ວັນທີ 24 ກຸມພາ 2021 ທີ່ຜ່ານມານີ້ ທະນາຄານນະໂຍບາຍສາຂາແຂວງອັດຕະປື ໄດ້ຈັດກອງປະຊຸມການເຄື່ອນໄຫວວຽກ​ງານສິນເຊື່ອ ປະຈຳປີ 2020 ແລະ ຜ່ານທິດທາງແຜນການ ປະຈຳປີ 2021 ຂື້ນທີ່ທະນາຄານດັ່ງກ່າວ ໂດຍໃຫ້ກຽດເຂົ້າ​ຮ່ວມຂອງທ່ານ ທະນູໄຊ ບັນຊາລິດ ຮອງເຈົ້າແຂວງອັດຕະປື ທ່ານນາງ ວຽງເງິນ ສົມພົງ ຮອງອຳ​ນວຍການສຳນັກງານໃຫຍ່ທະນາຄານນະໂຍບາຍ ຄະກຳມະການຄຸ້ມຄອງສິນເຊື່ອຂັ້ນແຂວງ ແລະ ຂັ້ນເມືອງ ພ້ອມດ້ວຍແຂກຖືກເຊີນເຂົ້າຮ່ວມ.

ທ່ານ ບຸນແຫຼມ ກິວົງສັກ ຮັກສາການຫົວໜ້າ ທະນາຄານນະໂຍບາຍສາຂາແຂວງອັດຕະປື ໄດ້ໃຫ້ຮູ້ວ່າ: ໃນປີ 2020 ທະນາຄານນະໂຍບາຍສາຂາ ແຂວງອັດຕະປື ໄດ້ຮັບອະ​ນຸ ມັດແຫຼ່ງທຶນສິນເຊື່ອ ຈຳນວນ 5,​7 ຕື້ກ່ວາກີບ ຜ່ານການຈັດຕັ້ງປະຕິບັດການສະໜອງສິນເຊື່ອໄດ້ພຽງແຕ່ 2,​8 ຕື້ກວ່າກີບ ​ເຊິ່ງໄດ້ປ່ອຍສິນເຊື່ອ ໃນ 5 ເມືອງຂອງແຂວງ ມີ 13 ກຸ່ມ ມີ 136 ຄອບຄົວ ເທົ່າກັບ 50,​67% ຂອງແຜນການ ໃນນີ້ປ່ອຍທຶນໄລຍະກາງ ມີ 348 ລ້ານກ່ວາກີບ ເທົ່າກັບ 24,​09% ຂອງແຜນການປ່ອຍທຶນໃນໄລຍະຍາວ ມີ 2,​5 ຕື້ກວ່າກີບ ເທົ່າກັບ 59,​70 % ຂອງແຜນການປະຈຸບັນທະນາຄານນະໂຍບາຍສາຂາແຂວງອັດຕະປື ມີຍອດສິນເຊື່ອ 157,​7 ຕື້ກ່ວາກີບ.
ທ່ານ ບຸນແຫຼມ ກິວົງສັກ ໃຫ້ຮູ້ຕື່ມວ່າ: ສາເຫດທີ່ເຮັດໃຫ້ການສະໜອງສິນເຊືອບໍ່ໄດ້ຕາມແຜນ ເນື່ອງຈາກສະ​ພາບການແຜ່ລະບາດຂອງພະຍາດໂຄວິດ-19 ເຮັດໃຫ້ການເຄື່ອນໄຫວວຽກງານພົບຄວາມຫຍຸ້ງຍາກ ແລະ ບໍ່ສາມາດເຄື່ອນໄຫວໄດ້ຢ່າງເຕັມສ່ວນ ໂດຍສະເພາະໃນການເຂົ້າ​ເຖິງປະຊາຊົນ ການສະໜອງສິນເຊື່ອ ການເກັບໜີ້ບໍ່ໄປຕາມແຜນການທີ່ວາງໄວ້ເຮັດໃຫ້ຍອດໜີ້ ແລະ ດອກເບ້ຍຄ້າງຮັບເພີ່ມຂຶ້ນ ໃນໂອກາດດຽວກັນກອງປະຊຸມຍັງໄດ້ປຶກສາຫາລື ຄົ້ນຄ້ວາ ຫາວິທີທາງໃນການສະໜອງສິນເຊື່ອໃນຕໍ່ໜ້າໃຫ້ບັນລຸຕາມແຜນການທີ່ວາງໄວ້.

ພາບ-ຂ່າວ: ສຸດໃຈ