ມີເດຍລາວແຂວງຫຼວງພະບາງ ໂດຍ: ສົມພອນ ສຸວັນທອນ.
ພິທີປະກາດແຕ່ງຕັ້ງຮອງຫົວໜ້າການທະຫານ ແລະ ຫົວໜ້າຫ້ອງເສນາທິການທະຫານແຂວງຫຼວງພະບາງ ໄດ້ຈັດຂື້ນຕອນບ່າຍຂອງວັນທີ 28 ມີຖຸນາ 2021 ນີ້ ໂດຍການເປັນປະທານຂອງ ທ່ານ ພົນໂທ ທອງລອຍ ສີລິວົງ ກໍາມະການສູນກາງພັກ, ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ການເມືອງກອງທັບ, ເປັນກຽດເຂົ້າຮ່ວມມີ ທ່ານ ມອນໄຊ ລາວມົວຊົ່ງ ກໍາມະການສໍາຮອງສູນກາງພັກ, ຮອງເຈົ້າແຂວງຫຼວງພະບາງ, ມີຕາງໜ້າກົມພະນັກງານ, ມີຄະນະພັກ – ຄະນະບັນຊາກອງບັນຊາການທະຫານແຂວງ, ພະແນກການອ້ອມຂ້າງແຂວງ, ອົງການ 5 ຫ້ອງ,ພະແນກການທີ່ກ່ຽວຂ້ອງ ແລະ ພະນັກງານຫຼັກແຫຼ່ງກົມກອງທົ່ວທະຫານແຂວງເຂົ້າຮ່ວມ.

ໂອກາດນີ້ ທ່ານ ພົນຈັດຕະວາ ພູມີ ດາລາເພັດ ຄະນະພັກກະຊວງປ້ອງກັນປະເທດ, ຫົວໜ້າກົມພະນັກງານ, ກົມໃຫຍ່ການເມືອງກອງທັບ ໄດ້ຂື້ນຜ່ານຂໍ້ຕົກລົງຂອງກະຊວງປ້ອງກັນປະເທດເລກທີ 1843/ກປທ, ລົງວັນທີ 30 ມີນາ 2021 ວ່າດ້ວຍການອະນຸຍາດໃຫ້ນາຍທະຫານ ຢູ່ກອງບັນຊາການທະຫານແຂວງຫຼວງພະບາງ ພັກການເພື່ອກຽມຮັບບໍານານ. ອີງຕາມກົດໝາຍນາຍທະຫານກອງທັບປະຊາຊົນລາວ (ສະບັບປັບປຸງ) ໃນພາກທີ III ໝວດທີ 1 ມາດຕາ 33 ວ່າດ້ວຍອາຍຸກະສຽນຮັບເບ້ຍບໍານານຂອງນາຍທະຫານ ແລະ ອີງຕາມການຕົກລົງເປັນເອກະພາບຂອງຄະນະປະຈໍາພັກກະຊວງປ້ອງກັນປະເທດ ຄັ້ງວັນທີ 16 ມີຖຸນາ 2021. ກະຊວງປ້ອງກັນປະເທດ ຕົກລົງ: ອະນຸຍາດໃຫ້ສະຫາຍ ພັນເອກ ອຸ່ນເຮືອນ ເຮືອງບົວສອນ ຮອງການທະຫານ ຫົວໜ້າຫ້ອງເສນາທິການທະຫານແຂວງຫຼວງພະບາງ ພັກການເພື່ອກຽມຮັບຮັບເບ້ຍບໍານານ. ພິທີຍັງໄດ້ຜ່ານຂໍ້ຕົກລົງຂອງກະຊວງປ້ອງກັນປະເທດ ເລກທີ 1831/ກປທ, ລົງວັນທີ 30 ມີນາ 2021 ວ່າດ້ວຍການແຕ່ງຕັ້ງຮອງການທະຫານ ກອງບັນຊາການທະຫານແຂວງຫຼວງພະບາງ ອີງຕາມກົດໝາຍນາຍທະຫານກອງທັບປະຊາຊົນລາວ (ສະບັບປັບປຸງ) ໃນພາກທີ II ໝວດທີ 4 ມາດຕາ 26 ວ່າດ້ວຍການແຕ່ງຕັ້ງ, ຍົກຍ້າຍນາຍທະຫານ ໂດຍປະຕິຕາມທິດທາງກ່ຽວກັບການປັບປຸງບູລະນະການຈັດຕັ້ງນໍາພາ – ບັນຊາ ໃນກໍາລັງປະກອບອາວຸດໃຫ້ເຂັ້ມແຂງ, ໜັກແໜ້ນຮອບດ້ານ ເພື່ອເຮັດສໍາເລັດໜ້າທີ່ປົກປັກຮັກສາ ແລະ ພັດທະນາປະເທດຊາດ ກະຊວງປ້ອງກັນປະເທດຕົກລົງ ແຕ່ງຕັ້ງ ສະຫາຍ ພັນໂທ ຄໍາສອນ ໂພທິວັນ ເປັນຮອງຫົວໜ້າການທະຫານ ແລະ ທັງເປັນຫົວໜ້າຫ້ອງເສນາທິການທະຫານແຂວງຫຼວງພະບາງຕື່ມອີກ.

ຕອນທ້າຍພິໄດ້ຮັບຟັງການໂອ້ລົມຊີ້ນໍາຂອງ ທ່ານ ພົນໂທ ທອງລອຍ ສີລິວົງ ກໍາມະການສູນກາງພັກ, ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ການເມືອງກອງທັບ ເຊີ່ງໄດ້ຍ້ອງຍໍຊົມເຊີຍຕໍ່ຜົນງານ ແລະ ຄຸນງາມຄວາມດີຂອງພະນັກງານທີ່ຮັບນະໂຍບາຍພັກການຮັບເບ້ຍບໍານານ ທີ່ໄດ້ອຸທິດເລືອດເນື້ອເຫື່ອແຮງ ແລະ ສະຕິປັນຍາປະກອບສ່ວນເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດຢ່າງມີຜົນສໍາເລັດ,

ພ້ອມທັງເນັ້ນໜັກໃຫ້ສືບຕໍ່ເປັນທີປຶກສາຊີ້ນຳ – ນຳພາ, ສຶກສາອົບຮົມການເມືອງນໍາພາແນວຄິດໃຫ້ແກ່ພະນັກງານ – ນັກຮົບ ແລະ ລູກຫຼານ ເຮັດໃຫ້ເຂົາເຈົ້າໄດ້ຮັບຮູ້ ແລະ ເຂົ້າແຈ້ງຕໍ່ແນວທາງປ່ຽນແປງໃໝ່ຂອງພັກ, ສືບຕໍ່ເປັນຫຼັກແຫຼ່ງແກ່ນສານໃນຮາກຖານທ້ອງຖິ່ນໃນການເຄື່ອນໄຫວເຮັດວຽກງານປ້ອງກັນຊາດ ແນໃສ່ເຮັດໃຫ້ຂອບເຂດແຂວງຫຼວງພະບາງມີຄວາມະຫງົບປອດໄພໂດຍພື້ນຖານ. ຕໍ່ກັບພະນັກງານທີ່ໄດ້ຮັບການແຕ່ງຕັ້ງມອບໝາຍຮັບໜ້າທີ່ໃໝ່ ຈົງສືບຕໍ່ຝຶກຝົນຫຼໍ່ຫຼອມຕົນທາງດ້ານຄວາມຮູ້ຄວາມສາມາດ, ຄຸນສົມບັດ, ສິນທໍາປະຕິວັດ ແລະ ປັບປຸງວິທີເຮັດວຽກ, ແບບແຜນຊີ້ນໍາ – ບັນຊາໃຫ້ມີຄວາມກ້າວໜ້າທັນສະໄໝ, ບົນພື້ນຖານແມ່ນຕ້ອງເສີມຂະຫຍາຍຄວາມສາມັກຄີພາຍໃນໃຫ້ເປັນປຶກແຜນແໜ້ນໜາ, ເປັນແບບຢ່າງທີ່ດີໃນການປະຕິບັດຂໍກໍານົດກົດລະບຽບຂອງພັກ, ລະບຽບວິໄນຂອງກອງກອງທັບ ແລະ ລະບຽບກົດໝາຍຂອງລັດໃຫ້ເຂັ້ມງວດ, ເອົາໃຈໃສ່ປັບປຸງກົມກອງໃຫ້ມີຄວາມປອດໃສ່, ເຂັ້ມແຂງ ແລະ ໜັກແໜ້ນຢ່າງຕໍ່ເນື່ອງ. ພິທີຍັງໄດ້ມອບເງິນສົດຈຳນວນ 10.000.000ກີບເພື່ອຊຸກເຂົ້າໃນການປັບປຸງກໍ່ສ້າງກົມຕື່ມອີກ.