ມີເດຍລາວແຂວງບໍ່ແກ້ວ ພາບ-ຂ່າວ: ພອນສະຫວັນ ມະນີສີ.
ກອງປະຊຸມຝຶກອົບຮົມວຽກງານກໍ່ສ້າງຮາກຖານການເມືອງ, ພັດທະນາຊົນນະບົດ, ວຽກງານ 3 ສ້າງ ແລະ ວຽກງານແກ້ໄຂປະກົດການຫຍໍ້ທໍ້ ຕາມ 8 ແຜນວຽກ ຂອງເມືອງປາກທາ ໄດ້ໄຂຂື້ນໃນວັນທີ 28 ມິຖຸນານີ້ ທີ່ສະໂມສອນຂອງເມືອງ ໂດຍການຂົ້າຮ່ວມເປັນປະທານ ຂອງທ່ານ ຈອມສິ ລັດຕະນະປັນ ຮອງເລຂາພັກແຂວງ ປະທານສະພາປະຊາຊົນແຂວງບໍ່ແກ້ວ ທ່ານ ພັອ ບຸນມີ ພາມີໄຊ ກຳມະການພັກແຂວງ ຫົວໜ້າການເມືອງກອງບັນຊາການທະຫານແຂວງບໍ່ແກ້ວ ທ່ານ ສຸໄລ ດວງຜາຄຳ ກຳມະການພັກແຂວງ ເລຂາພັກເມືອງ ເຈົ້າເມືອງປາກທາ ມີຄະນະປະຈຳພັກ-ກຳມະການພັກເມືອງ, ຫົວໜ້າຫ້ອງການ, ພະນັກງານຫຼັກແຫຼງຂອງເມືອງເຂົ້າຮ່ວມ.

ທ່ານ ຈອມສິ ລັດຕະນະປັນ ຮອງເລຂາພັກແຂວງ ປະທານສະພາປະຊາຊົນ ແຂວງບໍ່ແກ້ວ ໄດ້ກ່າວຕໍ່ກອງປະຊຸມຄັ້ງນີ້ວ່າ: ວຽກງານກໍ່ສ້າງຮາກຖານການເມືອງ ແມ່ນການຈັດຕັ້ງລຸ່ມສຸດຂອງພັກ-ລັດ, ອົງການຈັດຕັ້ງມະຫາຊົນ, ກຳລັງປະກອບອາວຸດ, ແມ່ນບ່ອນຈັດຕັ້ງປະຕິບັດແນວທາງຂອງພັກ,ກົດໝາຍຂອງລັດຕົວຈິງ ແມ່ນບ່ອນຮັບຜິດຊອບຜັນຂະຫຍາຍ ຈັດຕັ້ງປະຕິບັດທຸກແນວທາງແຜນນະໂຍບາຍຂອງພັກ-ລະບຽບກົດໝາຍຂອງລັດ ພັກເຮົາຍາມໃດກໍ່ເອົາໃຈໃສ່ ແລະ ວາງແຜນນະໂຍບາຍກ່ຽວກັບຮາກຖານອອກຢ່າງຖືກຕ້ອງສອດຄ່ອງກັບແຕ່ລະໄລຍະຂອງການປະຕິວັດ ແມ່ນການສ້າງຂະບວນການ, ສ້າງພະນັກງານ ສະມາຊິກພັກໃຫ້ເຕີບໃຫ່ຍຂື້ນໃນຂະບວນວຽກງານຕົວຈິງ ກອງປະຊຸມ

ທ່ານ ສຸໄລ ດວງຜາຄຳ ກຳມະການພັກແຂວງເລຂາພັກເມືອງ ເຈົ້າເມືອງປາກທາ ພ້ອມດ້ວຍຄະນະຮັບຜິດຊອບຊີ້ນຳວຽກງານກໍ່ສ້າງຮາກຖານການເມືອງຂອງແຂວງ, ຂອງເມືອງກໍ່ໄດ້ຜັດປ່ຽນກັນຜ່ານເອກະສານສຳຄັນເປັນຕົ້ນກໍ່ແມ່ນ ມະຕິ 03/ກມສພ ວ່າດ້ວຍການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ, ສ້າງບ້ານເປັນຫົວໜ່ວຍພັດທະນາ, ມະຕິ 056/ກມສພ ລົງວັນທີ 19 ທັນວາ 2018 ວ່າດ້ວຍການປັບປຸງວຽກງານກໍ່ສ້າງຮາກຖານການເມືອງ ຂອງລະບອບປະຊາທິປະໄຕ ປະຊາຊົນໃຫ້ເຂັ້ມແຂງ ແລະ ໜັກແໜ້ນ, ດຳລັດຂອງລັດຖະບານ 348/ລບ ວ່າດ້ວຍມາດຕະຖານພົ້ນທຸກ, ມາດຕະຖານພັດທະນາ, ມາດຕະຖານສ້າງບ້ານໃຫ່ຍເປັນຕົວເມືອງນ້ອຍໃນຊົນນະບົດ ແລະ ມາດຕະຖານສ້າງເມືອງເຂັ້ມແຂງຮອບດ້ານ, ສະເໜີພາລະບົດບາດຂອງພະນັກງານລົງກໍ່ສ້າງຮາກຖານ ແນະນຳການສະຫຼຸບ ແລະ ວາງທິດທາງແຜນການ, ຜ່ານຂໍ້ຕົກລົງຂອງທ່ານເຈົ້າແຂວງ ສະບັບເລກທີ 351/ຈຂ.ບກ ລົງວັນທີ 5 ພຶດສະພາ 2021 ວ່າດ້ວຍການຮັບຮອງບ້ານພົ້ນທຸກ, ບ້ານພັດທະນາຮອບດ້ານ, ສ້າງບ້ານໃຫ່ຍໃຫ້ກາາຍເປັນຕົວເມືອງນ້ອຍໃນຊົນນະບົດ ແລະ ສ້າງເມືອງເຂັ້ມແຂງຮອບດ້ານ,

ມະຕິຕົກລົງຂອງຄະນະປະຈຳພັກແຂວງ ສະບັບເລກທີ 766/ຄປພຂ.ບກ ລົງວັນທີ 14 ມິຖຸນາ 2021 ວ່າດ້ວຍການແຕ່ງຕັ້ງຄະນະຊີ້ນຳລວມ, ຄະນະຮັບຜິດຊອບນຳພາບັນຊາຕົວຈິງ ແລະ ພະນັກງານຂອງແຂວງ ຂອງເມືອງ ລົງກໍ່ສ້າງຮາກຖານການເມືອງ, ພັດທະນາຊົນນະບົດ ແລະ ວຽກງານ 3 ສ້າງຂອງແຂວງບໍ່ແກ້ວ ຢູ່ເມືອງປາກທາ ຈາກນັ້ນຜູ້ເຂົ້າຮ່ວມກອງປະຊຸມກໍ່ໄດ້ຜັດປ່ຽນກັນປະກອບຄຳຄິດຄຳເຫັນຕໍ່ບັນຫາຕ່າງໆໃນວຽກງານກໍ່ສ້າງຮາກຖານການເມືອງຍົກໃຫ້ເຫັນດ້ານດີ ແລະ ຂໍ້ຄົງຄ້າງ ເພື່ອປັບປຸງໃຫ້ຖືກຕ້ອງສອດຄ່ອງກັບວຽກງານຕົວຈິງໃນຮາກຖານທ້ອງຖິນຂອງຕົນ ກອງປະຊຸມໄດ້ດຳເນີນໄປເປັນເວລາ 1 ວັນເຕັມ ຈຶງສຳເລັດ.