ການກໍ່ສ້າງສ້ອມແປງ ເສັ້ນທາງບ້ານໂພນຕູມ ເມືອງອຸທຸມພອນ ແຂວງສະຫວັນນະເຂດ ສໍາເລັດແລ້ວ 100% ໃນຕົ້ນເດືອນພະຈິກ 2019 ພາຍຫຼັງ ໄດ້ລົງມືກໍ່ສ້າງມາແຕ່ຕົ້ນເດືອນຕຸຸລາ 2019 ຜ່ານມາ ໃຊ້ເວລາໃນການກໍ່ສ້າງເກືອບເດືອນ. ລວມມູນຄ່າການກໍ່ສ້າງ ທັງໝົດ 239 ລ້ານກວ່າກີບ, ໃນນີ້ທຶນຂອງປະຊາຊົນ ພາຍໃນບ້ານ 217 ກວ່າລ້ານກີບ ແລະ ທຶນສົມທົບຂອງບໍລິສັດຜູ້ຮັບເໝົາກໍ່ສ້າງ 22 ລ້ານກ່ວາກີບ. ເຮັດໃຫ້ການໄປມາຫາສູ່ ລະຫ່ວາງ ປະຊາຊົນພາຍໃນບ້ານ, ບ້ານຕໍ່ບ້ານ ໂດຍສະເພາະ ການໄປ-ມາໂຮງຮຽນ ຂອງນ້ອງນັກຮຽນໄດ້ສະດວກສະບາຍ ແລະ ທ່ວງທັນກັບເວລາ ໂດຍສະເພາະໃນລະດູຝົນ.

ການກໍ່ສ້າງດັ່ງກ່າວ ແມ່ນບໍລິສັດວິຈິດວົງສາ ກໍ່ສ້າງຂົວ-ທາງ ເປັນຜູ້ຮັບເໝົາກໍ່ສ້າງ ເຊິ່ງມີລວງຍາວທັງໝົດ 3.600 ກວ່າແມັດ, ໃນນີ້ ທາງ ເຂົ້າຫາບ້ານເລີ່ມແຕ່ທາງເລກທີ 10 ເຂົ້າໄປ 2.900 ແມັດ, ທາງຮ່ອມ ພາຍໃນບ້ານ 5 ເສັ້ນ, ຍາວ 700 ກວ່າແມັດ, ລວງກວ້າງ ຂອງໜ້າທາງ 4 ຫາ 6 ແມັດ, ຍົກລະດັບ 15 ເຊັນຕີແມັດ ແລະ ໃສ່ທໍ່ລອດທາງ ຈໍານວນ 4 ແຫ່ງ ລວມ 32 ທໍ່.
ເມື່ອບໍ່ດົນມານີ້, ອຳນາດການປົກຄອງບ້ານໂພຕູມ ໃນນາມເຈົ້າຂອງໂຄງການ ແລະ ບໍລິສັດວິຈິດວົງສາ ກໍ່ສ້າງຂົວ-ທາງ ຜູ້ຮັບເໝົາ ພ້ອມດ້ວຍຄະນະກຳມະການກວດກາຂັ້ນເມືອງ ໄດ້ລົງກວດກາຕົວຈິງ ຜົນສຳເລັດຂອງການກໍ່ສ້າງ ສ້ອມແປງເສັ້ນທາງດັ່ງກ່າວ ພ້ອມທັງເຮັດບົດບັນທຶກ ກວດກາ ແລະ ມອບໃຫ້ອຳນາດການປົກຄອງ ແລະ ປະຊາຊົນ ພາຍໃນບ້ານເປັນຜູ້ປົກປັກຮັກສາ ແລະ ນໍາໃຊ້ຕໍ່ໄປ.

ທ່ານ ຄຳຕັນ ຈັນຄຳແພງ ນາຍບ້ານໂພນຕູມ ຍັງໃຫ້ຮູ້ອີກວ່າ: ສຳລັບທຶນຂອງປະຊາຊົນທີ່ໄດ້ມານັ້ນ ແມ່ນ ໄດ້ມາຈາກການປຸກລະດົມນຳແຕ່ລະຫຼັງຄາເຮືອນພາຍໃນບ້ານ ຈຳນວນ 400 ກວ່າຫຼັງຄາເຮືອນ ໂດຍໄດ້ເລີມລະ ດົມແຕ່ປີ 2017 ເປັນຕົ້ນມາ ໂດຍເລີ່ມຕົ້ນລະດົມຫຼັງຄາເຮືອນລະ 4 ແສນກີບ ເພື່ອຈະກໍ່ສ້າງສ້ອມແປງ ເສັ້ນທາງ ແຕ່ທາງເລກທີ 10 ເຂົ້າບ້ານເທົ່ານັ້ນ. ແຕ່ຍ້ອນເຫັນໄດ້ຄວາມສຳຄັນ ແລະ ການຕື່ນຕົວຂອງປະຊາຊົນພາຍໃນບ້ານ ຈຶ່ງໄດ້ສືບຕໍ່ລະດົມທຶນນຳພໍ່ແມ່ປະຊາຊົນຕື່ມ ບວກກັບທຶນສົມທົບຂອງບໍລິສັດຜູ້ຮັບເໝົາກໍ່ສ້າງ ກໍ່ສ້າງສ້ອມແປງເສັ້ນທາງຮ່ອມ ພາຍໃນບ້ານຕື່ມອີກ ຈຳນວນ 5 ເສັ້ນ, ຍາວ 700 ກວ່າແມັດ.

ຂ່າວ: ພອນປະເສີດ ແຜນພັກດີ
savannakhet medialaos