ມີເດຍລາວແຂວງບໍ່ແກ້ວ ກອງປະຊຸມຝຶກອົບຮົມວຽກງານກໍ່ສ້າງຮາກຖານການເມືອງ, ພັດທະນາຊົນນະຊົນ, ວຽກງານ 3 ສ້າງ, ວຽກງານແກ້ໄຂປະກົດການຫຍໍ້ທໍ້ຕາມ 8 ແຜນວຽກ ແລະ ວາງທິດທາງແຜນການວຽກງານຈຸດສຸມ 5 ປີ,ໄດ້ຈັດຂຶ້ນໃນວັນທີ 29 ມິຖຸນາ 2021ນີ້ ຢູ່ທີ່ສະໂມສອນຂອງເມືອງ ໂດຍການເປັນປະທານຂອງ ທ່ານ ເພັງສອນ ແກ້ວວິໄລ ຮອງເລຂາພັກແຂວງ, ມີທ່ານ ດາລີວັນ ພູສະຫວັນ ຄະນະປະຈຳພັກແຂວງ ປະທານແນວລາວສ້າງຊາດແຂວງ ແລະ ທ່ານ ສົມສັກ ປິ່ນແກ້ວ ກຳມະການພັກແຂວງ ເລຂາພັກເມືອງ ເຈົ້າເມືອງໆເມິງ ພ້ອມດ້ວຍຄະນະປະຈໍາພັກເມືອງ, ກຳມະການພັກເມືອງ, ຫົວໜ້າຫ້ອງການ, ສອງກອງບັນຊາການ ປກຊ-ປກສ ,ຄະນະຮັບຜິດຊອບຊີ້ນໍາວຽກງານກໍ່ສ້າງຮາກຖານການເມືອງຂັ້ນແຂວງ, ຂັ້ນເມືອງ, ພະນັກງານລົງກໍ່ສ້າງຮາກຖານ ແລະ ຄະນະພັກ – ອຳນາດການປົກຄອງບ້ານຈຸດສູມ ເຂົ້າຮ່ວມ.

ໃນກອງປະຊຸມທ່ານ ເພັງສອນ ແກ້ວວິໄລ ຮອງເລຂາພັກແຂວງ ບໍ່ແກ້ວ ໄດ້ຍົກໃຫ້ເຫັນຄວາມໝາຍຄວາມສຳຄັນ,ຄວາມຈຳເປັນໃນການລົງກໍ່ສ້າງຮາກຖານການເມືອງ, ເພາະຮາກຖານແມ່ນການຈັດຕັ້ງລຸ່ມສຸດຂອງພັກ – ລັດ ອົງການຈັດຕັ້ງມະຫາຊົນ, ກຳລັງປະກອບອາວຸດ ແມ່ນບ່ອນຮັບຜິດຊອບຜັນຂະຫຍາຍ ແລະ ຈັດຕັ້ງປະຕິບັດທຸກແນວທາງ ແຜນນະໂຍບາຍຂອງພັກ ລະບຽບກົດ ໝາຍຂອງລັດ ແຜນພັດທະນາເສດຖະກິດ-ສັງຄົມ ແລະ ແຜນວຽກງານຕ່າງໆຂອງລັດຖະບານ ກໍ່ຄືອຳນາດການປົກຄອງທ້ອງຖິ່ນວາງອອກ, ແມ່ນບ່ອນຝຶກຝົນຫຼໍ່ຫຼອມພະນັກງານ, ສະມາຊິກພັກ ຂັ້ນເມືອງ, ຂັ້ນແຂວງ ແລະ ປະເທດ,

ພ້ອມນັ້ນ ທ່ານ ເພັງສອນ ແກ້ວວິໄລ ແລະ ບັນດາຄະນະຮັບຜິດຊອບຊີ້ນໍາວຽກງານກໍ່ສ້າງຮາກຖານການເມືອງຂັ້ນແຂວງ, ຂັ້ນເມືອງ ກໍ່ໄດ້ຜັດປ່ຽນກັນເຜີຍແຜ່ບັນດາເອກະສານວຽກງານການລົງກໍ່ສ້າງຮາກຖານການເມືອງ ເປັນຕົ້ນ ມະຕິ 065 ຂອງກົມການເມືອງສູນກາງພັກ ວ່າດ້ວຍ ການປັບປຸງຮາກຖານການເມືອງ ລະບອບປະຊາທິປະໄຕປະຊາຊົນ ໃຫ້ມີຄວາມເຂັ້ມແຂງ ແລະ ໜັກແໜ້ນ; ມະຕິ 03 ຂອງກົມການເມືອງສູນກາງພັກ ວ່າດ້ວຍ ການສ້າງແຂວງເປັນຫົວໜ່ວຍຍູດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ,ດຳລັດ 348 ຂອງລັດຖະບານ ວ່າດ້ວຍມາດຖານພົ້ນທຸກ ແລະ ມາດຕະຖານພັດທະນາ, ທິດທາງແຜນການວຽກງານກໍ່ສ້າງຮາກຖານຢູ່ເມືຶອງ ແຕ່ນີ້ຮອດປີ 2025, ແບບຟອມການຂຽນບົດສະຫຼຸບ ແລະ ທິດທາງແຜນການ, ພາລະບົດບາດຂອງພະນັກງານກໍ່ສ້າງຮາກຖານການເມືອງ ແລະ ລະບອບປະສານງານ, ເອກະສານແກ້ໄຂປາກົດການຫຍໍ້ທໍ້ຕາມ 8 ແຜນວຽກ,

ຈາກນັ້ນບັນດາຜູ້ເຂົ້າຮ່ວມກໍ່ໄດ້ປະກອບຄໍາຄິດຄໍາເຫັນຕໍ່ບັນຫາຕ່າງໆໃນການລົງກໍ່ສ້າງຮາກຖານການເມືອງຕາມແຜນວຽກງານຈຸດສຸມທີ່ໄດ້ວາງໄວ້ ເປັນຕົ້ນ ແຜນການສ້າງ 5 ບ້ານຈຸດສຸມຂອເມືອງໃຫ້ເປັນບ້ານພົ້ນທຸກ, ແຜນສ້າງບ້ານພັດທະນາໃຫ້ໄດ້ຕາມເປົ້າໝາຍ, ແຜນການສ້າງຈຸດສຸມຕົວແບບຊຸມຊົນພັດທະນາຊົນນະບົດໃຫ້ໄດ້ 1 ຈຸດສຸມ , ແຜນການສ້າງເມືອງ ຕົ້ນເຜິ້ງ ເປັນເມືອງເຂັ້ມແຂງຮອບດ້ານ ແລະ ບັນຫາອື່ນໆ.