ມີເດຍລາວແຂວງຫຼວງນ້ຳທາ ຂ່າວ: ສົມພອນ ຂຸນດາວົງ ວັນທີ 18 ມິຖຸນາ 2021 ຢູ່ທີ່ສະໂມສອນ ແຂວງຫຼວງນ້ຳທາ ກອງບັນຊາການ ປກສ ແຂວງ ໄດ້ເຊື່ອມຊຶມ ມະຕິກອງປະຊຸມໃຫຍ່ຄັ້ງທີ XI ຂອງພັກ ໃຫ້ແກ່ພະນັກງານສະມາຊິກພັກອ້ອມຂ້າງ. ໂດຍການເປັນປະທານຂອງ ທ່ານ ພົຈວ ສົມໄຊ ຈັນທະວົງ ກຳມະການພັກແຂວງ ເລຂາອົງຄະນະພັກ ຫົວໜ້າກອງບັນຊາການ ປກສ ແຂວງ, ມີຄະນະພັກ-ຄະນະບັນຊາກອງບັນຊາການ, ເລຂາຄະນະພັກຮາກຖານ, ເລຂາຄະນະໜ່ວຍພັກ, ຕະຫຼອດຮອດພະນັກງານຫຼັກແຫຼ່ງຂັ້ນຮອງຫົວໜ້າພະແນກຂຶ້ນໄປເຂົ້າຮ່ວມ.

ທ່ານ ພົຈວ ສົມໄຊ ຈັນທະວົງ ໄດ້ຍົກໃຫ້ເຫັນເນື້ອໃນການຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງສູນກາງພັກປະຊາຊົນປະຕິວັດລາວ, ເຊິ່ງໄດ້ກໍານົດທັດສະນະແຫ່ງການສ້າງສາພັດທະນາ, ການຫັນປ່ຽນຢ່າງແຂງແຮງ, ເລິກເຊິ່ງ,ຮອບດ້ານໃນການພັດທະນາເສດຖະກິດ-ສັງຄົມ ໃນຊຸມປີຕໍ່ໜ້າ ແນ່ໃສ່ແກ້ໄຂຄວາມທຸກຍາກ ແລະ ນໍາອົາປະເທດຊາດຫຼຸດພົ້ນອອກຈາກສະຖານະພາບດ້ອຍພັດທະນາ.ແມ່ນຂີດໝາຍແຫ່ງການເຕີບໃຫຍ່ຂະຫຍາຍຕົວຂອງພັກເຮົາ, ແມ່ນບັ້ນດຳເນີນຊີວິດການເມືອງພາຍໃນພັກ ເພື່ອສ້າງການຫັນປ່ຽນຢ່າງແຂງແຮງ ແລະ ເປັນລະບົບ ໂດຍເລີ່ມຈາກການຫັນປ່ຽນຈາກແນວຄິດ-ຈີນຕະນາການສູ່ການກະທຳຕົວຈິງ ເພື່ອແກ້ຈຸດອ່ອນ ແລະ ບັນຫາທີ່ຍັງຄົງຄ້າງ ໃຫ້ມີການປ່ຽນແປງໃໝ່ຢ່າງແຂງແຮງ, ເລິກເຊິ່ງ ແລະ ຮອບດ້ານ ແນ່ໃສ່ຍົກສູງບົດບາດ, ຄວາມສາມາດນຳພາ ແລະ ຄວາມເປັນແບບຢ່າງນຳໜ້າຂອງພັກ, ເພີ່ມທະວີຄວາມເປັນປຶກແຜ່ນຂອງປະຊາຊົນໃນຊາດ, ເດັດດ່ຽວປົກປັກຮັກສາ ແລະ ສ້າງສາພັດທະນາປະເທດຊາດ ສູ່ຈຸດໝາຍສັງຄົມນິຍົມ.


ການເຜີຍແຜ່ເຊື່ອມຊຶມເນື້ອໃນເອກະສານມະຕິກອງປະຊຸມໃຫຍ່ຄັ້ງທີ XI ຂອງພັກ ກໍ່ເພື່ອແນ່ໃສ່ສົ່ງເສີມສະຕິປັນຍາ, ຫົວຄິດປະດິດສ້າງ, ສ້າງຄວາມເຂົ້າໃຈ, ຮັບຮູ້ກ່ຽວກັບການຫັນປ່ຽນໃໝ່, ແນ່ໃສ່ການຫັນປ່ຽນໃໝ່ທີ່ແຂງແຮງ, ເລິກເຊິ່ງ ແລະ ຮອບດ້ານ ໃນທຸກຂົງເຂດວຽກງານ ເປັນຕົ້ນແມ່ນສ້າງການຫັນປ່ຽນທາງດ້ານຄວາມຮູ້, ທັດສະນະ ແລະ ການກະທຳ ສົ່ງເສີມດ້ານດີ, ແກ້ໄຂຂໍ້ຂາດຕົກບົກພ່ອງ, ຂໍ້ຄົງຄ້າງ ແລະ ສິ່ງທ້າທາຍຕ່າງໆໃນໄລຍະຜ່ານມາ, ສ້າງຄວາມເຊື່ອໝັ້ນໃຫ້ພະນັກງານ ແລະ ປະຊາຊົນບັນດາເຜົ່າຕໍ່ການນຳພາຂອງພັກ, ການບໍລິຫານຄຸ້ມຄອງຂອງລັດ, ສືບຕໍ່ຊີ້ນຳ-ນຳພາປົກປັກຮັກສາ ແລະ ສ້າງສາພັດທະນາປະເທດຊາດ ກໍ່ຄື ແຂວງຫຼວງນ້ຳທາ ໃຫ້ມີຄວາມຈະເລີນ ແລະ ພັດທະນາຂຶ້ນເລື້ອຍໆ.