ມີເດຍລາວແຂວງຫຼວງພະບາງ ພິທີຮັບຮອງເອົາໂຮງໝໍບໍລິເວນ 107 ນະຄອນ ຫຼວງພະບາງ ເປັນກົມກອງວັດທະນະທໍາ ໄດ້ຈັດຂື້ນໃນວັນທີ 19 ສິງຫາ 2021 ນີ້ທີ່ສະໂມສອນຂອງໂຮງໝໍ 107 ໂດຍການເປັນປະທານ ຂອງສະຫາຍ ພົນຕີ ຄໍາເພັດ ສີຊານົນ ກໍາມະການຄະນະປະຈໍາພັກກະຊວງປ້ອງກັນປະເທດ ຫົວໜ້າກົມໃຫ່ຍພະລາທິການກອງທັບ, ມີສະຫາຍ ພັນເອກ ວິລະໄຊ ສົມສັກ ຮອງຫົວໜ້າກົມໂຄສະນາອົບຮົມກົມໃຫ່ຍການເມືອງກອງທັບ, ມີສະຫາຍ ພັນເອກ ໄພວັນ ຈັນທະສຸກ ເລຂາຄະນະພັກຮາກຖານອໍານວຍການໂຮງໝໍບໍລິເວນ 107. ມີຄະນະພັກ – ຄະນະບັນຊາ, ແຂກຖືກເຊີນພະແນກການ, ກົມກອງອ້ອມຂ້າງແຂວງກໍາລັງຫຼວງ, ກໍາລັງທ້ອງຖິ່ນຕະຫຼອດພະນັກງານຫຼັກແຫຼ່ງພາຍໃນໂຮງບໍລິເວນ 107 ເຂົ້າຮ່ວມ.

ສະຫາຍ ພັນເອກ ຍຸຄອນ ຜາລີເພັງ ຮອງເລຂາຄະນະພັກຮາກຖານໜ້າການເມືອງໂຮງໝໍ 107 ໄດ້ຜ່ານບົດສະຫຼຸບຜົນການສ້າງນັກຮົບ ແລະ ກົມກອງວັດທະນະທໍາປະຈໍາປີ 2021. ການປັບປຸງກໍ່ສ້າງກົມກອງວັດທະນະທໍາ ໃຫ້ມີແບບແຜນທັນສະໄໝ ຂອງໂຮງໝໍບໍລິເວນ 107 ຕັ້ງຢູ່ບ້ານຜາສຸກ ໃຈກາງເທດສະບານ ນະຄອນຫຼວງພະບາງ , ທິດຕາເວັນອອກຕິດກັບບ້ານຜານົມ, ທິດຕາເວັນຕົກຕິດກັບບ້ານພັນຫຼວງ, ທິດເໜືອຕິດກັບບ້ານຫາດຮ່ຽນ ແລະ ທິດໃຕ້ຕິດກັບບ້ານເມືອງງາ ໄດ້ຮັບການສ້າງຕັ້ງຂື້ນໃນວັນທີ 24 ພະຈິກ 1973 ເປັນໂຮງໝໍປ້ອມໝັ້ນຂອງກອງບັນຊາການທະຫານປະສົມຝ່າຍແນວລາວຮັກຊາດ ຢູ່ບ້ານນາຫຼວງ ແຂວງຫຼວງພະບາງ ແລະ ໄດ້ມີການເຕີບໃຫ່ຍຂະຫຍາຍຕົວຕາມແຕ່ລະໄລຍະຈາກໂຮງໝໍນ້ອຍບັນຈຸຕຽງນອນ 15 ຕຽງ, ຂື້ນເປັນ 30 ຕຽງ ແລະ ຂະຫຍາຍຂື້ນເລື້ອຍໆ.

ມາຮອດວັນທີ 5 ກຸມພາ 2001 ຈຶ່ງໄດ້ຮັບການປັບປຸງຈາກຂັ້ນເທິງຂະຫຍາຍເປັນໂຮງໝໍ 150 ຕຽງ ແລະ ປະກາດເປັນໂຮງໝໍບໍລິເວນພາກເໜືອ, ມີ 6 ແຂວງ ແລະ 2 ກອງພົນເຂົ້າມາປິ່ນປົວໃຊ້ບໍລິການ,ຕະຫຼອດຮອດປະຊາຊົນບັນດາເຜົ່າ, ນໍາໃຊ້ເຕັກນິກການແພດເຂົ້າໃນວຽກງານແກ້ໄຂສຸກເສີນຄົນເຈັບ, ກວດພະຍາດ, ບົ່ງມະຕິພະຍາດ,ໃຫ້ຊັດເຈນວ່ອງໄວ, ວາງທິດທາງປິ່ນປົວພະຍາດໃຫ້ຖືກຕ້ອງສົມເຫດ, ສົມຜົນຫາຍດີໄວຟື້້ນຟູສຸຂະພາບໃຫ້ຜູ້ບາດເຈັບ ແລະ ເຈັບປ່ວຍກັບຄືນສູ່ສະພາບປົກກະຕິ, ສູ້ຊົນຫຼຸດຜ່ອນອັດຕາສ່ວນພິການ, ເສຍອົງຄະ,ເສຍຊີວິດໃຫ້ຕໍ່າທີ່ສຸດ. ບໍາລຸງກໍ່ສ້າງພະນັກງານການແພດ, ຝຶກອົບຮົມດ້ານວິທະຍາສາດການແພດຕາມການມອບໝາຍຂອງຂັ້ນເທິງ, ດໍາເນີນການຄົ້ນຄ້ວາວິທະຍາສາດການແພດເພື່ອຍົກລະດັບຄວາມຮູ້, ຄວາມສາມາດທາງດ້ານເຕັກນິກວິຊາການຢ່າງບໍ່ຢຸດຢັ້ງ,ໂດຍສົມທົບກັບບົດຮຽນຕົວຈິງໃນການປິ່ນປົວສ້າງເປັນບົດຄົ້ນຄ້ວາວິທະຍາສາດ, ເອກະສານການແພດ, ຈັດຕັ້ງກອງປະຊຸມວິທະຍາສາດການແພດທີ່ເໝາະສົມໃນກອງທັບ, ເປັນກໍາລັງສໍາຮອງກຽມພ້ອມສູ້ຮົບ ແລະ ຮັບໃຊ້ສູ້ຮົບຕາມຄໍາສັ່ງຂອງຂັ້ນເທິງ, ຕ້ານພະຍາດລະບາດ, ໄພພິບັດ ແລະ ເຫດການສຸກເສີນໃນຂົງເຂດຮັບຜິດຊອບ.

ທົ່ວໂຮງໝໍບໍວິເວນ 107 ປະກອບມີ 1 ຄະນະພັກຮາກຖານມີ 8 ໜ່ວຍພັກຂື້ນກັບມີຈໍານວນສະມາຊິກຊາວໜຸ່ມ 207 ສະຫາຍ, ຍິງ 148 ສະຫາຍ, ມີ 21 ພະແນກ, 85 ຂະແໜງທີ່ຂື້ນກັບ, ວຽກງານວັດທະນະທໍາແມ່ນໄດ້ອິງໃສ່ 5 ມາດຖານ ແລະ ໄດ້ຈັດຕັ້ງເຄື່ອນໄຫວໄດ້ເປັນຢ່າງດີການກໍ່ສ້າງຄ້າຍຄູໄດ້ມີການຈັດສັນເປັນລະບຽບຮຽບຮ້ອຍຈົບງາມຕາມແບບສີສັນຂອງກົມກອງທີ່ມີຢູ່ແລ້ວຄື. ມີເຮືອນນອນໂສດແບບຖາວອນ ຈໍານວນ 3 ຫຼັງ, ມີເຮືອນຄົວກິນເຂົ້າ 1 ຫຼັງ, ເຮືອນຄົວແຕ່ງກິນລະບົບອາຍນໍ້າ 1 ຫຼັງ, ມີຫ້ອງການຖາວອນ 1 ຫຼັງ 2 ຊັ້ນ, ມີສະໂມສອນ 1 ຫຼັງ, ມີຫ້ອງນໍ້າຖາວອນ 21 ພະແນກການ, 85 ຂະແໜງການຈໍານວນ 15 ຫຼັງ, ແລະ ອື່ນໆ ທີ່ເປັນລະບົບແໜ້ນໜາຖາວອນຢູ່ໃນຄ້າຍຄູສາມາດສະໜອງພຶດຜັກເຂົ້າເຮືອນຄົວລວມໄດ້ 4.032 ກິໂລ, ເປັນເງິນ 24.192.000 ກີບ. ເອົາປາອອກຂາຍໄດ້ 375 ກິໂລເປັນເງິນ 9.375.000 ກີບ. ລາຍໄດ້ເພີ່ມຂອງກົມກອງຮັບຈາກການຝາກລົດໄດ້ 28.000.000 ກີບ. ແລະ ທິດທາງແຜນການຄາດໝາຍສູ້ຊົນໃນຕໍ່ໜ້າ ເພື່ອເຮັດໃຫ້ວຽກງານມີປະສິດທິຜົນສູງຂື້ນ ແລະ ບັນລຸໄດ້ຕາມລະດັບຄາດໝາຍ.

ຈາກນັ້ນ ສະຫາຍ ພັນໂທ ທອງອ້ວນ ຄໍາວັນທອງ ຮອງຫົວໜ້າຫ້ອງການເມືອງກົມໃຫ່ຍພະລາທິການກອງທັບ ກໍ່ໄດ້ຜ່ານຂໍ້ຕົກລົງຮັບຮອງກອງວັດທະນະທໍາຂອງກົມໂຄສະນາອົບຮົມກົມໃຫ່ຍການເມືອງກອງທັບ, ໃນໂອກາດດັ່ງກ່າວຕາງໜ້າ 8 ໜ່ວຍຂອງໂຮງໝໍບໍລິເວນ 107 ກໍ່ໄດ້ຂື້ນມາຮັບໃບຢັ້ງຍືນໜ່ວຍພັກວັດທະນະທໍາ. ໂດຍແມ່ນ ສະຫາຍ ພັນເອກ ວິລະໄຊ ສົມສັກ ຮອງຫົວໜ້າກົມໂຄສະນາອົບຮົມກົມໃຫ່ຍການເມືອງກອງທັບເປັນຜູ້ໃຫ້ກຽດຂື້ນມອບໃບຢັ້ງຍືນດັ່ງກ່າວ. ໃນພິທີ ສະຫາຍ ພົນຕີ ຄໍາເພັດ ສີຊານົນ ກໍາມະການຄະນະປະຈໍາພັກກະຊວງປ້ອງກັນປະເທດ ຫົວໜ້າກົມໃຫ່ຍພະລາທິການກອງທັບກໍ່ໄດ້ໃຫ້ກຽດຂື້ນມອບໃບຢັ້ງຍືນການສ້າງນັກຮົບ ແລະ ກົມກອງວັດທະນະທໍາ ໂດຍແມ່ນ ສະຫາຍ ພັນໂທ ສີແພງ ມີລາຈັນ ຄະນະພັກຮາກຖານ ຫົວໜ້າພະແນກການເມືອງໂຮງໝໍດັ່ງກ່າວເປັນຜູ້ກ່າວຮັບຢ່າງສົມກຽດ.