ມີເດຍລາວແຂວງເຊກອງ
ວັນທີ 28 ເມສາ 2021 ນີ້, ທ່ານ ດົງເພັດ ພະຍົນ ຮອງເລຂາພັກແຂວງ, ປະທານສະພາປະຊາຊົນແຂວງ ເຊກອງ ພ້ອມຄະນະ ໄດ້ລົງຊຸກຍູ້ວຽກງານຕ້ານ, ສະກັດກັ້ນ ແລະແກ້ໄຂການລະບາດ ພະຍາດ COVID-19 ຢູ່ ສະໂມສອນ ເມືອງ ທ່າແຕງ ແຂວງ ເຊກອງ ໂດຍການເຂົ້າຮ່ວມຂອງທ່ານ ສົມເພັດ ເອິດລັດດາ ກໍາມະການພັກແຂວງ, ເລຂາພັກເມືອງ, ເຈົ້າເມືອງ ເມືອງທ່າແຕງ, ມີຄະນະປະຈໍາພັກເມືອງ, ສະມາຊິກສະພາປະຊາຊົນແຂວງ ພ້ອມດ້ວຍຄະນະສະເພາະກິດຕ້ານ, ສະກັດກັ້ນ ແລະແກ້ໄຂການລະບາດ ພະຍາດ COVID-19 ຂັ້ນເມືອງເຂົ້າຮ່ວມ.

ໃນການລົງເຄື່ອນໄຫວຄັ້ງນີ້, ແມ່ນໄດ້ນໍາເອົາບັນດາມະຕິຄໍາສັ່ງຕ່າງໆກ່ຽວກັບການຕ້ານ, ສະກັດກັ້ນ ແລະແກ້ໄຂການລະບາດພະຍາດ COVID-19 ມາເຜີຍແຜ່ແນະນໍາໃຫ້ການນໍາຂັ້ນເມືອງໄດ້ຮັບຮູ້, ເຊື່ອມຊຶມ ແລະນໍາໄປເຜີຍແຜ່ແນະນໍາໃຫ້ພໍ່ແມ່ປະຊາຊົນໄດ້ຮັບຮູ້ ແລະຈັດຕັ້ງປະຕິບັດຢ່າງເຂັ້ມງວດ ເປັນຕົ້ນ: ມະຕິຂອງຄະນະປະຈໍາພັກແຂວງ ສະບັບເລກທີ 395/ຄປພຂ, ລົງວັນທີ 27/04/2021 ກ່ຽວກັບການແບ່ງງານແບ່ງຄວາມຮັບຜິດຊອບພາຍໃນຄະນະປະຈໍາ; ບັນດາຄໍາສັ່ງຂອງຄະນະເລຂາທິການສູນກາງພັກ ສະບັບເລກທີ 87/ຄລສພ ແລະຄໍາສັ່ງແນະນໍາ ສະບັບເລກທີ 15/ນຍ ກ່ຽວກັບການແນະນໍາການສະກັດກັ້ນ, ປ້ອງກັນ, ຄວບຄຸມ ແລະແກ້ໄຂການລະບາດພະຍາດ COVID-19; ເອກະສານຄໍາສັ່ງຂອງທ່ານເຈົ້າແຂວງ ສະບັບເລກທີ 05/ຈຂ, ລົງວັນທີ 26/04/2021 ວ່າດ້ວຍການເພີ່ມທະວີການປ້ອງກັນ, ຕ້ານ, ສະກັດກັ້ນ ແລະແກ້ໄຂການລະບາດພະຍາດ COVID-19.


ພ້ອມນີ້, ຍັງໄດ້ຮັບຟັງການລາຍງານສະພາບການຈັດຕັ້ງປະຕິບັດມາດຕະການປ້ອງກັນພະຍາດໂຄວິດ 19 ຈາກທ່ານ ແສງສຸບັນ ໄຊສະຫວັນ ຄະນະປະຈໍາພັກເມືອງ, ປະທານຄະນະສະເພາະກິດຕ້ານ, ສະກັດກັ້ນ ແລະແກ້ໄຂການລະບາດພະຍດ COVID-19 ຂັ້ນເມືອງ ເຊິ່ງພາຍຫຼັງທີ່ໄດ້ມີການແຕ່ງຕັ້ງຄະນະກໍາມະການເພື່ອປ້ອງກັນ, ຕ້ານ, ສະກັດກັ້ນ ແລະແກ້ໄຂການລະບາດພະຍດ COVID-19 ຂັ້ນເມືອງ ກໍໄດ້ເອົາໃຈໃສ່ເຄື່ອນໄຫວ ແລະປະຕິບັດມາດຕະການປ້ອງກັນ ແລະຄວບຄຸມພະຍາດດັ່ງກ່າວຢ່າງເຂັ້ມງວດ, ໂດຍໄດ້ອອກແຈ້ງການໃຫ້ຂະແໜງການອ້ອມຂ້າງເມືອງ, ເຜີຍແຜ່ຜ່ານສື່ວິທະຍຸຊຸມຊົນ-ໂທລະໂຄ່ງ, ເຟສບຸກຂ່າວ ຂອງເມືອງ ແລະບັນດາໂຮງໝໍນ້ອຍແຕ່ລະບ້ານໃນທົ່ວເມືອງ ຮ່ວມກັບຫ້ອງການສາທາລະນະສຸກເມືອງ, ໄດ້ລົງຜັນຂະຫຍາຍ, ເຜີຍແຜ່ຊຸກຍູ້ໃຫ້ອໍານາດການປົກຄອງບ້ານ ແລະປະຊາຊົນ ໂດຍສະເພາະບ້ານທີ່ຢູ່ລຽບຕາມຊາຍແດນໃຫ້ເອົາໃຈໃສ່ຕິດຕາມຜູ້ທີ່ມາຈາກຕ່າງແຂວງທີ່ມີການຕິດເຊື້ອ ແລະຜູ້ທີ່ເດີນທາງມາຈາກປະເທດທີ່ມີການລະບາດ, ພ້ອມທັງໃຫ້ອົງການຈັດຕັ້ງບ້ານເກັບກໍາຂໍ້ມູນລະອຽດແລ້ວລາຍງານໂຮງໝໍນ້ອຍ ຫຼືຫ້ອງການສາທາເມືອງ ແລະຍັງໄດ້ໃຫ້ຄວາມຮູ້ຂັ້ນພື້ນຖານ ວິທີການປ້ອງກັນພະຍາດດັ່ງກ່າວ ໃຫ້ແກ່ພໍ່ແມ່ປະຊາຊົນຕື່ມອີກ, ນອກນີ້ຍັງໄດ້ແຕ່ງຕັ້ງພະນັກງານແພດ-ໝໍ, ກໍາລັງເຈົ້າໜ້າທີ່ 2 ກໍາລັງ ອອກເວນຍາມປະຈໍາຢູ່ສູນກັກກັ້ນ ແລະປະຈໍາຢູ່ດ່ານກວດກັ່ນກອງຢູ່ຕາມເຂດເຊື່ອມຕໍ່ລະຫວ່າງເມືອງກັບເມືອງ, ພ້ອມທັງໄດ້ລົງໂຄສະນາສຸຂະສຶກສາແບບເຄື່ອນທີ່ຮ່ວມກັບແຂວງ ໃນເທສະບານເມືອງ ກ່ຽວກັບການປ້ອງກັນ, ຕ້ານ ແລະຄວບຄຸມພະຍາດ COVID-19, ໄດ້ລົງເກັບກໍາຂໍ້ມູນແຮງງານທີ່ມາຈາກຕ່າງປະເທດທີ່ມີກຸ່ມສ່ຽງໃນແຕ່ລະບ້ານ, ໄດ້ລົງເຄື່ອນໄຫວເກັບກໍາຂໍ້ມູນຄົນເຂົ້າ-ອອກໃນທົ່ວເມືອງ ໂດຍສະເພາະແມ່ນບ້ານຢູ່ລຽບຕາມເຂດເຊື່ອມຕໍ່, ລົງຕິດຕາມກວດກາການຊຸມແຊວ, ການຈັດງານຕ່າງໆ ທີ່ມີຈໍານວນຄົນຫຼາຍ ແລະໄດ້ອອກແຈ້ງການເຖິງຫົວໜ່ວຍທຸລະກິດ, ຮ້ານອາຫານ, ບ້ານພັກ, ຮ້ານບັນເທີງ ໃຫ້ຢຸດຕິບໍລິການຊົ່ວຄາວ ພ້ອມທັງລົງກວດກາຢ່າງເປັນປົກກະຕິຕໍ່ເນື່ອງ.


ໂອກາດດັ່ງກ່າວ ທ່ານ ດົງເພັດ ພະຍົນ ກໍໄດ້ສະແດງຄວາມຍ້ອງຍໍຊົມເຊີຍຕໍ່ການນໍາ ແລະໜ່ວຍສະເພາະກິດຂອງເມືອງທີ່ເຂັ້ມງວດ ແລະຈັດຕັ້ງປະຕິບັດຕາມຄໍາສັ່ງ ຂອງນາຍົກລັດຖະມົນຕີຢ່າງມີປະສິດທິຜົນໃນການຕ້ານ ແລະສະກັດກັ້ນພະຍາດ COVID-19 ແລະໄດ້ເພີ່ມທະວີສືບຕໍ່ຈັດຕັ້ງປະຕິບັດບັນດາຄໍາສັ່ງຂອງນາຍົກ, ຄະນະສະເພາະກິດກໍຄືຂອງແຂວງວາງອອກ, ເຖິງຢ່າງໃດກໍດີ ຮຽກຮ້ອງໃຫ້ການນໍາ ແລະຄະນະສະເພາະກິດຂອງເມືອງ ຈົ່ງສືບຕໍ່ເຝົ້າລະວັງ, ເພີ່ມທະວີການປ້ອງກັນ ແລະສະກັດກັ້ນຕໍ່ພະຍາດ COVID-19, ປະຕິບັດຕາມຄໍາສັ່ງຂອງຄະນະສະເພາະກິດວາງອອກຢ່າງເຂັ້ມງວດຂຶ້ນກວ່າເກົ່າ, ສືບຕໍ່ສຸຂະສຶກສາ, ເຜີຍແຜ່ຂໍ້ມູນຂ່າວສານກ່ຽວກັບຜົນຮ້າຍ ແລະວິທີປ້ອງກັນ, ພ້ອມດຽວກັນຕ້ອງໄດ້ລົງຊຸກຍູ້ປະຊາຊົນບັນດາເຜົ່າຢູ່ພາຍໃນເມືອງໃຫ້ສືບຕໍ່ທໍາການຜະລິດ ດ້ວຍການປູກພືດສະບຽງອາຫານ, ລ້ຽງສັດ ທັງນີ້, ກໍເພື່ອຮັບປະກັນດ້ານສະບຽງອາຫານສາມາດກຸ້ມຕົນເອງ ແລະເມື່ອພົ້ນວິກິດຄັ້ງນີ້ແລ້ວແມ່ນສາມາດສົ່ງຂາຍເປັນສິນຄ້າໄດ້ ແຕ່ສິ່ງສໍາຄັນຕ້ອງໃຫ້ຄວາມຮ່ວມມືກັບເຈົ້າໜ້າທີ່ພ້ອມກັນສະກັດກັ້ນກຸ່ມຄົນບໍ່ດີທີ່ຫວັງມ້າງເພທໍາລາຍປະເທດຊາດບ້ານເມືອງ, ເສບຂ່າວຢ່າງມີສະຕິ, ເຈົ້າໜ້າທີ່ 2 ກໍາລັງ ແລະແພດໝໍຈົ່ງເປັນຫຼັກໃກ້ສິດຕິດແທດ.


ຈາກນັ້ນ, ກໍໄດ້ລົງໄປຢ້ຽມຢາມ ແລະໃຫ້ກໍາລັງໃຈເຈົ້າໜ້າທີ່ທີ່ປະຕິບັດໜ້າທີ່ຢູ່ຕາມຈຸດກວດກາຄົນເຂົ້າ-ອອກເມືອງຄື: ຈຸມເຊື່ອມຕໍ່ລະຫວ່າງບ້ານກົກພຸງໃຕ້ ຫາ ເມືອງສາລະວັນ ແລະຈຸດເຊື່ອມຕໍ່ລະຫວ່າງ ບ້ານຫຼັກຂາວ ຫາ ເມືອງ ປາກຊ່ອງ ແລະຕິດຕາມຈຸດທີ່ມີຄວາມສ່ຽງຕ່າງໆຢູ່ພາຍໃນເມືອງດັ່ງກ່າວຕື່ມອີກ.