ມີເດຍລາວແຂວງບໍ່ແກ້ວ ພາບ – ຂ່າວ: ບຸນເພັດ ໄຊຍະວົງ
ວັນທີ 30 ມິຖຸນາ ນີ້ ພະແນກການຕ່າງປະເທດແຂວງບໍ່ແກ້ວ ໄຂກອງປະຊຸມສ້າງແຜ່ນກໍານົດພະນັກງານນຳພາ – ຄຸ້ມຄອງ ຂັ້ນແຂວງຄຸ້ມຄອງ 2021 – 2025 ໂດຍການເຂົ້າຮ່ວມຂອງທ່ານ ຄໍາເກິງ ຜິວວັນນາ ກໍາມະການພັກແຂວງ ຫົວໜ້າພະແນກການຕ່າງປະເທດແຂວງ, ເຂົ້າຮ່ວມມີ ທ່ານ ສົມພອນ ແກ້ວມະນີ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງ ມີພະນັກງານລັດຖະກອນພາຍໃນພະແນກ ແລະ ແຂກຮັບເຊີນເຂົ້າຮ່ວມ.

ທ່ານ ຄຳເກິງ ຜິວວັນນາ ໄດ້ເຜີຍແຜ່ມະຕິຂອງກົມການເມືອງສູນກາງພັກ ວ່າດ້ວຍວຽກງານການສ້າງແຜ່ນກຳນົດພະນັກງານນຳພາ – ຄຸ້ມຄອງ ເຊິ່ງໄດ້ຍົກໃຫ້ເຫັນຈຸດປະສົງຄາດໝາຍ, ການກະກຽມບຸກຄະລາກອນໃນລັກ ສະນະເປີດກວ່າງ ເພື່ອໃຫ້ມີແຫຼ່ງເລືອກເຟັ້ນພະນັກງານນຳພາ – ຄຸ້ມຄອງ ຕອບສະໜອງທາງດ້ານຈໍານວນ, ຄຸນນະພາບ, ໂຄງປະກອບບຸກຄະລາກອນໃຫ້ຄົບຊຸດຕາມຄວາມຮຽກຮ້ອງຕ້ອງການຂອງບັນດາຕຳແໜ່ງນຳພາຄຸ້ມຄອງແຕ່ລະຂັ້ນ ເພື່ອຮັບປະກັນການຫັນວຽກງານພະນັກງານດຳເນີນຕາມລະບຽບແບບແຜນ ເພື່ອຕອບສະໜອງໜ້າທີການເມືອງຂອງພັກ – ລັດໃນສະເພາະໜ້າ ແລະ ຍາວນານ, ຮັບປະກັນຄວາມຖືກຕ້ອງໂປ່ງໃສ, ພາວະວິໄສ, ຮອບດ້ານ, ຍຸຕິທຳ, ໂຄງປະກອບຕ້ອງມີເພດ, ມີເຜົ່າ ແລະ ເລັ່ງໃສ່ພະນັກງານໜຸ່ມກວມອັດຕາສ່ວນຫຼາຍ

ຈາກນັ້ນ ຄະນະຈັດຕັ້ງແຂວງ ໄດ້ເຜີຍແຜ່ມະຕິວ່າດ້ວຍມາດຖານພະນັກງານນຳພາ – ຄຸ້ມຄອງ ເຊິ່ງໄດ້ຍົກໃຫ້ເຫັນບາງບັນຫາສຳຄັນ ແລະ ສອດຄອງກັບກອງປະຊຸມຄັ້ງນີ້ ໄດ້ຍົກໃຫ້ເຫັນເຖິງ ຈຸດປະສົງຄາດໝາຍ ມາດຖານສະເພາະຂອງຕຳແໜ່ງ ແລະ ກຸ່ມຕຳແໜ່ງພະນັກງານນຳພາຄຸ້ມຄອງ ໃນທົ່ວລະບົບການເມືອງ ແຫ່ງ ສ ປປ ລາວ ເປັນພື້ນຖານໃນການເລືອກເຟັ້ນສ້າງແຜນກຳນົດ, ກໍ່ສ້າງ, ບຳລຸງ, ຕີລາຄາ, ຊັບຊ້ອນ, ຈັດວາງແຕ່ງຕັ້ງພະນັກງານເຂົ້າໃນຕຳແໜ່ງນຳພາ – ຄຸ້ມຄອງແຕ່ລະຂັ້ນ, ແຕ່ລະອົງການຈັດຕັ້ງມະຫາຊົນ, ວິສະຫະກິດຂອງລັດຂັ້ນສູນກາງ ແລະ ທ້ອງຖິ່ນເພື່ອປະຕິບັດຕາມວັດຖຸປະສົງ ແລະ ອຸດົມການຂອງພັກຢ່າງສຸດກົກສຸດປາຍ ດ້ານຄວາມຮູ້ຄວາມສາມາດຕ້ອງມີຄວາມຮູ້ພື້ນຖານກ່ຽວກັບລັດທິມາກ – ເລນິນ,

ແນວຄິດ ໄກສອນ ພົມວິຫານ ກຳແໜ້ນແນວທາງແຜ່ນນະໂຍບາຍຂອງພັກ ແລະ ແຜ່ນພັດທະນາ ເສດຖະກິດ – ສັງຄົມຂອງລັດມີລະດັບວິຊາສະເພາະໃດໜຶ່ງ, ມີຄວາມຮູ້ດ້ານກົດໝາຍທີ່ສົມຄູກັບໜ້າທີ່ການເມືອງທີ່ໄດ້ຮັບມອບໝາຍ, ມີຄວາມຮູ້ພາສາຕ່າງປະເທດ, ສາມາດນຳໃຊ້ເຕັກໂນໂລຊີທັນສະໃໝ ແລະ ການສື່ສານ ທີ່ຈຳເປັນ ແລະ ຜ່ານດຳລັດວ່າດ້ວຍມາດຖານຕຳແໜ່ງບໍລິຫານຂອງລັດຖະກອນ ແຫ່ງ ສ ປປ ລາວ ເຊິ່ງໄດ້ກຳນົດມາດຖານລວມມາດຖານສະເພາະກ່ຽວກັບຕຳແໜ່ງບໍລິຫານລັດຖະກອນ ເພື່ອເປັນບອນອີງໃຫ້ແກ່ການຈັດຕັ້ງຂອງພັກ, ລັດ, ແນວລາວສ້າງຊາດ ແລະ ອົງການຈັດຕັ້ງມະຫາຊົນ ເພື່ອເປັນບອນອີງໃນການຊັບຊ້ອນ – ບັນຈຸ ຫຼືແຕ່ງຕັ້ງພະນັກງານ – ລັດຖະກອນ ທີດຳລົງຕໍາແໜ່ງບໍລິຫານຕ່າງໆ ຂອງລັດ ຖະກອນ ແຫ່ງ ສປປ ລາວ ໃຫ້ມີຄວາມເໝາະສົມ ແລະ ສອດຄ່ອງກັບຕົວຈິງ ພ້ອມດຳເນີນການທາບທາບເອົາບຸກຄະລາກອນຕາມລະບຽບການ.