ມີເດຍລາວແຂວງບໍ່ແກ້ວ
ກອງປະຊຸມວຽກງານກໍ່ສ້າງຮາກຖານການເມືອງພັດທະນາຊົນນະບົດ ແລະ ຕິດພັນກັບວຽກງານ 3 ສ້າງ ປີ 2021-2025. ຢູ່ແຂວງບໍ່ແກ້ວ ໄດ້ໄຂຂຶ້ນຢ່າງເປັນທາງການ ໃນວັນທີ 23 ມີຖຸນາ 2021ນີ້ ທີ່ຫໍວັດທະນະທຳແຂວງ ໂດຍການເປັນປະທານຂອງ ທ່ານ ເພັງສອນ ແກ້ວວິໄລ ຮອງເລຂາພັກແຂວງ ຜູ້ຊີ້ນຳຂົງເຂດພັກພະນັກງານ ເຂົ້າຮ່ວມຂອງ ທ່ານ ຈອມສີ ລັດຕະນະປັນ ຮອງເລຂາພັກແຂວງ, ປະທານສະພາປະຊາຊົນແຂວງ ມີບັນດາ ທ່ານຮອງເຈົ້າແຂວງ, ຄະນະປະຈຳພັກແຂວງ, ກຳມະການພັກແຂວງ ບັນດາທ່ານການນຳພະແນກການ, ອົງການທຽບເທົ່າຂອງແຂວງ, ການນຳຂອງເມືອງ, ພະນັກງານກໍ່ສ້າງຮາກຖານການເມືອງ.

ທ່ານ ເພັງສອນ ແກ້ວວິໄລ ຮອງເລຂາພັກແຂວງ ປະທານກອງປະຊຸມ ມີຄຳເຫັນວ່າ: ສູນກາງພັກ,ລັດຖະບານ ແລະ ທົ່ວອົງຄະນະພັກແຂວງບໍ່ແກ້ວ ເວລາໃດກໍ່ຍືດໝັ້ນສະເໝີຕົ້ນສະເໝີປາຍ ການຫັນລົງກໍ່ສ້າງຮາກຖານການເມືອງ, ການພັດທະນາຊົນນະບົດຮອບດ້ານຖືເປັນໜ້າທີ່ຍຸດທະສາດທັງເປັນວຽກງານບູລິມະສິດສໍາຄັນຂອງທົ່ວພັກ – ລັດ ແລະ ທົ່ວສັງຄົມ, ຖືສຳຄັນ ແລະ ເອົາໃຈໃສຕໍ່ກັບການກໍ່ສ້າງຮາກຖານການເມືອງ, ພັດທະນາຊົນນະບົດ, ລົບລ້າງຄວາມທຸກຍາກ, ຖືເອົາວຽກນີ້ເປັນວຽກຍຸດທະສາດ, ເປັນວຽກທີ່ເຮັດເປັນປະຈຳຕໍ່ເນື່ອງ ແລະ ເປັນຄວາມຮັບຜິດຊອບໂດຍກົງຂອງຄະນະພັກແຕ່ລະຂັ້ນ.

ພວກເຮົາໄດ້ສຸມທຸກສະຕິປັນຍາ, ທຶນຮອນ ແລະ ບຸກຄະລະກອນເຂົ້າໃນການຫັນລົງກໍ່ສ້າງຮາກຖານການເມືອງ, ພັດທະນາຊົນນະບົດ, ລົບລ້າງຄວາມທຸກຍາກ ຊຶ່ງໄດ້ຮັບໝາກຜົນສຳເລັດໃນຫຼາຍດ້ານ, ພ້ອມກັນນັ້ນ ກໍ່ຍັງມີຈຸດອ່ອນ ແລະ ຂໍ້ຄົງຄ້າງ ທີ່ຈະໄດ້ສືບຕໍ່ປັບປຸງແກ້ໄຂໃນຫຼາຍຂອດ ເພື່ອເຮັດໃຫ້ຊົນນະບົດມີການຫັນປ່ຽນໃໝ່ຢ່າງຕັ້ງໜ້າ, ຄວາມທຸກຍາກຂອງປະຊາຊົນໄດ້ຮັບການແກ້ໄຂຊີວິດການເປັນຢູ່ຂອງປະຊາຊົນດີຂຶ້ນເປັນກ້າວໆ.

ກອງປະຊຸມຈະໄດ້ສະຫຼຸບຕີລາຄາໂດຍຫຍໍ້ການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ, ພັດ ທະນາຊົນນະບົດ, ວຽກງານ 3 ສ້າງ ແລະ ວາງທິດທາງແຜນການແຕ່ປີ 2021-2025.ເຊື່ອມຊຶມຄໍາສັ່ງຂອງ ກມສພ ສະບັບເລກທີ 097/ກມສພ,ວ່າດ້ວຍການເພີ່ມທະວີການນຳພາ-ຊີ້ນຳຕໍ່ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ,ຂໍ້ຕົກລົງຂອງເຈົ້າແຂວງ ເລກທີ 351 ວ່າດ້ວຍການກຳນົດບ້ານຈຸດສຸມລົງກໍ່ສ້າງຮາກຖານການເມືອງ, ພັດທະນາຊົນນະບົດ ແລະ ວຽກງານ 3 ສ້າງຂອງແຂວງແຕປີ 2021-2025. ມະຕິຕົກລົງຂອງຄະນະປະຈໍາພັກແຂວງສະບັບເລກທີ 766/ຄປຈຂ.ບກ, ລົງວັນທີ 14 ເດືອນ 6 ປີ 2021 ວ່າດ້ວຍການແຕ່ງຕັ້ງຄະນະຮັບຜິດຊອບຊີ້ນໍາລວມຄະນະຮັບຜິດຊອບນໍາພາບັນຊາຕົວຈິງ ແລະ ພະນັກງານຫຼັກແຫຼ່ງຂອງແຂວງ, ເມືອງລົງປະຈໍານຳພາປະຊາຊົນເຮັດຕົວຈິງຢູ່ບັນດາບ້ານເປົ້າໝາຍຈຸດສຸມທົ່ວແຂວງ ແຜນດໍາເນີນງານຂອງຄະນະຮັບຜິດ ຊອບຊີ້ນຳຂັ້ນແຂວງ ກ່ຽວກັບການຫັນລົງກໍ່ສ້າງຮາກຖານການເມືອງຕະຫຼອດ ໄລຍະ 5 ປີ (2021-2025). ມີ 10 ຈຸດສຸມ, ມີ 80 ບ້ານ. ເປົ້າໝາຍສ້າງບ້ານພົ້ນທຸກ ມີ 39 ບ້ານ.

ຮຽກຮ້ອງມາຍັງບັນດາທ່ານ ຈົ່ງຍົກສູງຄວາມຮັບຜິດຊອບທາງດ້ານການເມືອງ ເຂົ້າໃນການປະກອບຄໍາຄິດເຫັນຢ່າງກົງໄປກົງມາຊອກໃຫ້ເຫັນບົດຮຽນທາງດ້ານດີຜົນສຳເລັດ ເພື່ອຜັນຂະຫຍາຍ ແລະ ດ້ານອ່ອນ ຂໍ້ຄົງຄ້າງ ເພື່ອແກ້ໄຂ ແລະ ການວາງທິດທາງແຜນການ, ວິທີການມາດຕະການຈັດຕັ້ງປະຕິບັດຕໍ່ໜ້າໃຫ້ແທດເຖິງຕົວຈິງ ແລະມີຄວາມຮັບປະກັນປະສິດທິພາບສູງ.