ວັນທີ​ 25​ ກຸມພາ​  2021​ຜ່ານມານີ້,​  ຫ້ອງການ ປກສເມືອງຈອມເພັດ​ ໄດ້ຈັດກອງປະຊຸມ ສະຫຼຸບວຽກງານປະຈໍາປີ 2020​ ແລະ​ວາງທິດທາງແຜນການ​ ປະຈໍາປີ​ 2021​ ຂຶ້ນ​ ຢູ່ທີ່ສະໂມສອນຂອງເມືອງ ໂດຍການເປັນປະທານ ຂອງທ່ານສາຍສະໝອນ​ ສາລິວົງ ເຈົ້າເມືອງຈອມເພັດ, ເປັນກຽດເຂົ້າຮ່ວມ​ ຂອງ​ທ່ານ ພັທ ອ່ອນຈັນ​ ວິໄລຈິດ​ ຄະນະພັກກອງບັນຊາການປກສ​ ແຂວງ,​ ຫົວໜ້າຫ້ອງການເມືອງ,​ມີບັນດາຄະນະປະຈໍາພັກເມືອງ,​ ກຳມະການພັກເມືອງ​ ແລະອ້າຍນ້ອງປກສ ທົ່ວເມືອງ ເຂົ້າຮ່ວມ.

ສະຫາຍ​ ພັທ ສົມສັກມີໄຊຜົນ ຮອງຫົວໜ້າຫ້ອງການ ປກສ​  ເມືອງ ໄດ້ຂື້ນຜ່ານບົດສະຫຼຸບການຈັດຕັ້ງປະຕິບັດ​ວຽກງານ​ປະຈໍາປີ​ 2020​ ຊຶ່ງຕະຫຼອດໄລຍະ​ 01​ປີ ຜ່ານມາ,​  ຄະນະພັກ​-ຄະນະກອງບັນຊາການ​ ປກສ​ ເມືອງ​ຈອມ​ເພັດ​  ແມ່ນໄດ້ໃຫ້ຄວາມສໍາຄັນໂດຍຖືເອົາວຽກງານການສຶກສາອົບຮົມການ​ເມືອງ​ແນວຄິດ​ເປັນກົກ,​  ເພື່ອ​ເຮັດ​ໃຫ້​ພະນັກງານ​ນັກຮົບ​ແຕ່ລະ​ສະຫາຍ​ມີແນວຄິດ​ອຸ່ນອ່ຽງ ທຸ່ນ​ທ່ຽງ​  ເຊື່ອໝັ້ນ​ຕໍ່​ການ​ຊີ້ນຳ​-ນໍາ​ພາ​ ຂອງພັກ,​  ມີສະຕິ​ລະວັງ​ຕົວ,​ ມີຄວາມ​ຮັບຜິດຊອບ​ໃນການ​ເຄື່ອນໄຫວ​ວຽກງານ​ຂອງ​ຕົນ ໂດຍ​ການ​ນໍາ​ເອົາ​ເອກະສານ​ຕ່າງໆ​   ຂອງພັກ-ຂອງ​ຊາດ​ ແລະ​ ເອ​ກະ​ສານ​ທີ່​ສໍາ​ຄັນອື່ນໆ​  ລົງຈັດຕັ້ງເຜີຍແຜ່ເຊື່ອມຊຶມ​ຢ່າງເປັນປົກກະຕິ;   ໄດ້ຕັ້ງໜ້າສຸມທຸກເຫື່ອແຮງເພື່ອ​ຊີ້ນຳ​-ນຳພາ​  ເປັນ​ຕົ້ນໄດ້ສຸມໃສ່ແກ້ໄຂບັນດາປະກົດການຫຍໍ້ທໍ້ຕ່າງໆ ທີ່ເກີດຂຶ້ນທັງໝົດ 22 ລາຍ,​  ທຽບໃສ່ປີ ຜ່ານມາ​  ແມ່ນລຸດລົງ 5 ລາຍ,​   ໃນນັ້ນໄດ້​ກັກຕົວ​ຜູ້ຕ້ອງຫາ​ໄດ້​ 19​ ຄົນ,​ ວິທີການ​ແກ້ໄຂ​ໄດ້ສົ່ງໃຫ້ພະແນກສະກັດກັ້ນຕ້ານການຄ້າມະນຸດ 2 ລາຍ,​  ສົ່ງໃຫ້ໄອຍະການເຂດ 1 ຫຼວງພະບາງ 1 ລາຍ,​  ແກ້ໄຂຢູ່ຂັ້ນເຈົ້າໜ້າທີ່ເມືອງ  9  ລາຍ,​  ສົ່ງໃຫ້ຫ້ອງຕໍາຫຼວດ  ປກສ​  ແຂວງ​ດໍາ ເນີນ ​6 ລາຍ,​  ໂຈະການດໍາເນີນ 2 ລາຍ​  ແລະ​  ພວມ​ດຳ​ເນີນ​ 2 ລາຍ,​ ໄດ້ມ້າງ​ກຸ່ມແກ້ງ ຄ້າຢາເສບຕິດ 7 ລາຍ,​  ຢືດຂອງກາງຢາບ້າໄດ້  87,621  ເມັດ,​ໃນນັ້ນ,​  ໄດ້ສົ່ງໃຫ້​ພະແນກ​ສະກັດກັ້ນ  ແລະ​  ຕ້ານຢາເສບຕິດຂັ້ນແຂວງ 5 ລາຍ,​  ສຶກສາອົບຮົມຢູ່ຂັ້ນເມືອງ 2 ລາຍ,​  ໃນ​ 1 ປີ ຜ່ານມາ,  ມີຄະດີອຸປະຕິເຫດ ເກີດ​ຂຶ້ນ​ທັງ​ໝົດ​ 38 ລາຍ,​  ມີພາຫະນະເປ່ເພ 53 ຄັນ,​  ມີຜູ້ໄດ້ຮັບບາດເຈັບທັງໝົດ 78 ຄົນ,​  ສົ່ງໃຫ້ກອງຈາລະຈອນແຂວງດໍາເນີນ 5 ລາຍ,​ ໃນນັ້ນໄດ້ແກ້ໄຂໄປແລ້ວ 30 ລາຍ​  ແລະ ສົ່ງໃຫ້ໄອຍະການເຂດດໍາເນີນ​ 2 ລາຍ​   ພວມດໍາເນີນຢູ່ຂັ້ນເຈົ້າ ໜ້າ​ທີ່ເມືອງ 1 ລາຍ​  ແລະ​ ພ້ອມດຽວກັນນັ້ນໃນກອງປະຊຸມ​ຍັງໄດ້ປະກາດແຍກໝ່ວຍພັກ  ປກສ​  ເມືອງ​  ອອກເປັນ 4 ໝ່ວຍພັກ​  ແລະ​ ສ້າງຕັ້ງຄະນະພັກຮາກຖານ ປກສ​  ເມືອງ​ຈອມ​ເພັດ​ຕື່ມອີກ.​

ຕອນທ້າຍ  ສະຫາຍ​  ສາຍສະໝອນ​  ສາລິວົງ​  ເລຂາ​ພັກ​ເມືອງ​ ໄດ້ຍ້ອງຍໍຊົມເຊີຍ  ແລະຕີລາຄາສູງ  ຕໍ່​ຜົນງານຕ່າງ​ໆ​  ທີ່​ທາງ​ຄະນະພັກ​ ກອງ​ບັນຊາການ​  ປກສ​  ເມືອງ  ຍາດຍາດມາໄດ້ພ້ອມທັງຮຽກຮ້ອງ   ໃຫ້ສືບຕໍ່ ເພີ່ມທະວີໃນການສຶກສາອົບຮົມການເມືອງແນວຄິດ ໃຫ້ເລິກເຊິ່ງ​ເຖິງຖອງ,​  ເອົາໃຈໃສ່ແກ້ໄຂປະກົດການຫຍໍ້ທໍ້ຕ່າງໆ ທີ່ເກີດຂື້ນໃນສັງຄົມ ໃຫ້ຖືກຕ້ອງ​ ແລະ​ ທັນເວລາ  ປະສານສົມທົບກັບຫຼາຍພາກສ່ວນທີ່ກ່ຽວຂ້ອງ  ເພຶ່ອ​ຕິດຕາມ​ ກວດກາ​  ເລີກຮື້ບັນດາ ໝໍ່ແໝງທີ່ກໍ່ເກີດຄວາມບໍ່ສະຫງົບ​  ໃນສັງຄົມໃຫ້ລຸດໝ້ອຍຖອຍລົງໄປເທື່ອລະກ້າວ.

  ພາບ-ຂ່າວ:   ເມືອງຈອມເພັດ.