ວັນທີ 24 ກຸມພາ 2021 ຜ່ານມານີ້, ໜ່ວຍຊາວໜຸ່ມບໍລິສັດ ລັດວິສາຫະກິດໄປສະນີລາວ ສາຂາ ແຂວງຫຼວງພະບາງ ໄດ້ຈັດພິທີ ປະກາດເປັນໜ່ວຍຊາວໜຸ່ມ 4 ບຸກຮອບທີ I ຄັ້ງທີ່ I ຂຶ້ນທີ່ຫ້ອງປະຊຸມດັ່ງກ່າວຢ່າງເປັນທາງການ, ໂດຍການເປັນປະທານຂອງ ສະຫາຍ ແສງອຳພອນ ຈິດຕະພອນ ເລຂາໜ່ວຍຊາວໜຸ່ມບໍລິສັດ ລັດວິສາຫະກິດໄປສະນີລາວ, ໃຫ້ກຽດເຂົ້າຮ່ວມຂອງ ສະຫາຍ ໄພວັນ ຈັນທະສຸກ ຮອງເລຂາຄະນະບໍລິຫານງານຊາວໜຸ່ມແຂວງ, ສະຫາຍ ວິກອນ ສົນທິດາ ຮອງອຳນວຍການ ບໍລິສັດ ລັດວິສາຫະກິດໄປສະນີລາວ ສາຂາ ແຂວງຫຼວງພະບາງ, ມີບັນດາແຂກຖືກເຊີນ ພ້ອມດ້ວຍສະມາຊິກພາຍໃນໜ່ວຍເຂົ້າຮ່ວມຢ່າງພ້ອມພຽງ.

ໃນພິທີ ສະຫາຍ ແສງອຳພອນ ຈິດຕະພອນ ເລຂາໜ່ວຍຊາວໜຸ່ມບໍລິສັດ ລັດວິສາຫະກິດໄປສະນີລາວໄດ້ຂຶ້ນຜ່ານບົດສະຫຼຸບ ການຈັດຕັ້ງປະຕິບັດຂໍ້ແຂ່ງຂັນ 4 ບຸກ ຂອງໜ່ວຍ ປະຈຳປີ 2020 ແລະ ທິດທາງແຜນການ ປີ 2021, ປັດຈຸບັນໜ່ວຍຊາວໜຸ່ມບໍລິສັດ ລັດວິສາຫະກິດໄປສະນີລາວ ມີສະມາຊິກທັງໝົດ 10 ສະຫາຍ, ຍິງ 5 ສະຫາຍ, ຜ່ານມາຄະນະໜ່ວຍຊາວໜຸ່ມ ພ້ອມດ້ວຍສະມາຊິກຊາວໜຸ່ມພາຍໃນໜ່ວຍ ໄດ້ເອົາໃຈໃສ່ໃນການປະຕິບັດໜ້າທີ່ວຽກງານຢ່າງຕັ້ງໜ້າ, ໂດຍຖືເອົາວຽກງານການສຶກສາອົບຮົມການເມືອງ-ແນວຄິດເປັນວຽກງານທີ່ສຳຄັນ, ແນໃສ່ສ້າງໃຫ້ສະມາຊິກຊາວໜຸ່ມພາຍໃນໜ່ວຍຂອງຕົນໃຫ້ມີທັດສະນະຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ມີຄວາມສາມັກຄີຮັກແພງ ຊ່ວຍເຫຼືອເຊິ່ງກັນແລະກັນ ເປັນເຈົ້າການໃນການປະກອບສ່ວນຢ່າງຕັ້ງໜ້າ ຄົ້ນຄວ້າຮ່ຳຮຽນເອົາວິທະຍາສາດ ເຕັກໂນໂລຊີທີ່ທັນສະໄໝ, ພາສາຕ່າງປະເທດ ຮ່ຳຮຽນເອົາປະຫວັດສາດ, ມູນເຊື້ອ ເພື່ອນຳມາພັດທະນາຕົນເອງ ແລະການຈັດຕັ້ງຂອງຕົນໃຫ້ມີຄວາມເຂັ້ມແຂງ ແລະທັນສະໄໝເທື່ອລະກ້າວ, ພ້ອມນັ້ນ ຍັງໄດ້ສະເໜີເອົາສະມາຊິກຊາວໜຸ່ມ ຜູ້ທີ່ມີຄວາມຫ້າວຫັນ ເຂົ້າຮ່ຳຮຽນສະໜັບສະໜູນພັກ ເພື່ອຄັດເລືອກເຂົ້າເປັນສະມາຊິກພັກຕື່ມອີກ ຈຳນວນ 3 ສະຫາຍ, ຍິງ 1 ສະຫາຍ, ຈາກນັ້ນ, ສະມາຊິກຊາວໜຸ່ມພາຍໃນໜ່ວຍຍັງໄດ້ພ້ອມກັນສືບຕໍ່ ຈັບມືແຂ່ງຂັນການຈັດຕັ້ງປະຕິບັດຂໍ້ແຂ່ງຂັນ 4 ບຸກ ໃນຂັ້ນຕໍ່ໄປໃຫ້ບັນລຸຕາມຄາດໝາຍ ແລະ ປະກົດຜົນເປັນຈິງ, ທີ່ປະຊຸມຍັງໄດ້ມອບໃບຢັ້ງຢືນ 4 ບຸກໃຫ້ໜ່ວຍ ຈຳນວນ 1 ໃບ, ພ້ອມດ້ວຍສະມາຊິກ ຈໍານວນ 10 ສະຫາຍ, ຍິງ 5 ສະຫາຍ, ທີ່ມີຜົນງານດີເດັ່ນໃນການຈັດຕັ້ງປະຕິບັດຂໍ້ແຂ່ງຂັນ 4 ບຸກ ປະຈຳປີ 2020 ພ້ອມທັງຈັດພິທີມອບ-ຮັບຢ່າງສົມກຽດ.

 ຕອນທ້າຍພິທີ ຍັງໄດ້ຮັບຟັງການໂອ້ລົມຂອງ ສະຫາຍ ໄພວັນ ຈັນທະສຸກ ຮອງເລຂາຄະນະບໍລິຫານງານຊາວໜຸ່ມແຂວງ ເຊິ່ງສະຫາຍໄດ້ສະແດງຄວາມຍ້ອງຍໍຊົມເຊີຍທີ່ຄະນະຊາວໜຸ່ມພ້ອມດ້ວຍສະມາຊິກພາຍໃນໜ່ວຍ ໄດ້ມີຄວາມເອົາໃຈໃສ່ປະຕິບັດໜ້າທີ່ວຽກງານດ້ວຍຄວາມຈູບຈ້າວຫ້າວຫັນ, ເຮັດວຽກເປັນໝູ່ຄະນະ ແລະ ແບ່ງຄວາມຮັບຜິດຊອບຢ່າງຈະແຈ້ງ ມີສະຕິຕໍ່ການຈັດຕັ້ງ ມີຄວາມກ້າຫານ ມີຫົວຄິດປະດິດສ້າງ ກ້າຄິດ ກ້າສະແດງອອກ ມີຄວາມຮັບຜິດຊອບສູງ ຕໍ່ໜ້າທີ່ ທີ່ໄດ້ຮັບການມອບໝາຍ ສືບຕໍ່ຮັກສາມູນເຊື້ອ ນາມມະຍົດ 4 ບຸກ ຂອງຊາວໜຸ່ມລາວ, ເຮັດໃຫ້ວຽກງານຊາວໜຸ່ມມີການພັດທະນາຂຶ້ນຢ່າງບໍ່ຢຸດຢັ້ງ.

ພາບ-ຂ່າວ: ສຸດາລັກ