ວັນທີ 21 ກຸມພາ 2021ນີ້ ເປັນວັນເລືອກຕັ້ງສະມາຊິກສະພາແຫ່ງຊາດ ຊຸດທີ 9 ແລະ ສະມາຊິກສະພາປະຊາຊົນແຂວງຊຸດທີ 2 ແລະ ໄດ້ເປັນເອກະພາບກັນໃນຂອບເຂດທົ່ວປະເທດ. ແມ່ນເຕັມໄປດ້ວຍບັນຍາກາດທີ່ຟົດຟື້ນ ໂດຍມີປະຊາຊົນຜູ້ມີສິດເລືອກຕັ້ງໄດ້ພ້ອມກັນຕື່ນຕົວສະໝັກໃຈອອກມາໃຊ້ສິດປະຊາທິປະໄຕເພື່ອເລືອກເອົາຜູ້ແທນຂອງຕົນຕັ້ງແຕ່ຕອນເຊົ້າໆ ສຳລັບເທດສະບານເມືອງເຊໂປນ ແມ່ນໄດ້ກຳນົດເອົາບ້ານວົງວິໄລ ໜ່ວຍປ່ອນບັດທີ 1 ເປັນຈຸດໃຫຍ່ ແລະ ເປັນຈຸດບ່ອນປ່ອນບັດເລືອກຕັ້ງຂອງການນຳເມືອງ,ໂດຍໄດ້ເລີ່ມເປີດຫີບບັດແຕ່ 7 ໂມງເຊົ້າເປັນຕົ້ນໄປ. ໂດຍເປັນກຽດເຂົ້າຮ່ວມປ່ອນບັດໃນຈຸດດັ່ງກ່າວມີ ທ່ານ ນາງ ຫລິງທອງ ແສງຕະວັນ ກໍາມະການປະຈໍາພັກແຂວງ ຮອງເຈົ້າແຂວງສະຫວັນນະເຂດ ແລະ ທ່ານ ວົງສະຫວັນ ວຽງມະນີ ກໍາມະການພັກແຂວງ ເລຂາພັກເມືອງ ເຈົ້າເມືອງເຊໂປນ ພ້ອມດ້ວຍປະຊາຊົນຜູ້ມີສິດເລືອກຕັ້ງພາຍໃນບ້ານວົງວິໄລກໍ່ໄດ້ມາຮ່ວມໃຊ້ສິດປ່ອນບັດເລືອກຕັ້ງຂອງຕົນຢ່າງພ້ອມພຽງ.

ໃນພິທີເລຂາພັກບ້ານ ນາຍບ້ານວົງວິໄລໄດ້ກ່າວວ່າ: ເພື່ອເຮັດໃຫ້ການປ່ອນບັດເລືອກຕັ້ງເອົາສະມາຊິກສະພາແຫ່ງຊາດຊຸດທີ 9 ແລະ ສະມາຊິກສະພາປະຊາຊົນແຂວງຊຸດທີ 2 ໃຫ້ໄດ້ບັນລຸຜົນສຳເລັດຕາມລະດັບຄາດໝາຍ ຕາມມະຕິຕົກລົງຂອງກົມການເມືອງສູນກາງພັກວ່າດ້ວຍການເພີ່ມທະວີການຊີ້ນຳ – ນໍາພາຂອງພັກຕໍ່ການເລືອກຕັ້ງສະມາຊິກສະພາແຫ່ງຊາດຊຸດທີ 9 ແລະ ສະມາຊິກສະພາປະຊາຊົນແຂວງຊຸດທີ 2 ເພື່ອຮັບປະກັນໃຫ້ໄດ້ຕາມມາດຕະຖານ 300% ສະນັ້ນ ຈຶ່ງສະເໜີໃຫ້ບັນດາຜູ້ມີສິດເລືອກຕັ້ງ ທີ່ມີລາຍຊື່ຢູ່ໃນບັນຊີແຕ່ລະໜ່ວຍປ່ອນບັດເລືອກຕັ້ງ ຈົ່ງພ້ອມກັນນໍາໃຊ້ສິດຂອງຕົນຢ່າງພ້ອມພຽງຮຽງໜ້າ,ເອົາໃຈໃສ່ເລືອກເອົາຕົວແທນຂອງຕົນ ທີ່ມີເງື່ອນໄຂຄົບຖ້ວນ ແນໃສ່ຍົກສູງປະສິດທິພາບຂອງການເປັນຕົວແທນໃຫ້ນັບມື້ສູງຂຶ້ນ ສຳລັບໜ່ວຍປ່ອນບັດທີ 1 ບ້ານວົງວິໄລ ມີຜູ້ມີສິດເລືອກຕັ້ງທັງໝົດ 874ຄົນ,ຍິງ 444ຄົນ ທົ່ວເມືອງເຊໂປນ ມີໜ່ວຍປ່ອນບັດທັງໝົດ 64ໜ່ວຍ, ຈຳນວນຜູ້ມີສິດເລືອກຕັ້ງທີ່ມີໜ້າຕົວຈິງ 33,728ຄົນ,ຍິງ 16,471ຄົນ.