ມີເດຍລາວແຂວງໄຊສົມບູນ ຂ່າວ: ພຸດທະສອນ ເວດສະວົງ
ກອງປະຊຸມທາງໄກຜ່ານວິດີໂອ ເພື່ອປຶກສາຫາລື ກ່ຽວກັບການຈັດຕັ້ງປະຕິບັດຄຳສັ່ງເລກທີ 15/ນຍ ແລະ ມາດຕະການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ຂອງບັນດາແຂວງທົ່ວປະເທດ ໄດ້ຈັດຂຶ້ນໃນຕອນເຊົ້າຂອງວັນທີ 17 ພຶດສະພາ ນີ້ ພາຍໃຕ້ການເປັນປະທານຂອງ ທ່ານ ພັນຄຳ ວິພາວັນ ນາຍົກລັດຖະມົນຕີ ແຫ່ງ ສປປ ລາວ, ມີບັນດາກະຊວງ, ອົງການຂັ້ນສູນກາງ, ເຈົ້າຄອງນະຄອນຫລວງວຽງຈັນ, ບັນດາທ່ານເຈົ້າແຂວງ ແລະ ຄະນະສະເພາະກິດຂັ້ນແຂວງທົ່ວປະເທດ ເຂົ້າຮ່ວມ. ສຳລັບແຂວງໄຊສົມບູນ ເຂົ້າຮ່ວມໂດຍທ່ານ ພົຕ ຄຳລຽງ ອຸທະໄກສອນ ເຈົ້າແຂວງໄຊສົມບູນ ແລະ ທ່ານ ຕົ່ງມົວ ຊົວໂກ້ ຮອງເຈົ້າແຂວງ, ຫົວໜ້າຄະນະສະເພາະກິດ ແຂວງໄຊສົມບູນ ພ້ອມດ້ວຍຄະນະສະເພາະກິດ ຂັ້ນແຂວງ ແລະ ເມືອງອະນຸວົງ ເຂົ້າຮ່ວມ.

ໃນກອງປະຊຸມໄດ້ຮັບຟັງການລາຍງານການປະເມີນຜົນການປະຕິບັດມາດຕະການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ໄລຍະແຕ່ວັນທີ 6-17 ພຶດສະພາ ແລະ ທິດທາງແຜນການໃນຕໍ່ໜ້າ ແລະ ໄດ້ຮັບຟັງການລາຍງານການຈັດຕັ້ງປະຕິບັດວຽກງານຈາກນະຄອນຫລວງວຽງຈັນ, ແຂວງບໍແກ້ວ, ຈຳປາສັກ ແລະ ແຂວງສະຫວັນນະເຂດ ຈາກນັ້ນບັນດາຂະແໜງການ ແລະ ບັນດາແຂວງທົ່ວປະເທດໄດ້ມີຄຳເຫັນ ເພື່ອປຶກສາຫາລືກ່ຽວກັບການຈັດຕັ້ງປະຕິບັດວຽກງານຕ່າງໆ.

ສຳລັບຢູ່ແຂວງໄຊສົມບູນ ພາຍຫລັງໄດ້ຮັບຄຳສັ່ງເລກທີ 15/ນຍ ຂອງທ່ານນາຍົກລັດຖະມົນຕີ ວ່າດ້ວຍການເພີ່ມທະມາດຕະການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ການນຳແຂວງ ກໍໄດ້ສຸມໃສ່ຢ່າງແຂງແຮງ ໂດຍໄດ້ຜັນຂະຫຍາຍຄຳສັ່ງ, ແຈ້ງການຕ່າງຂອງສູນກາງງ ແລະ ລັດຖະບານ ມາເປັນຄຳສັ່ງ, ແຈ້ງການຂອງແຂວງ ພ້ອມທັງ ໄດ້ຈັດຕັ້ງເຜີຍແຜ່ເຊື່ອມຊຶມໃຫ້ແກ່ພະນັກງານ-ລັດຖະກອນ, ທະຫານ, ຕຳຫລວດ, ປະຊາຊົນບັນດາເຜົ່າ ຜູ້ປະກອບການຫ້າງຮ້ານ, ຫົວໜ່ວຍທຸລະກິດຕ່າງໆ ໃນທົ່ວແຂວງໄດ້ຮັບຮູ້ ແລະ ເຂົ້າໃຈຢ່າງທົ່ວເຖິງ ເຫັນວ່າບັນດາພະນັກງານ ຕະຫລອດຮອດປະຊາຊົນບັນດາເຜົ່າໄດ້ມີຄວາມເຂົົ້າໃຈ ແລະ ເປັນເຈົ້າການຕື່ນຕົວປະຕິບັດຢ່າງເຂັ້ມງວດ ນອກຈາກນີ້ ຍັງໄດ້ປິດການເຂົ້າ-ອອກ ແຂວງ ແລະ ຕັ້ງດ່ານກວດກາຄົນເຂົ້າ-ອອກແຂວງ ທັງໝົດ 9 ດ່ານ, ໄດ້ກຳນົດສູນຈຳກັດບໍລິເວນ ແລະ ສະຖານທີ່ປິ່ນປົວຂອງແຂວງ

ພ້ອມນີ້ ຍັງໄດ້ຮັບວັກຊິນຊະນິດຊີໂຮຟາມ ຈາກສູນກາງ ຈຳນວນ 2 ຄັ້ງ ລວມທັງໝົດ 8.400 ໂດສ, ໃນນີ້ ຊຸດທີ 1 ເຂັມທີ 1 ແມ່ນສັກສຳເລັດແລ້ວ100%, ສ່ວນເຂັມທີ 2 ຂອງຊຸດທີ 1 ແລະ ວັກຊິນທີ່ໄດ້ຮັບຊຸດທີ 2 ພວມຈັດຕັ້ງປະຕິບັດ ທົ່ວແຂວງໄດ້ເກັບຕົວຢ່າງໄປກວດຫາເຊື້ອຢູ່ສູນກາງ ຈຳນວນ 78 ຕົວຢ່າງ ຜົນກວດແມ່ນເປັນລົບ ຂະນະດຽວກັນກໍໄດ້ຮັບອຸປະກອນຕ່າງໆ ເປັນຕົ້ນ: ເຈວລ້າງມື, ເສື້ອກາວ ຫລື ຊຸດປ້ອງກັນ, ຜ້າອັດປາກ-ດັງ, ຖົງມື, ເກີບສຳລັບແພດ, ເຄື່ອງປັ່ນອົກຊີ່ທຽມ, ເຄື່ອງວິເຄາະ ແລະ ອື່ນໆ ລວມມູນຄ່າທັງໝົດ 440 ລ້ານກວ່າກີບ ໃນໂອກາດ ປະກອບຄຳເຫັນຕໍ່ກອງປະຊຸມທາງໄກຂອງທ່ານຄຳລຽງ ອຸທະໄກສອນ ເຈົ້າແຂວງໄຊສົມບູນ ຄັ້ງນີ້ ທ່ານ ໄດ້ສະເໜີທ່ານນາຍົກລັດຖະມົນຕີ ຊ່ວຍພິຈາລະນະເຄື່ອງກວດພະຍາດໂຄວິດ 19 ໜຶ່ງຊຸດ ແລະ ວັກຊິນກັນໂຄວິດ 19 ໃຫ້ແກ່ແຂວງໄຊສົມບູນ ຕື່ມອີກ.