງແຂວງ.
ພິທີມອບ-ຮັບໄດ້ມີຂື້ນ ຕອນບ່າຍວັນທີ 16 ມີນາ 2021, ທີ່ຫ້ອງວ່າການແຂວງຈຳປາສັກ, ມອບໂດຍ ທ່ານ ສຸລິຍັນ ລາດຊະບັນດິດ ຕາງໜ້າໃຫ້ ບໍລິສັດ ຈຸງຢາ ອິຊິ ຊີມັງລາວ ແຂວງສາລະວັນ, ເປັນກຽດກ່າວຮັບໂດຍ ທ່ານ ວິໄລວົງ ບຸດດາຄຳ ເຈົ້າແຂວງໆຈຳປາສັກ ໂດຍມີພາກສ່ວນກ່ຽວຂ້ອງ ເຂົ້າຮ່ວມ.


ໂອກາດນີ້, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ໄດ້ສະແດງຄວາມຂອບໃຈ ໄປຍັງ ປະທານບໍລິສັດ ຈຸງຢາ ອິຊິ ຊີມັງລາວ ແຂວງສາລະວັນ ທີ່ໄດ້ປະກອບສ່ວນ ເຂົ້າໃນ ການພັດທະນາເສດຖະກິດ-ສັງຄົມ ແຂວງຈຳປາສັກ, ໃນວຽກງານຈຸດສຸມຄົມມະນາຄົມຂົນສົ່ງ ແລະ ການບໍລິການທາງຜ່ານ ພັດທະນາພື້ນຖານໂຄງລ່າງ ທັງພາຍໃນແຂວງ ແລະ ລະຫວ່າງແຂວງ ເປັນຕົ້ນແມ່ນ: ເສັ້ນທາງ, ຂົວ, ສະໜາມບິນ, ທ່າເຮືອ,ທ່າບົກ, ລະບົບຂົນສົ່ງ ແລະ ການບໍລິການໂລຈິດສຕິກ, ລະບົບສາທາລະນູປະໂພກ ແລະ ສາທາລະນູປະການ ເພື່ອສ້າງເງື່ອນໄຂສະດວກ ແລະ ເຊື່ອມຈອດເສດຖະກິດ, ການຄ້າ, ການລົງທຶນ, ການທ່ອງທ່ຽວ ແລະ ບໍລິການ.