ມີເດຍລາວແຂວງເຊກອງ ພາບ-ຂ່າວ: ພຸດທະສອນ ໃນຕອນເຊົ້າວັນທີ 24 ມິຖຸນາ ນີ້, ພະແນກພະລັງງານ ແລະບໍ່ແຮ່ ແຂວງເຊກອງ ໄດ້ຈັດກອງປະຊຸມ ເຊື່ອມຊຶມຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ແລະມະຕິກອງປະຊຸມໃຫຍ່ ຄັ້ງທີ X ຂອງອົງຄະນະພັກແຂວງ, ຊຶ່ງໄດ້ຈັດຂຶ້ນທີ່ສະໂມສອນສະພາແຂວງ ໂດຍການເປັນປະທານຂອງສະຫາຍ ຂັນຕີ ສີລະວົງສາ ກໍາມະການປະຈຳພັກແຂວງ, ຮອງເຈົ້າແຂວງ, ມີຄະນະພັກຮາກຖານ, ຄະນະໜ່ວຍພັກ 3 ໜ່ວຍພັກທີ່ຂຶ້ນກັບຄື: ໜ່ວຍພັກພະແນກພະລັງງານ ແລະບໍ່ແຮ່, ໜ່ວຍພັກລັດວິສາຫະກິດໄຟຟ້າລາວ ສາຂາ ແຂວງເຊກອງ, ໜ່ວຍພັກເຂື່ອນໄຟຟ້າກ້ວຍລໍາພັນ, ຕະຫຼອດຮອດສະມາຊິກພັກ-ພະນັກງານລັດຖະກອນ ແລະແຂກຖືກເຊີນຂະແໜງການທີ່ກ່ຽວຂ້ອງເຂົ້າຮ່ວມ.

ສະຫາຍ ເພັດສະໝອນ ຄອນປະສິດ ເລຂາຄະນະພັກຮາກຖານພະແນກພະລັງງານ ແລະບໍ່ແຮ່ ໄດ້ຍົກໃຫ້ເຫັນເຖິງຄວາມໝາຍຄວາມສຳຄັນ, ຈຸດປະສົງ ໃນການຈັດຕັ້ງເຊື່ອມຊຶມ ຜັນຂະຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະມະຕິກອງປະຊຸມໃຫຍ່ ຄັ້ງທີ X ຂອງອົງຄະນະພັກແຂວງ ໃນຄັ້ງນີ້ ກໍເພື່ອແນໃສ່ເຮັດໃຫ້ການນຳ, ສະມາຊິກພັກໃນຂົງເຂດພະລັງງານ ແລະບໍ່່ແຮ່ ຮັບຮູ້ເຂົ້າໃຈຢ່າງເລິກເຊິ່ງ ແລະມີຄວາມເປັນເອກະພາບສູງໃນການຈັດຕັ້ງປະຕິບັດຕົວຈິງຕໍ່ເນື້ອໃນມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິ X ຂອງອົງຄະນະພັກແຂວງ ໂດຍສະເພາະແມ່ນເນື້ອໃນຕົ້ນຕໍ ແລະວຽກງານຈຸດສຸມທີ່ຕ້ອງເອົາໃຈໃສ່ນຳພາ-ຊີ້ນຳ ໃນຂົງເຂດວຽກງານພະລັງງານ ແລະບໍ່ແຮ່ ໂດຍຫັນເປັນແຜນງານ, ໂຄງການ ແລະກິດຈະກຳຢ່າງລະອຽດຂອງຕົນ ເພື່ອຈັດຕັ້ງປະຕິບັດໃຫ້ເກີດຜົນ ແລະເປັນບັ້ນດຳເນີນຊີວິດການເມືອງພາຍໃນພັກ ເພື່ອສ້າງການຫັນປ່ຽນໃໝ່ທີ່ແຂງແຮງ ແລະເປັນລະບົບ ໂດຍເລີ່ມຈາກການຫັນປ່ຽນດ້ານແນວຄິດ-ຈິນຕະນາການ ສູ່ການກະທຳຕົວຈິງ ໃນການແກ້ໄຂຈຸດອ່ອນ ແລະບັນຫາຂໍ້ຄົງຄ້າງ ໃຫ້ມີການຫັນປ່ຽນໃໝ່ທີ່ເຂັ້ມແຂງກວ່າເກົ່າ.

ນອກນັ້ນ ຍັງໄດ້ເຊື່ອມຊຶມກົດລະບຽບພັກປະຊາຊົນປະຕິວັດລາວ ສະໄໝທີ XI ແລະແຜນພັດທະນາເສດຖະກິດສັງຄົມ 5 ປີຂອງແຂວງ, ແຜນພັດທະນາເສດຖະກິດສັງຄົມ 5 ປີຂອງຂະແໜງພະລັງງານ ແລະບໍ່ແຮ່ (ແຕ່ປີ2021-2025) ຊຶ່ງເປັນການສຶບຕໍ່ປະຕິບັດຍຸດທະສາດການພັດທະນາຮອດປີ 2025 ແລະ ວິໄສທັດຮອດປີ 2030 ໂດຍສຶບຕໍ່ປະຕິບັດແນວທາງປ່ຽນແປງໃໝ່ຮອບດ້ານຢ່າງມີຫລັກການຂອງພັກ ກໍຄືການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະມະຕິກອງປະຊຸມໃຫຍ່ ຄັ້ງທີ X ຂອງອົງຄະນະພັກແຂວງຢ່າງເປັນເຈົ້າການ, ສຸມທຸກກຳລັງແຮງເຮັດໃຫ້ເສດຖະກິດຂອງແຂວງ ຂະຫຍາຍຕົວຕໍ່ເນື່ອງ ແລະລຶບລ້າງຄວາມທຸກຍາກ ຂອງປະຊາຊົນໃຫ້ນັບມື້ຫຼຸດໜ້ອຍຖອຍລົງເປັນກ້າວໆ.

ໂອກາດນີ້ ສະຫາຍ ຂັນຕີ ສີລະວົງສາ ໄດ້ໃຫ້ກຽດໂອ້ລົມໃຫ້ທິດຊີ້ນໍາຫຼາຍບັນຫາ ຕໍ່ຄະນະພັກ-ຄະນະນໍາ ໃຫ້ຖືເອົາບົດບາດການນໍາພາຕາມລະບອບແບບແຜນ, ນໍາພາເປັນໝູ່ຄະນະ, ແບ່ງງານແບ່ງຄວາມຮັບຜິດຊອບຢ່າງລະອຽດຈະແຈ້ງ, ຕ້ອງເພີ່ມຄວາມເຂັ້ມງວດໃນການຄຸ້ມຄອງພັກ, ຄຸ້ມຄອງລັດຕາມລະບຽບກົດໝາຍຢ່າງເຄັ່ງຄັດ, ພ້ອມນີ້ ຍັງຮຽກຮ້ອງໃຫ້ສະມາຊິກທຸກສະຫາຍ ກໍາແໜ້ນ ແລະນໍາເອົາເນື້ອໃນທີ່ໄດ້ເຊື່ອມຊຶມໃນຄັ້ງນີ້ ໄປຈັດຕັ້ງຜັນຂະຫຍາຍເປັນແຜນງານ, ໂຄງການ ຕິດພັນກັບວຽກງານວິຊາສະເພາະໃນຂະແໜງການຕົນໃຫ້ເກີດດອກອອກຜົນທີ່ດີລື່ນເກົ່າ.