ມີເດຍລາວແຂວງຫົວພັນ
ພິທີ ມອບທຶນແບບມີເງື່ອນໄຂໃຫ້ ປະຊາຊົນ ຂອງໂຄງການຫຼຸດຜ່ອນຄວາມທຸກຍາກ ແລະ ຂາດໂພຊະນາການໃນເຂດຊົນນະບົດ ໄດ້ຈັດຂຶ້ນໃນທ້າຍອາທິດຜ່ານມານີ້ ທີ່ບ້ານຫ້ວຍເໝືອຍ ເມືອງຊ່ອນ ແຂວງຫົວພັນ. ເປັນກຽດເຂົ້າຮ່ວມຂອງທ່ານ ພູວົງ ສີສົມຮັກ ຫົວໜ້າພະແນກກະສິກຳ ແລະ ປ່າໄມ້ ແຂວງຫົວພັນ ແລະ ທ່ານ ວາສະນູນ ສໍອິນໄຊ ຮອງເຈົ້າເມືອງໆ ຊ່ອນ, ມີຄະນະຊີ້ນຳຂັ້ນເມືອງ, ພາກສ່ວນກ່ຽວຂ້ອງຂັ້ນແຂວງ, ອຳນາດການປົກຄອງບ້ານ ແລະ ຄອບຄົວເປົ້າໝາຍຜູ້ໄດ້ຮັບຜົນປະໂຫຍດເຂົ້າຮ່ວມ.

ຈຸດປະສົງຂອງໂຄງການເພື່ອປະກອບສ່ວນເຂົ້າໃນການປັບປຸງໂພຊະນາການໃນເຂດຊົນນະບົດຢູ່ ສປປ ລາວ ໂດຍການໃຫ້ເງິນອຸດໜຸນແມ່ຍິງຖືພາ ແລະ ແມ່ລູກອ່ອນທີ່ມີລູກບໍ່ເກີນ 2 ປີ ພ້ອມທັງສ້າງລະບົບເພື່ອລະບຸກຸ່ມເປົ້າໝາຍ, ການປະສານງານ, ການຕິດຕາມກວດກາ ແລະ ປະເມີນຜົນ ໂດຍແມ່ນ ຫ້ອງການກະສິກຳ ແລະ ປ່າໄມ້ເມືອງຊ່ອນ ໃນນາມຫ້ອງການປະສານງານໂຄງການຫຼຸດຜ່ອນຄວາມທຸກຍາກ ແລະ ຂາດໂພຊະນາການ. ໂຄງການຫຼຸດຜ່ອນຄວາມທຸກຍາກ ແລະ ຂາດໂພຊະນາການໃນເຂດຊົນນະບົດ ປະຈຳເມືອງຊ່ອນ ໄດ້ຈັດຕັ້ງປະຕິບັດໃນ 34 ບ້ານທົ່ວເມືອງ, ມີ 2 ພັນ 698 ຄອບຄົວ, ມີພົນລະເມືອງທັງໝົດ 17 ພັນ131 ຄົນ, ຍິງ 8 ພັນ 563 ຄົນ.

ໃນນັ້ນທະນາຄານໂລກໄດ້ອະນຸມັດຈັດຕັ້ງປະຕິບັດໃນປີ 2021-2022 ຈຳນວນ 34 ບ້ານ ເຊິ່ງມີກຳນົດເວລາ 18 ເດືອນ. ໃນຈຳນວນ 34 ບ້ານມີຄອບຄົວພົ້ນທຸກທີ່ບໍ່ໄດ້ຮັບຜົນປະໂຫຍດຈາກໂຄງການ 319 ຄອບຄົວ ເທົ່າກັບ 11.82% ແລະ ມີຄອບຄົວທຸກຍາກທີ່ໄດ້ຮັບຜົນປະໂຫຍດຈາກໂຄງການ 2 ພັນ 379 ຄອບຄົວ ເທົ່າກັບ 88.17%, ມີຜູ້ໄດ້ຮັບຜົນປະໂຫຍດທັງໝົດ 1 ພັນ 72 ຄົນ ສະເລ່ຍໃສ່ຈຳນວນພົນລະເມືອງທັງໝົດເທົ່າກັບ 6.25% ໃນນັ້ນມີແມ່ຍິງຖືພາ 262 ຄົນ, ເດັກນ້ອຍອາຍຸລຸ່ມ 2 ປີ ມີ 810 ຄົນ, ຈຳນວນເງິນທີ່ຈ່າຍໃນຊຸດທີ່ 1 ສຳເລັດຈຳນວນ 27 ບ້ານ, ເປັນເງິນທັງໝົດຈຳນວນ 248 ລ້ານ 4 ແສນກີບ.