ມີເດຍລາວແຂວງບໍລິຄຳໄຊ
ພິທີປະກາດບ້ານປາກເຫືອງ ແລະ ບ້ານນາຫັນ ເມືອງບໍລິຄັນ ແຂວງບໍລິຄຳໄຊ ເປັນບ້ານພັດທະນາ ໄດ້ຈັດຂຶ້ນ ໃນວັນທີ 23 ມິຖຸນາ 2021 ຢູ່ບ້ານປາກເຫືອງ, ເປັນກຽດເຂົ້າຮ່ວມໂດຍ ທ່ານ ວັນວິໄລ ແດນພູຫຼວງ ຮອງເລຂາພັກແຂວງ ຜູ້ຊີ້ນຳວຽກງານການເມືອງ-ແນວຄິດ ແລະ ວຽກງານກໍ່ສ້າງຮາກຖານການເມືອງ ພັດທະນາຊົນນະບົດຂັ້ນແຂວງ, ມີທ່ານ ວັນເລີນ ປູ້ຍໄມນີ ເລຂາພັກເມືອງ ເຈົ້າເມືອງບໍລິຄັນ,ມີຄະນະກຳມະການກວດກາ ການສ້າງບ້ານພັດທະນາຮອບດ້ານຂັ້ນແຂວງ, ຂັ້ນເມືອງ,ອຳນາດການປົກຄອງບ້ານ ແລະ ພໍ່ແມ່ນປະຊາຊົນທັງສອງບ້ານ ເຂົ້າຮ່ວມ.

ທ່ານ ໝອນ ອິນທິເສນ ຫົວໜ້າຫ້ອງກະສິກຳ ແລະ ປ່າໄມ້ເມືອງບໍລິຄັນ ຄະນະກຳມະການກວດກາ ການສ້າງບ້ານພັດທະນາຮອບດ້ານຂັ້ນເມືອງ ໄດ້ສະຫຼຸບຕີລາຄາຄືນຜົນຂອງການຈັດຕັ້ງປະຕິບັດວຽກງານຮອບດ້ານ ການລົງຊຸກຍູ້,ຕິດຕາມການສ້າງບ້ານພັດທະນາຮອບດ້ານທັງ 2 ບ້ານ ຕະຫຼອດໄລຍະຜ່ານມາ ໂດຍຄະນະຮັບຜິດຊອບຂັ້ນເມືອງ ໄດ້ສົມທົບກັບອຳນາດການປົກຄອງຂັ້ນບ້ານ ນຳເອົາກົດໝາຍ, ຄຳສັ່ງຂອງຂັ້ນເທິງ, ນິຕິກຳຂອງແຂວງ, ຂອງເມືອງ ລົງເຜີຍແຜ່ໃຫ້ປະຊາຊົນໄດ້ຮັບຮູ້ເຂົ້າໃຈ ແລະ ໄດ້ເກັບກຳຂໍ້ມູນທາງດ້ານເສດຖະກິດ-ສັງຄົມ ຂອງພໍ່ແມ່ປະຊາຊົນໃນແຕ່ລະຄອບຄົວທັງ 2 ບ້ານຕາມ 4 ເນື້ອໃນ 4 ຄາດໝາຍ,

ໂດຍລວມແລ້ວເຫັນວ່າປະຊາຊົນບັນດາເຜົ່າ ມີຄວາມຮັບຮູ້ເຂົ້າໃຈຢ່າງເລິກເຊີ່ງຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ມີຄວາມຕື່ນຕົວປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດສັງຄົມຂອງບ້ານ, ຊີວິດການເປັນຢູ່ຂອງປະຊາຊົນນັບມື້ດີຂຶ້ນ ເຮັດໃຫ້ຄວາມທຸກຍາກໄດ້ຮັບການແກ້ໄຂ, ມີຄອບຄົວຕົວແບບໃນດ້ານຕ່າງໆ ເຊັ່ນ: ການປູກພືດ, ລ້ຽງສັດ ແລະ ຫັດຖະກໍາ ສ້າງລາຍໄດ້ເຂົ້າສູ່ຄອບຄົວ ກາຍເປັນຄອບຄົວພັດທະນາຫຼາຍຂຶ້ນ, ປະຊາຊົນມີຄວາມເຊື່ອໝັ້ນຕໍ່ການນໍາພາຂອງພັກ, ເຄົາລົບ ແລະ ປະຕິບັດລະບຽບກົດໝາຍ, ມີຄວາມສາມັກຄີຮັກແພງຊ່ວຍເຫຼືອເຊິ່ງກັນ ແລະ ກັນຢ່າງແໜ້ນແຟ້ນ, ກຳລັງ ປກຊ-ປກສບ້ານມີຄວາມເຂັ້ມແຂງໜັກແໜ້ນ, ປະກົດການຫຍໍ້ທໍ້ໄດ້ຮັບການແກ້ໄຂຫຼຸດລົງເທື່ອລະກ້າວ, ທັງ 2 ບ້ານ ເນື້ອທີ່ດີນປູກສ້າງ 13 ເຮັກຕ່າ, ເນື້ອທີ່ນາປີ 181 ເຮັກຕ່າ, ສະມັດຕະພາບຜົນຜະລິດເຂົ້າ 2,5 ໂຕນ/ເຮັກຕ່າ, ສະເລ່ຍເຂົ້າກິນ 450 ກິໂລ/ຄົນ/ປີ, ເນື້ອທີ່ສວນມັນຕົ້ນ 138 ເຮັກຕ່າ, ເນື້ອທີ່ສວນຢາງພາລາ 168 ເຮັກຕ່າ, ຜະລິດຕະພັນທີ່ບ້ານສາມາດຜະລິດໄດ້ອັນພົ້ນເດັ່ນແມ່ນ ຜົນຜະລິດຈາກກະສິກຳ ແລະ ອຸດສາຫະກໍາ ເຊັ່ນ: ຢາງພາລາ, ມັນຕົ້ນ, ມີຄອບຄົວພົ້ນທຸກ 183 ຄອບຄົວ ເທົ່າກັບ96,82%, ມີຄອບຄົວພັດທະນາ 183 ຄອບຄົວ, ເທົ່າກັບ96,82 %, ບ້ານມີລະບົບໂທລະໂຄ່ງ ເພື່ອຮັບໃຊ້ເຂົ້າໃນວຽກງານສື່ມວນຊົນກໍ່ຄືວຽກງານຕ່າງໆ, ມີຄອບຄົວວັດທະນະທໍາ 189 ຄອບຄົວ ເທົ່າກັບ 100% ເດັກໃນເກນອາຍຸໄດ້ເຂົ້າຮຽນບັນລຸ 100 %, ປະຊາຊົນໄດ້ຊົມໃຊ້ນໍ້າສະອາດກວມ100 %, ຊົມໃຊ້ວິດຖ່າຍກວມ 100%, ມີຄອບຄົວສາທາລະນະສຸກແບບຢ່າງ 189 ຄອບຄົວ, ໄດ້ປະກາດຮັບຮອງເປັນບ້ານແບບສາທາລະນະສຸກທັງ 2 ບ້ານ, ອົງການປົກຄອງບ້ານໄດ້ປັບປຸງເປັນ 5 ຕໍາແໜ່ງງານ ແລະ ໄດ້ເຄື່ອນໄຫວວຽກງານ ຕາມພາລະບົດບາດ, ສິດໜ້າທີ່ຂອງຕົນດ້ວຍຮັບຜິດຊອບຢ່າງຕັ້ງໜ້າ ເຮັດໃຫ້ບ້ານມີຄວາມເຂັ້ມແຂງໜັກແໜ້ນ.

ຜ່ານການກວດກາປະເມີນ ສ້າງບ້ານປາກເຫືອງ ແລະ ບ້ານນາຫັນ ເປັນບ້ານພັດທະນາຮອບດ້ານ ຕາມ 11 ມາດຖານ ຂອງດໍາລັດ ເລກທີ່ 348/ລບ ສາມາດຕີລາຄາໄດ້ ຄື: ບ້ານປາກເຫືອງ ມີ 71 ຄອບຄົວ, ພົນລະເມືອງທັງໝົດ 373 ຄົນ, ຍີງ 179 ຄົນ, ຄອບຄົວພົ້ນທຸກ 70 ຄອບຄົວ, ເທົ່າກັບ 98,59 %, ຄອບຄົວພັດທະນາ 69 ຄອບຄົວເທົ່າກັບ 97,18 %.
ບ້ານນາຫັນມີ 118 ຄອບຄົວ, ພົນລະເມືອງທັງໝົດ 703 ຄົນ, ຍີງ 344 ຄົນ, ຄອບຄົວພົ້ນທຸກ 113 ຄອບຄົວ ເທົ່າກັບ 95,76 %, ຄອບຄົວພັດທະນາ 110 ຄອບຄົວເທົ່າກັບ 93,22 %ສາມາດຕີລາຄາໄດ້ທັງ 2 ບ້ານຄົບໃນເງື່ອນໄຂທີ່ໄດ້ກຳນົດໄວ້.

ໂອກາດດັ່ງກ່າວນີ້ ທ່ານ ວັນວິໄລ ແດນພູຫຼວງ ຮອງເລຂາພັກແຂວງ ຕາງໜ້າໃຫ້ຄະນະພັກຄະນະປົກຄອງແຂວງ ໄດ້ເປັນກຽດຂຶ້ນມອບ ໃບຢັ້ງຢືນຂອງທ່ານເຈົ້າແຂວງບໍລິຄຳໄຊ ຮັບຮອງເອົາບ້ານປາກເຫືອງ ແລະ ບ້ານນາຫັນ ເປັນບ້ານ ພັດທະນາຮອບດ້ານ ບ້ານທີ 37 ແລະ 38 ໃນຈຳນວນ 44 ບ້ານ ຂອງເມືອງ ບໍລິຄັນ. ພ້ອມຕັດແທບຜ້າ,ເປີດປ້າຍ ລັ່ນຄ້ອງ 9 ບ້າດ ເພື່ອຢັ້ງຢືນເຖິງການເປີດບ້ານປາກເຫືອງ ແລະ ບ້ານນາຫັນ ເປັນບ້ານພັດທະນາຮອບດ້ານຢ່າງເປັນທາງການ.

ທ່ານ ວັນໄວິໄລ ແດນພູຫຼວງ ໄດ້ຍ້ອງຍໍຊົມເຊີຍຜົນງານຄະນະກຳມະການກວດກາ ການສ້າງບ້ານພັດທະນາຮອບດ້ານຂັ້ນແຂວງ, ຂັ້ນເມືອງ ທີ່ສາມາດປະຕິບັດສຳເລັດໜ້າທີ່ ພ້ອມນັ້ນ ຈະຕ້ອງໄດ້ລົງຊຸກຍູ້, ຕິດຕາມເປັນປົກກະຕິ,ອຳນາດການປົກຄອງຂັ້ນບ້ານ ຈະຕ້ອງໄດ້ເປັນເຈົ້າການໃນການເຕົ້າໂຮມຄວາມສາມັກຄີປອງດອງປະຊາຊົນເປັນປຶກແຜ່ນ,ຫັນການຜະລິດໃຫ້ຫຼາຍກາຍເປັນສິນຄ້າ ສ້າງລາຍຮັບໃຫ້ກັບຄອບຄົວ, ຮັກສາມູນເຊື້ອຮີດຄອງປະເພນີອັນດີງາມຂອງປະຊາຊົນບັນດາເຜົ່າ, ເຊີດຊູນ້ຳໃຈຮັບຜິດຊອບອັນສູງສົ່ງ ຕໍ່ກັບໜ້າທີ່ການເມືອງຂອງຕົນ, ສຸມທຸກສະຕິປັນຍາ, ເຫື່ອແຮງ, ທ່າແຮງອັນບົ່ມຊ້ອນທີ່ມີຢູ່ພື້ນທີ່ຂອງຕົນ ເພື່ອປະກອບສ່ວນເຂົ້າໃນການປົກປັກຮັກສ້າງສາພັດທະນາບ້ານເມືອງ ໃຫ້ກ້າວຂືນຢ່າງບໍ່ຢຸດຢັ້ງ.