ໃນວັນທີ 3 ມິຖຸນາ ຜ່ານມານີ້ ທ່ານ ພູວົງ ສີສົມຮັກ ຫົວໜ້າພະແນກກະ ສິກຳ ປ່າໄມ້ແຂວງຫົວພັນ, ທ່ານ ດາວເພັດ ພົມສຸວັນ ເຈົ້າເມືອງໆກວັນ ພ້ອມດ້ວຍຂະແໜງການທີ່ກ່ຽວຂ້ອງ ໄດ້ລົງຊຸກຍູ້ຊາວກະສິກອນຜູ້ປູກກາເຟ ບ້ານໜອງແຫວນ ເມືອງກວັນ ແຂວງຫົວພັນ.

ທ່ານ ສີພອນ ນາຍບ້ານໆໜອງແຫວນໃຫ້ຮູ້ວ່າ: ການທົດລອງປູກກາເຟຢູ່ບ້ານໜອງແຫວນ ແມ່ນໄດ້ເລີ່ມປູກມາແຕ່ປີ 2017 ມີ 39 ຄອບຄົວ ມີເນື້ອທີ່ທັງໝົດ 39,5 ເຮັກຕາ ຊຶ່ງໄດ້ຮັບການສະໜັບສະໜູນ ແລະ ສະໜອງແນວພັນເບ້ຍກາເຟ ຈາກໂຄງການພັດທະນາເພື່ອທົດແທນ ການປູກຝິ່ນ. ຂັ້ນຕອນຂອງການປູກນັ້ນແມ່ນປູກຕາມການແນະນຳເຕັກ ນິກ ແລະ ວິທີການປູກຈາກວິຊາການຂອງຂະແໜງການກ່ຽວຂ້ອງ, ມາຮອດປີ 2019 ກໍສາມາດເກັບກູ້ຜົນລະປູກໄດ້ 3 ໂຕນ ເປັນກາເຟ ໝາກແດງ ຂາຍສົ່ງອອກດ້ວຍລາຄາກິໂລລະ 2.700 ກີບ, ຕົກເປັນເງິນທັງໝົດ 8 ລ້ານກວ່າກີບ, ມາຮອດປີ 2020-2021 ນີ້ ສາມາດເກັບກູ້ກາເຟໝາກແດງໄດ້ທັງໝົດ 33 ໂຕນ ຂາຍສົ່ງອອກ ເປັນເງິນທັງໝົດ 89 ລ້ານກວ່າກີບ ແລະ ປັດຈຸບັນນີ້ ບໍລິສັດມາລົງໂກ ໄດ້ເຊັນສັນຍາຮັບເປັນສະມາຊິກກາເຟວັນໃໝ່ ພ້ອມທັງຮັບຊື້ນຳຊາວກະສິກອນ ດ້ວຍລາຄາກາເຟໝາກແດງ 2.700 ກີບ ຕໍ່ກິໂລ, ໝາກຂາວ 28.000 ກີບຕໍ່ກິໂລ. ຍ້ອນເຫັນໄດ້ຄວາມສຳຄັນດັ່ງກ່າວ ປີ 2021 ນີ້ ບ້ານດັ່ງກ່າວຈຶ່ງໄດ້ບຸກເບີກເນື້ອທີ່ປູກຕື່ມໄດ້ 2 ເຮັກຕາ  ແລະ ຕ້ອງການເບ້ຍກາເຟປູກ 3.500 ເບ້ຍ.

ໂອກາດນີ້ທ່ານຫົວໜ້າພະແນກກະສິກຳ ແລະ ປ່າໄມ້ແຂວງ ໄດ້ເນັ້ນໃຫ້ອຳນາດການປົກຄອງ ແລະ ຊາວກະສິກອນຜູ້ປູກກາເຟ ໃຫ້ເອົາໃຈໃສ່ບົວລະບັດຮັກສາຕາມການແນະນຳຂອງວິຊາການ ຈາກພາກສ່ວນກ່ຽວຂ້ອງ ເພື່ອໃຫ້ໄດ້ຮັບຜົນຜະລິດເກັບກູ້ໄດ້ຍາວນານ ສິ່ງສຳຄັນຕ້ອງເໜັ້ນຄຸນນະພາບ ເພາະມັນເປັນຊ່ອງທາງໜຶ່ງທີ່ສາມາດສ້າງລາຍຮັບໃຫ້ ຄອບຄົວ ໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ.

 ພາບ-ຂ່າວ: ຖວທ ເມືອງກວັນ ແຂວງຫົວພັນ