ມີເດຍລາວແຂວງສາລະວັນ ໂດຍ: ກິນດາວັນ ອ້ວນນາຄູ ໂດຍປະຕິບັດຕາມມະຕິ ຂອງຄະນະປະຈໍາສະພາແຫ່ງຊາດ ເລກທີ 113/ຄປຈ, ສະບັບລົງວັນທີ 6 ພຶດສະພາ 2021 ວ່າດ້ວຍການໂຍກຍ້າຍພະນັກງານຂອງສານປະຊາຊົນແຂວງສາລະວັນ, ອີງຕາມຂໍ້ຕົກລົງຂອງປະທານສານປະຊາຊົນສູງສຸດ ເລກທີ 177/ສປສສ, ສະບັບລົງວັນທີ 6 ພຶດສະພາ 2021 ວ່າດ້ວຍ: ການແຕ່ງຕັ້ງຜູ້ຮັກສາການປະທານສານປະຊາຊົນແຂວງສາລະວັນ

ທ່ານ ສາກົນ ໄຊຍະລາດ ຮອງຫົວໜ້າກົມຈັດຕັ້ງ-ພະນັກງານສານປະຊາຊົນສູງສຸດແຫ່ງ ສປປ ລາວ ກໍ່ໄດ້ຜ່ານມະຕິ ປະກາດໂຍກຍ້າຍ ທ່ານ ວິໄລ ສີລາດວງໃຈ ກໍາມະການພັກແຂວງ ປະທານສານປະຊາຊົນແຂວງສາລະວັນ (ຜູ້ເກົ່າ) ໄປປະຈໍາການຢູ່ອົງການໄອຍະການປະຊາຊົນແຂວງສາລະວັນ, ແຕ່ງຕັ້ງ ທ່ານ ສົມຫວັງ ມະນີແສງ ຮອງປະທານສານປະຊາຊົນ ເປັນ ຜູ້ຮັກສາການປະທານສານປະຊາຊົນແຂວງສາລະວັນ, ຈາກນັ້ນກໍໄດ້ມີການມອບມະຕິຕົກລົງຂອງຄະນະປະຈໍາສະພາແຫ່ງຊາດ ແລະ ຂໍ້ຕົກລົງ ໃຫ້ປະທານສານປະຊາຊົນແຂວງ(ຜູ້ເກົ່າ-ຜູູ້ໃໝ່)ມອບໂດຍ ທ່ານ ຄໍາພັນ ບຸນພາຄົມ ຮອງປະທານສານປະຊາຊົນສູງສຸດ ແຫ່ງ ສປປ ລາວ.

ພິທີດັ່ງກ່າວໄດ້ຈັດຂຶ້ນໃນວັນທີ 30 ມິຖຸນາ 2021 ຢູ່ທີ່ຫ້ອງປະຊຸມຂອງພະແນກພາຍໃນແຂວງ ໃຫ້ກຽດເປັນປະທານ ໂດຍ ທ່ານ ສີເຮັງ ຫອມສົມບັດ ຮອງເລຂາພັກແຂວງ, ປະທານສະພາປະຊາຊົນແຂວງສາລະວັນ, ທ່ານ ຄໍາພັນ ບຸນພາຄົມ ຮອງປະທານສານປະຊາຊົນສູງສຸດແຫ່ງ ສປປ ລາວ, ມີບັນດາທ່ານແຂກຖືກເຊີນຈາກພະແນກການທີ່ກ່ຽວຂ້ອງອ້ອມຂ້າງແຂວງ, ມີພະນັກງານສານປະຊາຊົນແຂວງ, ສານປະຊາຊົນເຂດ1, ເຂດ2 ແລະເຂດ3 ເຂົ້າຮ່ວມ.