ມີເດຍລາວແຂວງວຽງຈັນ ຂ່າວ : ບຸນມາ ແກ້ວບຸດດາ. ພິທີປູກຕົ້ນໄມ້ແຫ່ງຊາດຂອງແຂວງວຽງຈັນ ໄດ້ຈັດຂຶ້ນໃນວັນທີ 11 ມິຖຸນາ 2021 ຢູ່ທີ່ ເດີ່ນໂຮງຮຽນ ມສ ບ້ານນານົກຂຸ້ມ ເມືອງທຸລະຄົມ, ໂດຍການນຳພາປູກຂອງ ທ່ານ ຄຳພັນ ສິດທິດຳພາ ກຳມະການສູນກາງພັກ,ເລຂາພັກແຂວງ,ເຈົ້າແຂວງວຽງຈັນ,ມີການນຳພັກ-ລັດຂັ້ນແຂວງ,ຂັ້ນເມືອງ,ອຳນາດການປົກຄອງບ້ານ,ຄູອາຈານ,ພ້ອມດ້ວຍນ້ອງນ້ອຍນັກຮຽນໂຮງຮຽນດັ່ງກ່າວເຂົ້າຮ່ວມປູກຕົ້ນໄມ້ຄັ້ງນີ້.

ທ່ານ ສົມອົົກ ໜໍ່ຈະເລີນ ຫົວໜ້າພະແນກກະສິກຳ ແລະ ປ່າໄມ້ແຂວງວຽງຈັນ ໄດ້ກ່າວໃນພິທີວ່າ: ສະເພາະໃນວັນປູກຕົ້ນໄມ້ແຫ່ງຊາດ ປີນີ້ ທົ່ວແຂວງວຽງຈັນໄດ້ມີແຜນການຈັດພິທີປູກຕົ້ນໄມ້ຕາມເນື້ອທີ່ດິນຂອງລັດ,( ໂຮງຮຽນ,ສໍານັກງານ ຫ້ອງການ, ກົມກອງຕ່າງໆ ), ເນື້ອທີ່ເຊົ່າສຳປະທານຂອງນັກທຸລະກິດ ທີ່ລົງທຶນປູກໄມ້ຢູ່ພາຍໃນແຂວງວຽງຈັນ ແລະ ການປູກໄມ້ນີ້ໄດ້ເລີ່ມມາແຕ່ເດືອນພຶດສະພາ ແລະ ຈະສືບຕໍ່ປູກໄປຈົນຮອດທ້າຍເດືອນ ກັນຍາ.

ໃນມື້ນີ້ພະແນກກະສິກໍາ ແລະ ປ່າໄມ້ແຂວງໄດ້ຮ່ວມກັບເມືອງທຸລະຄົມ,ອໍານາດການປົກຄອງບ້ານ ແລະ ການຈັດຕັ້ງໂຮງຮຽນ ມສ ບ້ານນານົກຂຸ້ມ ໄດ້ຈັດພິທີປູກໄມ້ຂື້ນທີ່ເດີ່ນໂຮງຮຽນ ມສ ແຫ່ງນີ້ ເຊິ່ງມີເນື້ອທີ່ປະມານ 3 ເຮັກຕາ, ເບັ້ຍໄມ້ທີ່ນໍາມາປູກມີຈໍານວນ 2.500 ເບ້ຍ, ປະກອບມີ ໄມ້ດູ່, ໄມ້ດູ່ລາຍ, ໄມ້ແຕ້ຂ່າ, ໄມ້ແຄນ
ເຮືອ,ໄມ້ໝາກມີ້ ແລະ ໄມ້ປະດັບ. ນອກຈາການຈັດພິທີປູກໄມ້ຢູ່ຂັ້ນແຂວງໃນມື້ນີ້ແລ້ວກໍ່ຍັງຈະໄດຈັດກິດຈະກໍາປູກໄມ້ຂຶ້ນໃນແຕ່ລະເມືອງແລະ ບ້ານ, ເນື້ອທີ່ບຸກຄົນ, ນິຕິບຸກຄົນ,ເນື້ອທີ່ສໍາປະທານຂອງນັກລົງທຶນເອກກະຊົນພາຍໃນ ແລະ ຕ່າງປະເທດຕາມວັນເວລາທີ່ເໝາະສົມ.

ໃນໂອກາດນີ້ທ່ານເຈົ້າແຂວງວຽງຈັນ ໄດ້ຮຽກຮ້ອງໃຫ້ອຳນາດການປົກຄອງທຸກຂັ້ນ ພ້ອມກັນໂຄສະນາປູກຈິດສຳນຶກໃຫ້ພໍ່ແມ່ປະຊາຊົນບັນດາເຜົ່າ,ລູກຫຼານ,ນ້ອງນ້ອຍນັກຮຽນຮູ້ເຖິງຄຸນປະໂຫຍດ ແລະ ຜົນກະທົບຈາກທຳມະຊາດ, ພ້ອມທັງໃຫ້ຢຸດຕິການຕັດໄມ້ທຳລາຍປ່າຢ່າງຊະຊາຍ,ຢຸດຕິການຖາງປ່າເຮັດໄຮ່ແບບເລື່ອນລອຍ,ປຸກລະດົມໃຫ້ການຈັດຕັ້ງທຸກພາກສ່ວນ,ພໍ່ຄ້າຊາວຂາຍ,ພໍ່ແມ່ປະຊາຊົນບັນດາເຜົ່າໄດ້ປູກຕົ້ນໄມ້ຢ່າງເປັນຂະບວນກ້ວາງຂວາງຕາມເງື່ອນໄຂຕາມຄວາມສາມາດຕົວຈິງ.

ພາຍຫຼັງປູກມື້ນີ້ແລ້ວມອບໃຫ້ອຳນາດການປົກຄອງເມືອງ,ອຳນາດການປົກຄອງບ້ານ,ອຳນວຍການ,ຄູອາຈານແລະນ້ອງນ້ອຍນັກຮຽນພ້ອມກັນເອົາໃຈໃສ່ບົວລະບັດ,ຕັດຫຍ້າ, ໃສ່ຝຸ່ນ,ຫົດນ້ຳໃນຍາມແລ້ງ ເພື່ອໃຫ້ຕົ້ນໄມ້ໄດ້ເຕີບໂຕ ແລະ ໃຫ້ ມີການກວດກາເບິ່ງຕົ້ນໃດທີ່ຕາຍກໍ່ຕ້ອງໄດ້ມີການປູກທົດແທນຄືນ, ເວລາໄມ້ປູກໄດ້ 3 ປີ, ກໍ່ສະເໜີໃຫ້ກະສິກໍາ ແລະ ປ່າໄມ້ເມືອງອອກທະບຽນປ່າປູກເພື່ອຢັ້ງຢືນກຳມະສິດໄມ້ປູກເປັນຂອງໂຮງຮຽນຢ່າງຖືກຕ້ອງຕາມກົດໝາຍວ່າດ້ວຍປ່າໄມ້.