ມີເດຍລາວແຂວງຫຼວງນ້ຳທາ ຂ່າວ: ສົມພອນ ຂຸນດາວົງ ວັນທີ 25 ມີຖຸນາ 2021 ຢູ່ທີ່ພະແນກກະສິກຳ ແລະ ປ່າໄມ້ແຂວງຫຼວງນໍ້າທາ ໄດ້ເປີດກອງປະຊຸມສະຫຼຸບວຽກງານກະສິກຳ ແລະ ປ່າໄມ້ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2021 ໂດຍການເປັນປະທານຂອງ ທ່ານ ພິມແກ້ວ ທໍາລະສິນ ກຳມະການພັກແຂວງ, ເລຂາຄະນະພັກຮາກຖານ ຫົວໜ້າພະແນກກະສິກຳ ແລະ ປ່າໄມ້ແຂວງ, ມີເລຂາໜ່ວຍພັກທີ່ຂຶ້ນກັບພະແນກກະສິກຳ ແລະ ປ່າໄມ້,ຫົວໜ້າຂະແໜງ,ຮອງຫົວໜ້າຂະແໜງ ແລະ ພະນັກງານລັດຖະກອນພາຍໃນພະແນກເຂົ້າຮ່ວມ.

ກອງປະຊຸມໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານກະສິກຳ ແລະ ປ່າໄມ້ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2021 ຂະແໜງກະສິກຳ ແລະ ປ່າໄມ້ ແມ່ນຂະແໜງການໜຶ່ງທີ່ມີບົດບາດສຳຄັນໃນໂຄງປະກອບເສດຖະກິດຂອງແຂວງຫຼວງນໍ້າທາ, ເຊິ່ງການຂະຫຍາຍຕົວຂອງຂະແໜງກະສິກຳ ແລະ ປ່າໄມ້ໃນປີ 2020 ຢູ່ໃນລະດັບ 8,84% ກວມເອົາ 49,95% ຂອງ GDP ຂອງແຂວງຫຼວງນໍ້າທາ, ໃນ 6 ເດືອນຜ່ານມາໄດ້ສົ່ງເສີມການຜະລິດກະສິກຳທີ່ກາຍເປັນສິນຄ້າທັງພາຍໃນ ແລະ ສົ່ງອອກໄປຕ່າງປະເທດເຊັ່ນ: ສາລີຫວານ 220 ເຮັກຕາ ,ຜົນຜະລິດໄດ້ 3.964 ໂຕນ, ທຽບໃສ່ເນື້ອທີ່ແຜນການປີປະຕິບັດໄດ້ 44%, ເຜືອກ,ມັນຕ່າງໆ 2.213 ເຮັກຕາ ຜົນຜະລິດໄດ້ 58.550 ໂຕນທຽບໃສ່ເນື້ອທີ່ແຜນການປີ ປະຕິບັດໄດ້ 88%, ພຶດຜັກຕ່າງໆ 1.754 ເຮັກຕາຜົນຜະລິດໄດ້ 9.633 ໂຕນ ທຽບໃສ່ເນື້ອທີ່ແຜນການປີ ປະຕິບັດໄດ້ 49% ທິດທາງແຜນການ 6 ເດືອນທ້າຍປີຈະໄດ້ສືບຕໍ່ສູ້ຊົນເຮັດໃຫ້ການຂະຫຍາຍຕົວຂອງລວມຍອດຜະລິດຕະພັນຂະແໜງກະສິກຳ ແລະ ປ່າໄມ້ເພີ່ມຂຶ້ນໃນລະດັບ 5,28% ຂຶ້ນໄປ,ກວມເອົາ46,68% ຂອງ GDPແຂວງຫຼວງນໍ້າທາ ເພື່ອປະກອບສ່ວນໃຫ້ໂຄງປະກອບເສດຖະກິດຂອງແຂວງຂະຫຍາຍຕົວໃນລະດັບ 5,50%, ສູ້ຊົນຜະລິດເຂົ້າເປືອກໃຫ້ໄດ້ 59.305 ໂຕນ,ສູ້ຊົນເຮັດໃຫ້ອັດຕາການບໍລິໂພກຊີ້ນ – ປາ -ໄຂ່ ໃຫ້ໄດ້ລະດັບ 57 ກິໂລ/ຄົນ/ ປີ ສືບຕໍ່ຟື້ນຟູປ່າໄມ້ໂດຍການບົວລະບັດຮັກສາເນື້ອທີ່ປ່າໄມ້ທີ່ໄດ້ປູກແລ້ວໃຫ້ປົກກະຕິ,ສູ້ຊົນສະໜອງນໍ້າໃຫ້ແກ່ເນື້ອທີ່ທຳການຜະລິດລະດູຝົນເພີ່ມອີກ 1.445 ເຮັກຕາ.

ທ່ານ ທອງສອນ ສີສຸລິນ ຮອງເລຂາໜ່ວຍພັກຫ້ອງການບໍລິຫານ ແລະ ແຜນການ ພະແນກກະສິກໍາ ແລະ ປ່າໄມ້ ຕາງໜ້າ 6 ໜ່ວຍພັກຄື: ໜ່ວຍພັກຫ້ອງການບໍລິຫານ ແລະ ແຜນການ,ໜ່ວຍພັກປູກຝັງ,ທີ່ດີນກະສິກໍາ ແລະ ຊົນລະປະທານ,ໜ່ວຍພັກຂະແໜງລ້ຽງສັດ ແລະ ສູນຝືກອົບຮົມເຕັກນິກກະສິກໍາ, ໜ່ວຍພັກປ່າໄມ້, ໜ່ວຍພັກຂະແໜງພັດທະນາຊົນນະບົດ ແລະ ສະຫະກອນ ແລະ ໜ່ວຍພັກສູນຄົ້ນຄ້ວາກະສິກໍາ, ໄດ້ຜ່ານບົດສະຫຼູບຫຍໍ້ກ່ຽວກັບການເຄື່ອນໄຫວການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ແລະ ທິດທາງແຜນການຂອງບັນດາໜ່ວຍພັກ ປີ 2021, ຜ່ານມະຕິຂອງຄະນະປະຈໍາພັກແຂວງ ວ່າດ້ວຍການຮັບຮອງເອົາໜ່ວຍພັກປອດໃສ,ເຂັ້ມແຂງ,ໜັກແໜ້ນປະຈໍາປີ 2020 ພ້ອມທັງໄດ້ມອບໃບຢັ້ງຢືນ ໜ່ວຍພັກປອດໃສ,ເຂັ້ມແຂງ,ໜັກແໜ້ນປະຈໍາປີ 2020 ໃຫ້ 6 ໜ່ວຍພັກທີ່ຂື້ນກັບພະແນກກະສິກໍາ ແລະ ປ່າໄມ້ແຂວງ ໃຫ້ກຽດມອບໂດຍ ທ່ານ ພີມແກ້ວ ທໍາລະສິນ ກໍາມະການພັກແຂວງ ເລຂາຄະນະພັກຮາກຖານ ຫົວໜ້າພະແນກກະສິກໍາ ແລະ ປ່າໄມ້ແຂວງ ກ່າວຮັບໂດຍຜູ່ຕາງໜ້າ 6 ໜ່ວຍພັກ
ຈາກນັ້ນ ທ່ານ ພີມແກ້ວ ທໍາລະສິນ ກໍາມະການພັກແຂວງ ເລຂາຄະນະພັກຮາກຖານ ຫົວໜ້າພະແນກກະສິກໍາ ແລະ ປ່າໄມ້ແຂວງ ໄດ້ເຜີຍແຜ່ມະຕິກອງປະຊຸມໃຫຍ່ ຄັ້ງທີ Xl ຂອງພັກ ໂດຍຍົກໃຫ້ເຫັນຄວາມໝາຍ, ຄວາມສໍາຄັນ ມະຕິກອງປະຊຸມໃຫຍ່ ຄັ້ງທີ Xl ຂອງພັກ ເຊີ່ງແມ່ນເຫດການ ການເມືອງທີ່ສໍາຄັນ ແຫ່ງການສຶບຕໍ່ຍຶດໝັ້ນ ແລະ ເສີມຂະຫຍາຍແນວທາງປ່ຽນແປງໃໝ່ຢ່າງຮອບດ້ານທີ່ມີຫຼັກການຂອງພັກໃຫ້ເຂົ້າສູ່ລວງເລິກ, ໄດ້ກໍານົດທັດສະນະແຫ່ງການສ້າງການຫັນປ່ຽນຢ່າງແຂງແຮງ, ເລິກເຊິ່ງ, ຮອບດ້ານ ແລະ ເປັນລະບົບ, ຄະນະພັກແຕ່ລະຂັ້ນ ຕ້ອງຖືເອົາການຄົ້ນຄວ້າ, ເຊື່ອມຊຶມ, ກໍານົດທິດທາງພື້ນຖານ, ຄາດໝາຍສູ້ຊົນຮອດປີ 2025 ແລະ ວຽກງານຈຸດສຸມແຕ່ລະຂົງເຂດ,ສຸມໃສ່ແກ້ໄຂດ້ວຍການປຸກລະດົມຂະບວນການຕົວຈິງຂອງມະຫາຊົນຢ່າງແຂງແຮງ ໄປພ້ອມກັບການຍົກສູງບົດບາດການຈັດຕັ້ງ ເພີ່ມທະວີຄວາມເຂັ້ມແຂງ ແລະ ຄວາມເຂັ້ມງວດໃນການຄຸ້ມຄອງພັກ ແລະ ລະບຽບພາຍໃນພັກ, ຮັບປະກັນແກ້ໄຂບັນຫາຕ່າງໆ ທີ່ເກີດຂື້ນໃຫ້ຖືກຈຸດ ແລະ ເປັນລະບົບ ທັງນີ້ກໍ່ເພື່ອແນ່ໃສ່ເຮັດໃຫ້ພະນັກງານລັດຖະກອນ ຮັບຮູ້ ແລະ ເຂົ້າໃຈ ເນື້ອໃນທີ່ສໍາຄັນຕົ້ນຕໍ ແລະ ວຽກງານຈຸດສຸມ ທີ່ຈະຕ້ອງເອົາໃຈໃສ່ຊີ້ນໍາ-ນໍາພາ ໃນແຕ່ລະຂົງເຂດ.
ໂອກາດດຽວກັນ ທ່ານ ທວງ ນາມວົງສາ ຮອງຫົວໜ້າພະແນກກະສິກໍາ ແລະ ປ່າໄມ້ແຂວງ ຍັງໄດ້ຜ່ານບົດໂອ້ລົມຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ ພັກປະຊາຊົນປະຕິວັດລາວ ເນື່ອງໃນໂອກາດວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 66 ປີ ຕື່່ມອີກ.