ຕອນເຊົ້າວັນທີ 23 ມິຖຸນາ 2021 ນີ້ກອງບັນຊາການທະຫານແຂວງອັດຕະປື ໄດ້ຈັດຕັ້ງເຊື່ອມຊືມມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງປ້ອງກັນປະເທດ ພິທີໄດ້ຈັດຂຶ້ນທີ່ສະໂມສອນກອງບັນຊາການທະຫານແຂວງ ໂດຍການເປັນປະທານຂອງສະຫາຍ ພັນເອກ ໂຊກໄຊ ພິມມະລາ ຄະນະປະຈຳພັກ, ເລຂາພັກ ຫົວໜ້າການເມືອງກອງບັນຊາການທະຫານແຂວງ, ມີຄະນະໜ່ວຍພັກ ຄະນະບັນຊາ 5 ຫ້ອງ, ກອງບັນຊາການ 5 ເມືອງ, 2 ກອງພັນນ້ອຍ, ກອງຮ້ອຍເອກະລາດ ໂຮງຮຽນ-ໂຮງໝໍ ພະແນກການທີ່ກ່ຽວຂ້ອງເຂົ້າຮ່ວມ.
ສະຫາຍ ພັນເອກ ໂຊກໄຊ ພິມມະລາ ກ່າວວ່າ: ການເຊື່ອມຊືມ-ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງປ້ອງກັນປະເທດ ຄັ້ງນີ້ກໍ່ເພື່ອແນໃສ່ໃຫ້ການນຳໃນຂົງເຂດປ້ອງກັນຊາດພາຍໃນແຂວງອັດຕະປື ຮັບຮູ້ເຂົ້າໃຈຢ່າງເລິກເຊິ່ງ ແລະ ກຳແໜ້ນເນື້ອໃນຂອງມະຕິ XI ຂອງພັກ,ມະຕິ V ຂອງອົງຄະນະພັກກະຊວງປ້ອງກັນປະເທດ ໂດຍສະເພາະແມ່ນເນື້ອໃນຕົ້ນຕໍ ແລະ ວຽກງານຈຸດສຸມທີ່ຕ້ອງເອົາໃຈໃສ່ນຳພາ-ຊີ້ນຳ ໃນຂົງເຂດວຽກງານປ້ອງກັນຊາດ ຕາມຄວາມຮັບຜິດຊອບຂອງຕົນ ຕິດພັນກັບການເສີມຂະຫຍາຍຄວາມເປັນເຈົ້າການຂອງກໍາລັງປະກອບອາວຸດ, ໃນການຫັນມະຕິກອງປະຊຸມໃຫຍ່ ຄັ້ງທີ XI ຂອງພັກໃຫ້ເປັນແຜນງານ,ໂຄງການ ແລະ ກິດຈະກຳລະອຽດຂອງຕົນ ເພື່ອຈັດຕັ້ງປະຕິບັດໃຫ້ເກີດໝາກ, ເກີດຜົນຕົວຈິງ.


ໃນທີ່ປະຊຸມ ຍັງໄດ້ຮັບຟັງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ຂອງແຂວງແຕ່ປີ 2021-2025 ຊຶ່ງເປັນການສຶບຕໍ່ປະຕິບັດຍຸດທະສາດການພັດທະນາຮອດປີ 2025 ແລະ ວິໄສທັດຮອດປີ 2030 ໂດຍສຶບຕໍ່ປະຕິບັດແນວທາງປ່ຽນແປງໃໝ່ຮອບດ້ານຢ່າງມີຫລັກການຂອງພັກ ກໍຄືການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ XI ຂອງກອົງຄະນະພັກກະຊວງປ້ອງກັນປະເທດ ຢ່າງເປັນເຈົ້າການ, ສຸມທຸກກຳລັງແຮງເຮັດໃຫ້ແຂວງອັດຕະປື ສຶບຕໍ່ມີສະຖຽນລະພາບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍທາງສັງຄົມຢ່າງໜັກແໜ້ນ ໂດຍການຂຸດຄົ້ນ ແລະ ນຳໃຊ້ທ່າແຮງບົ່ມຊ້ອນພາຍໃນໃຫ້ມີປະສິດທິຜົນ, ໝັ້ນທ່ຽງ ແລະ ຍືນຍົງ, ເສດຖະກິດຂະຫຍາຍຕົວຕໍ່ເນື່ອງ ແລະ ລຶບລ້າງຄວາມທຸກຍາກ ຂອງປະຊາຊົນໃຫ້ນັບມື້ຫຼຸດໜ້ອຍຖອຍລົງເປັນກ້າວໆ.
ກອງປະຊຸມຍັງໄດ້ຜ່ານຂໍ້ຕົກລົງຂອງກະຊວງປ້ອງກັນປະເທດ ວ່າດ້ວຍການຄຸ້ມຄອງ ນາຍ ແລະ ພົນທະຫານ ທີ່ໄດ້ຮັບນະໂຍບາຍອຸດໜູນບຳນານ ເສຍອົງຄະ ຍ້ອນການສູ້ຮົບ ແລະ ຮັບໃຊ້ການສູ້ຮົບ ຜ່ານຂໍ້ຕົກລົງ ແຜນການຂອງກອງບັນຊາການການ ແລະ ຕາຕະລາງລົງເຜີຍແຜ່ມະຕິດັ່ງກ່າວຢູ່ບັນດາກົມກອງຕື່ມອີກ .
ພາບ-ຂ່າວ: ແສງຫຼ້າ ກຸວົງສາ