ພິທີມອບເງິນລາງວັນຢ່າງເປັນທາງການ ໃຫ້ແກ່ລູກຄ້າທີ່ຖືກຫວຍຈຳນວນ 40.000.000 ກີບ ຂອງສາຂາ ຫວຍໂຊກໄຊ ໂດຍຊື້ຜ່ານທາງແອັບພິເຄຊັນ ຫຼື ຜະລິດຕະພັນ ຢູມັນນີ (U-money) ເຊິ່ງເປັນເຄືອຄ່າຍຂອງບໍລິສັດ Unitel ຈັດຂຶ້ນທີ່ງານວາງສະແດງສິນຄ້າ ຫໍຈາລຶກ 21 ມີນາ ເມືອງທ່າແຂກ ວັນທີ 18 ກຸມພາ 2021.
ເປັນກຽດມອບລາງວັນດັ່ງກ່າວໂດຍທ່ານ ຫງວຽນ ຕຽນ ບິ່ງ ອຳນວຍການບໍລິສັດ ສະຕາໂທລະຄົມ ສາຂາແຂວງຄຳມ່ວນ ແລະ ຜູ້ໂຊກດີແມ່ນທ້າວ ແສງຈັນ ໄຊຍະສານ ອາຍຸ 24 ປີ, ຢູ່ບ້ານສ້າງປຸ່ງບອນ ເມືອງຍົມມະລາດ ແຂວງຄຳມ່ວນ ຖືກຫວຍ 05 ໂຕ ທີ່ອອກໃນງວດວັນທີ 08 ກຸມພາ 2021 ເລກຫວຍທີ່ອອກແມ່ນ (64310).
ທ້າວ ແສງຈັນ ໄຊຍະແສງ ໄດ້ສະແດງຄວາມຮູ້ສຶກວ່າ: ຂ້າພະເຈົ້າໄດ້ຮູ້ຈັກກັບຜະລິດຕະພັນ ຫຼື ແອັບ U-money ຜ່ານພະນັກງານຂາຍຂອງບໍລິສັດ ຢູນິເທວ ເຊິ່ງແອັບດັ່ງກ່າວແມ່ນມີຄວາມສະດວກສະບາຍຫຼາຍຢ່າງ ສາມາດຕື່ມມູນຄ່າໂທ, ຊຳລະຄ່າອິນເຕີເນັດ, ສາມາດໂອນເງິນ, ຮັບເງິນ ແລະ ຊໍ້າລະຄ່າບໍລິການອື່ນໆໄດ້ ທີ່ສຳຄັນ ແມ່ນສາມາດຊື້ຫວຍຜ່ານແອັບນີ້ໄດ້ ແລະ ໃນນັ້ນຂ້າພະເຈົ້າກໍ່ມີຄວາມຮູ້ສຶກດີໃຈຫຼາຍ ທີ່ເປັນຜູ້ໂຊກດີ ຖືກຫວຍ 05 ໂຕ ໂດຍໄດ້ຊື້ຜ່ານແອັບ ຢູມັນນີ ຄືດັ່ງທີ່ໄດ້ມາຮັບລາງວັນໃນມື້ນີ້ ແລະ ຂ້າພະເຈົ້າກໍ່ຕ້ອງຂໍຂອບໃຈມາຍັງ ບໍລິສັດ ຢູນິເທວທີ່ໄດ້ສ້າງຜະລິດຕະພັນດີໆແບບນີ້ຂຶ້ນມາໃຫ້ລູກຄ້າໄດ້ໃຊ້ບໍລິການ ພ້ອມນັ້ນກໍ່ຂໍເຊີນຊວນໝູ່ເພື່ອນ ແລະ ພໍ່ແມ່ປະຊາຊົນ ໄດ້ມາໃຊ້ບໍລິການຜະລິດຕະພັນດັ່ງກ່າວ ເພື່ອຄວາມສະດວກສະບາຍ ໃນຊີວິດປະຈຳວັນຂອງທ່ານ ທັງປະຫຍັດເວລາ ແລະ ມີຄວາມປອດໄພສູງ.

ທ່ານ ຫງວຽນ ຕຽນ ບິ່ງ ອຳນວຍການບໍລິສັດ ສະຕາໂທລະຄົມ ຂາສາແຂວງຄຳມ່ວນ ໄດ້ກ່າວວ່າ: ຜະລິດຕະພັນ U-money ຂອງບໍລິສັດ ສະຕາວິນແທັກ ເຊິ່ງເປັນເຄືອຄ່າຍຂອງບໍລິສັດ ສະຕາໂທລະຄົມ ຫຼື ຢູນິເທວ ແມ່ນບໍລິການ ດ້ານການເງິນເທິງມືຖື ຫຼື ເອີ້ນວ່າກະເປົ່າເງິນເອເລັກໂຕຼນິກ ເພື່ອຊ່ວຍໃຫ້ປະຊາຊົນ ສາມາດເຮັດທຸລະກຳທາງດ້ານ ການເງິນໄດ້ ບໍ່ວ່າຈະເປັນການໂອນເງິນ-ຮັບເງິນ ແລະ ການຊຳລະຄ່າບໍລິການອື່ນໆເຊັ່ນ: ການຕື່ມມູນຄ່າໂທ, ການຊຳລະຄ່າອິນເຕີເນັດ, ຄ່າປະກັນໄພ ແລະ ໃນໄວໆນີ້ຍັງຈະມີການຊຳລະຄ່າໄຟຟ້າ, ນໍ້າປະປາ ເຊິ່ງມີຄວາມ ສະດວກ, ປອດໄພ ສາມາດເຮັດທຸລະກຳໄດ້ ທຸກທີ່ ທຸກເວລາ ໃຜກໍ່ໃຊ້ໄດ້ ພຽງແຕ່ມີສັນຍານຂອງ ຢູນິເທວ. ທ່ານ ຫງວຽນ ຕຽນ ບິ່ງ ກ່າວຕື່ມວ່າ: U-money ແມ່ນສາມາດໃຫ້ບໍລິການແລ້ວກວມ 10 ຕົວເມືອງ ຂອງແຂວງຄຳມ່ວນ ປະຈຸບັນມີລູກຄ້າທີ່ຊົມໃຊ້ແອັບດັ່ງກ່າວແລ້ວຈຳນວນ 40 ພັນກວ່າເລກໝາຍ, ມີຕົວແທນທີ່ລູກຄ້າສາມາດໂອນເງິນ-ຖອນເງິນໄດ້ແລ້ວ 250 ກວ່າຮ້ານ ແລະ ມີຮ້ານທີ່ຮັບນໍາໃຊ້ເງິນ U-money ຜ່ານ ຢູອາໂຄດ ຈຳນວນ 1.000 ກວ່າຮ້ານ ໃນທົ່ວແຂວງຄຳມ່ວນ.