ພິທີປະກາດແຕ່ງຕັ້ງຫົວໜ້າຄະນະປ້ອງກັນຊາດ – ປ້ອງກັນຄວາມສະຫງົບ ແຂວງຫຼວງພະບາງ ຈັດຂື້ນຕອນເຊົ້າຂອງວັນທີ 12 ມີນາ 2021 ນີ້ ຢູ່ທີ່ຫ້ອງປະຊຸມຂອງຫ້ອງເຕັກນິກທະຫານແຂວງ ໂດຍການເປັນປະທານຂອງ ສະຫາຍ ພັນເອກ ວິລ່ຽມ ວົງທິສານ ຮອງເລຂາຄະນະພັກ ຫົວໜ້າການທະຫານກອງບັນຊາການທະຫານແຂວວງຫຼວງພະບາງ, ເປັນກຽດເຂົ້າຮ່ວມມີ ສະຫາຍ ພັນເອກ ທອງບຸນ ຂຸນລະພິດ ຮອງຫົວໜ້າຫ້ອງການປ້ອງກັນຊາດ – ປ້ອງກັນຄວາມສະຫງົບສູນກາງ, ມີຕາງໜ້າຫ້ອງວ່າການປົກຄອງແຂວງ, ຄະນະຈັດຕັ້ງແຂວງ, ຄະນະພັກກອງບັນຊາການ ແລະ ອົງການກ່ຽວຂ້ອງເຂົ້າຮ່ວມ.
ໂອກາດນີ້ ສະຫາຍ ພັນໂທ ສົມໃຈ ສີສະຫວັດ ຄະນະພັກກອງບັນຊາການ ຮອງຫົວໜ້າຫ້ອງການເມືອງທະຫານແຂວງ ໄດ້ຂື້ນຜ່ານຂໍ້ຕົກລົງຂອງກະຊວງປ້ອງກັນປະເທດເລກທີ 3862/ກປທ,ລົງວັນທີ 22 ກັນຍາ 2020 ວ່າດ້ວຍການອະນຸຍາດໃຫ້ນາຍທະຫານຢູ່ກອງບັນຊາການທະຫານແຂວງຫຼວງພະບາງ ພັກການເພື່ອກຽມຮັບບໍານານ. ອີງຕາມກົດໝາຍນາຍທະຫານກອງທັບປະຊາຊົນລາວ( ສະບັບປັບປຸງ ) ໃນພາກທີ III ໝວດທີ 1 ມາດຕາ 33 ວ່າດ້ວຍອາຍຸກະສຽນຮັບເບ້ຍບໍານານຂອງນາຍທະຫານ ກະຊວງປ້ອງກັນປະເທດຕົກລົງໃຫ້ ສະຫາຍ ພັນໂທ ບຸນທະວີ ວິລະພົນ ຫົວໜ້າຫ້ອງການ ປກຊ – ປກສ ແຂວງຫຼວງພະບາງ ພັກການເພື່ອກຽມຮັບເບ້ຍບໍານານ.

ໃນພິທີ ສະຫາຍ ພັນໂທ ບຸນທະວີ ວິລະພົນ ໄດ້ຂື້ນຜ່ານບົດສະຫຼຸບການຈັດຕັ້ງປະຕິບັດໜ້າທີ່ວຽກງານຂອງຫ້ອງການຄະນະກໍາມະການ ປກຊ – ປກສ ແຂວງຫຼວງພະບາງ ຕະຫຼອດໄລຍະ 13 ປີຜ່ານມາໂດຍຫຍໍ້ວ່າ: ຫ້ອງການຄະນະກໍາມະການ ປກຊ – ປກສ ແຂວງຫຼວງພະບາງ ໄດ້ຮັບການສ້າງຕັ້ງຂື້ນຕາມມະຕິຕົກລົງຂອງກົມການເມືອງສູນກາງພັກໃນປີ 1991 ຂື້ນກັບຫ້ອງວ່າການປົກຄອງແຂວງ ແລະ ພາຍໃຕ້ການຊີ້ນໍາໂດຍກົງຮອບດ້ານຂອງເລຂາພັກແຂວງ, ເຈົ້າແຂວງ ແລະ ຄະນະປະຈໍາພັກແຂວງ, ຈັດຕັ້ງເປັນໜ່ວຍພັກ, ຈຸພັກຂື້ນກັບຄະນະພັກຮາກຖານຫ້ອງວ່າການປົກຄອງແຂວງ ເຮັດໜ້າທີ່ເປັນເສນາທິການດ້ານຂໍ້ມູນຂ່າວສານວຽກງານ ປກຊ – ປກສ ຢູ່ຂັ້ນແຂວງ ແລະ ເປັນຂົວຕໍ່ໃຫ້ຫ້ອງການຄະນະກໍາມະການ ປກຊ – ປກສ ສູນກາງ, ບົດສະຫຼຸບຍັງຍົກໃຫ້ເຫັນທີ່ຕັ້ງ, ຈຸດພິເສດ, ວຽກງານທີ່ເຮັດໄດ້ທໂດຍປິ່ນອ້ອມພາລະບົດບາດ, ສິດ ແລະ ໜ້າທີ່ຂອງວຽກງານ ປກຊ – ປກສ ຂັ້ນແຂວງ, ພ້ອມທັງຍົກໃຫ້ເຫັນວຽກງານທີ່ຍັງຄ້າງຄາທີ່ຈະສືບຕໍ່ຈັດຕັ້ງປະຕິບັດ ແລະ ວຽກງານອື່ນໆຕື່ມອີກຈໍານວນໜຶ່ງ ເພື່ອເຮັດໃຫ້ຜູ້ສືບຖອດໄດ້ສືບຕໍ່ຈັດຕັ້ງປະຕິບັດຢ່າງມີຜົນສໍາເລັດ. ຈາກນັ້ນ ສະຫາຍ ພັນເອກ ທອງບຸນ ຂຸນລະພິດ ຮອງຫົວໜ້າຫ້ອງການປ້ອງກັນຊາດ – ປ້ອງກັນຄວາມສະຫງົບສູນກາງໄດ້ຂື້ນຜ່ານຂໍ້ຕົກລົງຂອງຄະນະກໍາມະການ ປ້ອງກັນຊາດ – ປ້ອງກັນຄວາມສະຫງົບ ສູນກາງ ເລກທີ 40/ຄ.ປກຊ-ປກສ, ລົງວັນທີ 11 ທັນວາ 2020 ວ່າດ້ວຍການແຕ່ງຕັ້ງຫົວໜ້າຫ້ອງການຄະນະກໍາມະການ ປກຊ – ປກສ ແຂວງຫຼວງພະບາງ ອີງຕາມກົດໝາຍນາຍທະຫານກອງທັບປະຊາຊົນລາວ ( ສະບັບປັບປຸງປີ 2018 ) ໃນໝວດທີ IV ມາດຕາ 26 ວ່າດ້ວຍການແຕ່ງຕັ້ງ ແລະ ຍົກຍ້າຍນາຍທະຫານ ເຊິ່ງໃນນີ້ ແມ່ນໄດ້ແຕ່ງຕັ້ງ ສະຫາຍ ພັນໂທ ໄມທົນ ຈັນດາລາ ຫົວໜ້າໜ່ວຍງານ 303 ຂອງກອງບັນຊາການທະຫານແຂວງຫຼວງພະບາງ ເປັນຫົວໜ້າຫ້ອງການຄະນະກໍາມະການ ປກຊ – ປກສ ແຂວງຫຼວງພະບາງ.
ຕອນທ້າຍພິທີ ສະຫາຍ ພັນເອກ ວິລ່ຽມ ວົງທິສານ ໄດ້ມີຄໍາເຫັນໂອ້ລົມກ່າວວ່າ: ການແຕ່ງຕັ້ງໜ້າທີ່ໃໝ່ໃຫ້ນາຍທະຫານແມ່ນຄວາມຮຽກຮ້ອງຕ້ອງການຂອງໜ້າທີ່ການເມືອງ, ແມ່ນກົດເກນພາວະວິໄສ ແຫ່ງການເຕີບໃຫຍ່ຂະຫຍາຍຕົວຂອງກໍາລັງປະກອບອາວຸດ, ພະນັກງານທີ່ໄດ້ຮັບການແຕ່ງຕັ້ງຮັບໜ້າທີ່ໃໝ່ ຈະຕ້ອງໄດ້ຕັ້ງໜ້າຝຶກຝົນຫຼໍ່ຫຼອມຕົນເອງ ດ້ານຄຸນທາດການເມືອງ, ຄຸນສົມບັດສິນທໍາປະຕິວັດ, ພ້ອມນີ້ກໍ່ຕ້ອງກໍາແໜ້ນລະບຽບກົດໝາຍຂອງລັດ, ແນວທາງຂອງພັກ ໂດຍສະເພາະແມ່ນແນວທາງປ້ອງກັນຊາດ – ປ້ອງກັນຄວາມສະຫງົບ, ຕິດພັນກັບການຈັດຕັ້ງປະຕິບັດ 7 ລະບອບ 18 ວຽກຂອງກອງທັບໃຫ້ເຂັ້ມງວດ. ໄປພ້ອມກັບການປັບປຸງວິທີເຮັດວຽກໃຫ້ມີແບບແຜນທີດີ, ເຮັດວຽກເປັນໝູ່ຄະນະ ແບ່ງບຸກຄົນຮັບຜິດຊອບ, ສືບຕໍ່ເຊີດຊູ ແລະ ເສີມຂະຫຍາຍມູນເຊື້ອຄວາມສາມັກຄີພາຍໃນ, ພາຍນອກໃຫ້ແໜ້ນກວ້າງຂວາງ, ເອົາໃຈໃສ່ສ້າງໃຫ້ໄດ້ພະນັກງານ 3 ຮຸ້ນ ແລະ ກໍ່ສ້າງພັກຕາມ 5 ຫຼັກການ 3 ທິດນໍາ, ຕິດພັນກັບການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຢ່າງມີຜົນສໍາເລັດ.
ໂດຍ: ສົມພອນ ສຸວັນທອນ.