ມີເດຍລາວແຂວງເຊກອງ ພາບ-ຂ່າວ: ພຸດທະສອນ ໃນຕອນແລງວັນທີ 28 ມິຖຸນາ ຜ່ານມາ ທີ່ຫ້ອງປະຊຸມທະນາຄານການຄ້າຕ່າງປະເທດລາວ ມະຫາຊົນ (ທຄຕລ) ສາຂາແຂວງເຊກອງ ໄດ້ມີພິທີມອບ-ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຄັ້ງທີ III ປະຈໍາປີ 2020 ໃຫ້ໜ່ວຍພັກຮາກຖານ ທຄຕລ ສາຂາແຂວງເຊກອງ, ໃຫ້ກຽດເຂົ້າຮ່ວມມີສະຫາຍ ບຸນຫຼາຍ ບຸດທິ ກໍາມະການປະຈໍາພັກແຂວງ, ຫົວໜ້າຄະນະຈັດຕັ້ງແຂວງ; ມີຄະນະໜ່ວຍພັກ, ສະມາຊິກພັກໃນໜ່ວຍ ແລະແຂກຖືກເຊີນຈາກຂະແໜງການທີ່ກ່ຽວຂ້ອງ ເຂົ້າຮ່ວມ.

ໃນພິທີ ສະຫາຍ ນາງ ຈັນຖະໜອມ ມູນລາດຊະວົງ ເລຂາໜ່ວຍພັກ, ຫົວໜ້າ ທຄຕລ ສາຂາເຊກອງ ໄດ້ລາຍງານວ່າ: ໜ່ວຍພັກ ທຄຕລ ເປັນໜ່ວຍພັກເອກະລາດ ທີ່ຂຶ້ນກັບອົງຄະນະພັກແຂວງໂດຍກົງ, ໄດ້ຮັບການຈັດຕັ້ງຂຶ້ນຕາມລະບົບກົງຈັກການຈັດຕັ້ງຂອງຫົວໜ່ວຍທຸລະກິດລັດ, ປະຈຸບັນມີຄະນະພັກ 3 ສະຫາຍ, ມີສະມາຊິກພັກທັງໝົດ 14 ສະຫາຍ, ຍິງ 3 ສະຫາຍ, ສະມາຊິກພັກສໍາຮອງ 1 ສະຫາຍ, ຍິງ 1 ສະຫາຍ; ໃນໄລຍະ 1 ປີຜ່ານມາ ຄະນະພັກໄດ້ເອົາໃຈໃສ່ ແລະຖືສໍາຄັນໃນການເຊື່ອມຊຶມບັນດາແນວທາງ ແຜນນະໂຍບາຍ, ມະຕິ. ຄໍາສັ່ງຂອງພັກ ກໍຄືແຜນພັດທະນາເສດຖະກິດ-ສັງຄົມຂອງລັດ ແລະເອກະສານສໍາຄັນຕ່າງໆຂອງພັກ ແລະຂອງຊາດ ໄດ້ທັງໝົດ 29 ຄັ້ງ, ມີຜູ້ເຂົ້າຮ່ວມ 1.073 ເທື່ອສະຫາຍ, ຍິງ 348 ເທື່ອສະຫາຍ, ໄດ້ຫັນແນວທາງນະໂຍບາຍ, ມະຕິຂອງຄະນະພັກຂັ້ນເທິງ ເປັນແຜນການຂອງໜ່ວຍພັກ ທີ່ສອດຄ່ອງກັບໜ້າທີ່ການເມືອງຂອງຕົນ ພ້ອມທັງນໍາພາ-ຊີ້ນໍາຈັດຕັ້ງປະຕິບັດວຽກງານວິຊາສະເພາະໃຫ້ມີຜົນສໍາເລັດ ແລະມີປະສິດທິຜົນ, ເຊິ່ງສາມາດລະດົມເງິນຝາກໄດ້ 225 ຕື້ກີບ, ປະຕິບັດໄດ້ 108%, ຂະຫຍາຍສິນເຊື່ອໄດ້ 121 ບັນຊີ, ມີວົງເງິນ 176 ຕື້ກີບ; ພ້ອມດຽວກັນນີ້ ກໍໄດ້ຜ່ານແຜນການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈໍາປີ 2021 ຕື່ມອີກ.

ຈາກນັ້ນ ສະຫາຍ ກາວິນ ແກ້ວຈັນທະວົງ ຫົວໜ້າຂະແໜງກໍ່ສ້າງພັກ ຄະນະຈັດຕັ້ງແຂວງ ກໍໄດ້ຜ່ານມະຕິຕົກລົງຂອງຄະນະປະຈໍາພັກແຂວງ ສະບັບເລກທີ 57/ຄຈພຂ, ລົງວັນທີ 17 ກຸມພາ 2021 ວ່າດ້ວຍຮັບຮອງໜ່ວຍພັກຮາກຖານ ຄທຕລ ສາຂາແຂວງເຊກອງ ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈໍາປີ 2020 ແລະຮັບຮອງແຜນການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈໍາປີ 2021. ຈາກນັ້ນ ສະຫາຍ ບຸນຫຼາຍ ບຸດທິ ໄດ້ໃຫ້ກຽດຂຶ້ນມອບໃບຢັ້ງຢືນ ແລະກ່າວຮັບແມ່ນສະຫາຍ ນາງ ຈັນຖະໜອມ ມູນລາດຊະວົງ.

ສະຫາຍ ບຸນຫຼາຍ ບຸດທິ ໄດ້ຮຽກຮ້ອງໃຫ້ຄະນະໜ່ວຍພັກ ເອົາໃຈໃສ່ສຶກສາອົບຮົມດ້ານການເມືອງແນວຄິດໃຫ້ສະມາຊິກພັກ, ພະນັກງານພາຍໃນ ທຄຕລ ຢ່າງເປັນປະຈໍາ ແລະຕໍ່ເນື່ອງ, ພ້ອມກັນສືບຕໍ່ຮັກສາມູນເຊື້ອໜ່ວຍພັກ ປອດໃສ ເຂັ້ມແຂງ ໜັກແໜ້ນ ຕິດພັນກັບຄຸນນະພາບ; ເພີ່ມທະວີຄວາມສາມັກຄີພາຍໃຫ້ມີຄວາມໜັກແໜ້ນເຂັ້ມແຂງ, ຕັ້ງໜ້າຈັດຕັ້ງປະຕິບັດແຜນການກໍ່ສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ ໃນປີຕໍ່ໄປ ໂດຍຕິດພັນກັບວຽກງານວິຊາສະເພາະ ໃຫ້ບັນລຸຕາມຄາດໝາຍທີ່ວາງໄວ້.