ມີເດຍລາວແຂວງບໍລິຄຳໄຊ
ພິທີປະກາດແຕ່ງຕັ້ງປະທານ, ຮອງປະທານ ແລະ ກຳມະການ ປກຊ-ປກສ ແຂວງບໍລິຄຳໄຊ ໄດ້ຈັດຂຶ້ນໃນວັນທີ 17 ມີນາ 2021 ຢ່ຫ້ອງປະຊຸມຫ້ອງວ່າການແຂວງ ໃຫ້ກຽດເຂົ້າຮ່ວມໂດຍ ສະຫາຍ ພົນເອກ ຈັນສະໝອນ ຈັນຍາລາດ ກຳມະການກົມການເມືອງສູນກາງພັກ ຮອງປະທານຜູ້ປະຈຳການ ປກຊ-ປກສ ສູນກາງ, ລັດຖະມົນຕີກະຊວງປ້ອງກັນປະເທດ, ມີຄະນະພັກກະຊວງປ້ອງກັນປະເທດ, ຄະນະບໍລິຫານງານພັກແຂວງ, ຄະນະບັນຊາກຳລັງ ປກຊ-ປກສ ແລະ ພະນັກງານຫຼັກແຫຼ່ງອ້ອມຂ້າງແຂວງ ເຂົ້າຮ່ວມ.
ໃນພິທີ ໄດ້ຮັບຟັງການຜ່ານມະຕິຕົກລົງ ຂອງຄະນະເລຂາທິການສູນກາງພັກ ສະບັບເລກທີ 17/ຄລສພ, ລົງວັນທີ 10 ກຸມພາ 2021 ວ່າດ້ວຍການແຕ່ງຕັ້ງ ຄະນະກຳມະການ ປ້ອງກັນຊາດ-ປ້ອງກັນຄວາມສະຫງົບ ແຂວງບໍລິຄຳໄຊ ຄະນະເລຂາທິການສູນກາງພັກ ຕົກລົງແຕ່ງຕັ້ງ ສະຫາຍ ກອງແກ້ວ ໄຊສົງຄາມ ເປັນປະທານ ຄະນະກຳມະການ ປກຊ-ປກສ ແຂວງ, ສະຫາຍ ສຸວັນນີ ໄຊຊະນະ ເປັນຮອງປະທານ, ສະຫາຍ ພົນຈັດຕະວາ ຈວງຈັນ ລາດຊະວົງ ເປັນຮອງປະທານ ຜູ້ປະຈຳການ ຄະນະກຳມະການ ປກຊ-ປກສ ແຂວງ, ສະຫາຍ ວັນວິໄລ ແດນພູຫຼວງ, ສະຫາຍ ບຸນສົງ ເພັດຈະເລີນ, ສະຫາຍ ພັນເອກ ກົງຈັນ ໄຊປັນຍາ, ສະຫາຍ ພັນເອກ ແສງທອງ ດວງວິໄລ, ສະຫາຍ ພັນເອກ ຄຳແດງ ແພງພົງພັນ ແລະ ສະຫາຍ ພັນເອກ ດວງສີ ພັນທະວົງ ເປັນກຳມະການ ຄະນະກຳມະການ ປກຊ-ປກສ ແຂວງບໍລິຄຳໄຊ.

ສະຫາຍ ພົນເອກ ຈັນສະໝອນ ຈັນຍາລາດ ໄດ້ໃຫ້ກຽດໂອ້ລົມ ແລະ ໃຫ້ທິດຊີ້ນຳ ໂດຍສະຫາຍໄດ້ເນັ້ນຫຼາຍວຽກງານສຳຄັນ ເປັນຕົ້ນແມ່ນ ໃຫ້ຍົກສູງການສຶກສາອົບຮົມການເມືອງ-ແນວຄິດ ໃຫ້ໜັກແໜ້ນ, ທົ່ວເຖິງ ແລະ ເລິກເຊີ່ງລົງສູ່ຮາກຖານທ້ອງຖີ່ນ ໂດຍສະເພາະ ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ສະໄໝທີ XI ຂອງພັກ ເຮັດໃຫ້ເປັນສະຕິ, ເປັນຂະບວນການ ແລະ ເປັນການເຄື່ຶອນໄຫວ ທີ່ໄດ້ຮັບໝາກຜົນຕົວຈິງ, ຢຶດໝັ້ນ ແລະ ປະຕິບັດແນວທາງ ປກຊ-ປກສ ທົ່ວປວງຊົນຮອບດ້ານ ໃຫ້ເລິກເຊິ່ງ, ເຖິງຖອງ, ຕັ້ງໜ້າກໍ່ສ້າງກຳລັງປະກອບອາວຸດປະຕິວັດຂອງປະຊາຊົນ ໃຫ້ໜັກແໜ້ນ, ເຂັ້ມແຂງ ແລະ ມີແບບແຜນທັນສະໄໝ, ເພີ່ມທະວີການນຳພາ-ຊີ້ນຳ ຂອງຄະນະໂດຍກົງ, ລວມສູນເປັນເອກະພາບ ແລະ ຮອບດ້ານຕໍ່ກຳລັງ ປກຊ-ປກສ ທີ່ຢູ່ໃນຄວາມຮັບຜິດຊອບ, ແກ້ໄຂບັນດາປະກົດການຫຍໍ້ທໍ້ທີ່ເກີດຂຶ້ນພາຍໃນແຂວງ, ສະກັດກັ້ນ, ທັບມ້າງກົນອຸບາຍ, ຕ້ານການເຄື່ອນໄຫວຂອງອິດທິກຳລັງປໍລະປັກ ແລະ ກຸ່ມຄົນທີ່ບໍ່ຫວັງດີ, ໜໍ່ແໜງທີ່ພາໃຫ້ເກີດມີຄວາມບໍ່ສະຫງົບ, ເພີ່ມທະວີສຸມທຸກກຳລັງແຮງທົ່ວສັງຄົມ ເພື່ອຮັບປະກັນໃຫ້ແຂວງສືບຕໍ່ມີສະຖຽນລະພາບທາງດ້ານການເມືອງ ແລະ ຄວາມໝັ້ນຄົງທີ່ໜັກແໜ້ນ, ມີຄວາມສະຫງົບປອດໄພ ແລະ ຄວາມເປັນລະບຽບຮຽບຮ້ອຍໃນທົ່ວສັງຄົມ.