ວັນທີ 15 ມີນາ 2021 ທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ ປະທານສູນກາງແນວລາວສ້າງຊາດ ແລະ ພັນລະຍາ ພ້ອມດ້ວຍຄະນະ, ມີທ່ານ ສຸກັນ ບຸນຍົງ ຮອງເລຂາພັກແຂວງຫຼວງພະບາງ ແລະ ທ່ານ ເອິງ ລໍສະຫວັນ ປະທານແນວລາວສ້າງຊາດແຂວງຫຼວງພະບາງ ໄດ້ເຂົ້າພົບປະຢ້ຽມຢາມວັດຜາໂອ ນະຄອນຫຼວງພະບາງ ໂດຍມີສາທຸໃຫຍ່ ອ່ອນແກ້ວ ກິດຕິພັດໂທ ປະທານອົງການພຸດທະສາສະໜາສໍາພັນລາວແຂວງຫຼວງພະບາງ ພ້ອມດ້ວຍຄະນະສົງ-ສໍາມະເນນ ແລະ ຄູ-ອາຈານ ໃຫ້ການຕ້ອນຮັບ.


ການມາຢ້ຽມຢາມຄັ້ງນີ້ ເປັນການມາຂາບໄຫວ,ສັກກະລະບູຊາ ພະລັດຕະນະໄຕ ຢູ່ໃນວັດດັ່ງກ່າວ ເພື່ອຄວາມເປັນສິລິມຸງຄຸນແກ່ບ້ານເມືອງ ແລະ ຄອບຄົວ.ໂອກາດນີ້ ສາທຸໃຫຍ່ ອ່ອນແກ້ວ ກິດຕິພັດໂທ ກໍ່ໄດ້ກ່າວລາຍງານ ສະພາບການພັດທະນາ ແລະ ການເຄື່ອນໄຫວຂອງວັດ ຕໍ່ຄະນະຊາບ,ມີບາງຕອນວ່າ: ວັດຜາໂອ ເປັນວັດທີ່ອາຕະມາເປັນຜູ້ລິເລີ່ມກໍ່ສ້າງ, ປັດຈຸບັນມີພຣະສົງ-ສາມະເນນທັງໝົດ 488 ອົງ, ໃນນັ້ນເປັນພຣະສົງ 16 ອົງ, ສາມະເນນ 472 ອົງ, ແຍກເປັນຊົນເຜົ່າຄື: ລາວລຸ່ມ 12,09%, ກືມມຸ 31,55% ແລະ ມົ້ງ 56,35%. ຈໍານວນພຣະສົງສາມະເນນແມ່ນເພີ່ມຂື້ນທຸກປີ ເພາະເຍົາວະຊົນໃນເຂດຊົນນະບົດຫ່າງໄກສອກຫຼີກ ເມຶ່ອຮຽນຈົບຊັ້ນປະຖົມແລ້ວ ກໍບໍ່ມີບ່ອນຮຽນຕໍ່ ຫຼື ທາງຄອບຄົວບໍ່ມີເງື່ອນໄຂສົ່ງລູກຫຼານເຂົ້າໂຮງຮຽນສາມັນທົ່ວໄປໄດ້ ສະນັ້ນ, ການບວດຮຽນຈຶ່ງເປັນເງື່ອນໄຂດຽວທີ່ເຂົາເຈົ້າຈະສາມາດເຂົ້າຮຽນຕໍ່ໄດ້ ແລະ ເປີດໂອກາດໃຫ້ແກ່ເຂົາເຈົ້າໄດ້ຮັບການສຶກສາສູງຂື້ນໄປ. ຊີວິດການເປັນຢູ່ຂອງພຣະສົງສາມະເນນສ່ວນໃຫຍ່ ກໍແມ່ນຢູ່ໃນຄວາມຮັບຜິດຊອບຂອງອາຕະມາ ແລະ ພາຍໃນວັດ ໂດຍໄດ້ຮັບການອຸປະຖໍາຄໍ້າຊູຈາກສັດທາອອກຕົນຍາດໂຍມທັງພາຍໃນ ແລະ ຕ່າງປະເທດ ໃນທຸກໆ ຕອນເຊົ້າ ພຣະສົງສາມະເນນກໍອອກໄປຮັບບິນທະບາດຕາມໝູ່ບ້ານຕ່າງໆ ພາຍໃນເທດສະບານ ນະຄອນ-ຫຼວງພະບາງ, ສ່ວນບ່ອນພັກເຊົາແມ່ນສາລາໃຫຍ່ ແລະ ກຸຕິນ້ອຍຕາມບໍລິເວນວັດ, ພຣະສົງສາມະເນນທີ່ມາອາໄສຢູ່ວັດຜາໂອ) ນອກຈາກຈະໄດ້ສຶກສາຮໍ່າຮຽນຄວາມຮູ້ທາງດ້ານພຣະພຸດທະສາສະໜາ ແລະສາຍສາມັນແລ້ວ, ຍັງໄດ້ສຶກສາຮຽນຮູ້ວິຖີການດໍາລົງຊີວິດ, ສິລະປະ ແລະການກໍ່ສ້າງວັດວາອາຮາມຕຶ່ມອີກ ຖ້າຫາກເຂົາເຈົ້າສິກຂາລາເພດໄປ ກໍສາມາດນໍາເອົາຄວາມຮູ້ນັ້ນໄປປະກອບອາຊີບລ້ຽງຕົວເອງໄດ້ ແລະເປັນການຫຼຸດຜ່ອນຄວາມທຸກຍາກຊ່ວຍບ້ານເມືອງອີກດ້ວຍ.


ໂອກາດດັ່ງກ່າວທ່ານ ປອ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ ກໍໄດ້ຖວາຍຜ້າໄຕ ພ້ອມທັງຢາດນໍ້າ ແລະ ຮັບພອນຈາກສາທຸໃຫຍ່ ອ່ອນແກ້ວ ກິດຕິພັດໂທ,ຈາກນັ້ນສາທຸໃຫຍ່ ອ່ອນແກ້ວ ກິດຕິພັດໂທ ກໍ່ໄດ້ນໍາພາເດີນຊົມຫໍວາງສະແດງງານວິຈິດຕະກໍາ,ສິລະປະການຄັວດ-ແຕ້ມ ຜົນງານຂອງສໍາມະເນນ ຢູ່ພາຍໃນວັດຜາໂອ.ໂອກາດນີ້ຍັງໄດ້ຮັບຮູບຄັວດ ເປັນທີ່ລະລຶກ ຈາກ ນັກສຶກສາສົງ ຕື່ມອີກ.
ເວລາຕໍ່ມາກໍ່ໄດ້ ເຂົ້າພົບປະ ແລະ ຂາບໄຫວສາທຸໃຫຍ່ ບຸນທັນ ປຸນຍະກາມະເຖຣະ ເປັນປະທານທີ່ປຶກສາ ອພສ ແຂວງ ທີ່ວັດປ່າໂພນເພົາ ແລະສາທຸໃຫຍ່ ຈັນທະລິນ ຈິນນະທັມໂມ ຮອງເຈົ້າ ອພສ ແຂວງ ທີ່ວັດພູຄວາຍ ນະຄອນ ຫຼວງພະບາງ ແລະ ກໍໄດ້ຖວາຍຜ້າໄຕ ທີ່ວັດທັງ 2 ແຫ່ງນັ້ນເຊັ່ນດຽວກັນ ແລະ ໄປເບິ່ງໂຮງຮຽນມັດທະຍົມສົມບູນສົງທີ່ວັດພູຄວາຍຕື່ມອີກ.
ພາບ-ຂ່າວ: ເພັດສາຄອນ ສິມມະວົງ