ມີເດຍລາວແຂວງຄຳມ່ວນ ວັນທີ 30 ມິຖຸນາ 2021 ພະແນກກະສິກຳ ແລະ ປ່າໄມ້ແຂວງຄຳມ່ວນ ໄດ້ຈັດພິທີປະກາດການຊັບຊ້ອນ ພະນັກງານ-ວິຊາການ ຂອງພະແນກກະສິກຳ ແລະ ປ່າໄມ້ແຂວງ ໃຫ້ແກ່ບັນດາຫ້ອງການກະສິກຳ ແລະ ປ່າໄມ້ເມືອງ ແລະ ຂະແໜງການອ້ອມຂ້າງພະແນກ ໂດຍເປັນກຽດເຂົ້າຮ່ວມຂອງທ່ານ ບຸນຈັນ ໄຊປັນຍາ ຫົວໜ້າພະແນກກະສິກຳ ແລະ ປ່າໄມ້ແຂວງ, ມີບັນດາທ່ານໃນຄະນະພະແນກ, ຄະນະຂະແໜງການອ້ອມຂ້າງ ຕະຫຼອດເຖີງພະນັກງານ-ວິຊາການເຂົ້າຮ່ວມ.

ທ່ານ ສຸກັນ ອິນທະນູຮັກ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ ໄດ້ຜ່ານຂໍ້ຕົກລົງຂອງຫົວໜ້າ ພະແນກກະສິກຳ ແລະ ປ່າໄມ້ແຂວງ ວ່າດ້ວຍການປະກອບພະນັກງານຢູ່ພະແນກກະສິກຳ ແລະ ປ່າໄມ້ແຂວງ ໃຫ້ບັນດາຫ້ອງການກະສິກຳ ແລະ ປ່າໄມ້ 10 ຕົວເມືອງ ແລະ ຂະແໜງການອ້ອມຂ້າງພະແນກ ເຊິ່ງປະກອບມີ: ຫ້ອງການບໍລິຫານ ແລະ ຈັດຕັ້ງ ຈຳນວນ 01 ທ່ານ, ກອງອຸທິຍານແຫ່ງຊາດ ຫີນໜາມໜໍ່ 01 ທ່ານ, ຫ້ອງການກະສິກຳ ແລະ ປ່າໄມ້ເມືອງທ່າແຂກ ຈຳນວນ 04 ທ່ານ, ເມືອງມະຫາໄຊ 03 ທ່ານ, ເມືອງໜອງບົກ 05 ທ່ານ, ເມືອງຫີນບູນ 07 ທ່ານ, ເມືອງຍົມມະລາດ 05 ທ່ານ, ເມືອງບົວລະພາ 05 ທ່ານ, ເມືອງນາກາຍ 07 ທ່ານ, ເມືອງເຊບັ້ງໄຟ 06 ທ່ານ, ເມືອງໄຊບົວທອງ 07 ທ່ານ ແລະ ເມືອງຄູນຄຳ 06 ທ່ານ.

ທັງນີ້ກໍ່ເພື່ອຕອບສະໜອງກັບຄວາມຮຽກຮ້ອງ ຕ້ອງການຂອງໜ້າທີ່ວຽກງານໃນໄລຍະໃໝ່ ໂດຍສະເພາະແມ່ນການປະກອບບຸກຄະລາກອນເຂົ້າໃນຕຳແໜ່ງງານຕ່າງໆ ເພື່ອສ້າງຄວາມເຂັ້ມແຂງໃກ້ແກ່ຫ້ອງການກະສິກຳ ແລະ ປ່າໄມ້ໃນຂັ້ນເມືອງ ແນໃສ່ເຮັດໃຫ້ການຈັດຕັ້ງປະຕິບັດ ໜ້າທີ່ວຽກງານຢູ່ໃນຂັ້ນເມືອງມີຄວາມສະດວກ, ວ່ອງໄວ, ບັນລຸຕາມຄາດໝາຍ ແລະ ມີປະສິດທິຜົນດີຂຶ້ນກວ່າເກົ່າ.