ວັນທີ 25 ກຸມພາ 2021, ຢູ່ຫ້ອງປະຊຸມພະແນກການເງິນແຂວງສາລະວັນ ໄດ້ຈັດພິທີປະກາດພະນັກງານລັດຖະກອນ ພັກການຮັບອຸດໜູນບຳນານ ຈຳນວນ 1 ທ່ານ, ໂດຍໃຫ້ກຽດເຂົ້າຮ່ວມຂອງ ທ່ານ ຂັນທະລັກ ໂພໄຊ ຫົວໜ້າພະແນກການເງິນແຂວງ, ມີຄະນະພະແນກ, ຂະແໜງການອ້ອມຂ້າງ, ພາກສ່ວນທີ່ກ່ຽວຂ້ອງ ຕະຫຼອດຮອດພະນັກງານພາຍໃນເຂົ້າຮ່ວມ ໂດຍປະຕິບັດຕາມຂໍ້ຕົກລົງສະບັບເລກທີ 3748/ກງ, ລົງວັນທີ 18 ທັນວາ 2020 ວ່າດ້ວຍການເຫັນດີ: ອະນຸມັດໃຫ້ ທ່ານ ນາງ ພັນມະຫາ ບຸດທະວົງ ພັກການຮັບອຸດໜູນບຳນານ ນັບແຕ່ງວດທີ I (ເດືອນ 1, 2, 3) ປີ 2021 ເປັນຕົ້ນໄປ. ພ້ອມດຽວກັນນັ້ນ ກໍ່ໄດ້ມີພິທີມອບ-ຮັບວຽກງານ ລະຫວ່າງ ນາງ ພັນມະຫາ ບຸດທະວົງ ຫົວໜ້າຂະແໜງຄຸ້ມຄອງຊັບສິນຂອງລັດ ກັບ ທ່ານ ອຳໄພ ປັນທະສີ ຮອງຫົວໜ້າຂະແໜງຄຸ້ມຄອງຊັບສິນຂອງລັດ ຂຶ້ນເປັນຮັກສາການ.

ຈາກນັ້ນກໍ່ໄດ້ກ່າວມອບວຽກງານທີ່ຕົນຊີ້ນຳໆພາ ແລະ ຮັບຜິດຊອບໃນໄລຍະຜ່ານມາ, ທັງຕີລາຄາເຖີງດ້ານຕັ້ງໜ້າ, ຜົນສຳເລັດທີ່ຍາດມາໄດ້ ແລະ ແຜນການຈັດຕັ້ງປະຕິບັດວຽກງານຕ່າງໆໃນແຕ່ລະດ້ານພາຍໃນ ເພື່ອມອບໃຫ້ຜູ້ທີ່ຈະສືບຕໍ່ຊີ້ນຳໆພາ ແລະ ຈັດຕັ້ງປະຕິບັດໃນຕໍ່ໜ້າ. ໂອກາດດຽວກັນ ກໍ່ໄດ້ເຊັນບົດບັນທຶກມອບຮັບຢ່າງເປັນທາງການ ໂດຍຊ້ອງໜ້າ ທ່ານ ຂັນທະລັກ ໂພໄຊ ແລະ ແຂກຖືກເຊີນເຂົ້າຮ່ວມ.

ໃນຕອນທ້າຍ ທ່ານ ຂັນທະລັກ ໂພໄຊ ກໍ່ໄດ້ໂອ້ລົມ, ກ່ອນອື່ນກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ກັບຜົນງານທີ່ຍາດມາໄດ້ໃນການປະຕິບັດວຽກງານດ້ວຍຄວາມສູ້ຊົນ, ບຸກບືນ ແລະ ເຮັດດ້ວຍຄວາມຈິງໃຈຢ່າງແທ້ຈິງ, ຮຽກຮ້ອງໃຫ້ຜູ້ທີ່ໄດ້ຮັບໜ້າທີ່ໃໝ່ ກໍ່ຄືພະນັກງານອ້ອມຂ້າງຮ່ຳຮຽນເອົາແບບຢ່າງທີ່ດີ, ມີຄວາມສາມັກຄີ, ມີຄວາມຮັບຜິດຊອບ, ຄວາມເປັນເຈົ້າການ ແລະ ມີການປຶກສາຫາລື, ແກ້ໄຂຊ່ວຍກັນ ກໍ່ຄືເຮັດວຽກເປັນໝູ່ຄະນະ ເພື່ອເຮັດໃຫ້ວຽກງານດັ່ງກ່າວກ້າວໄປ, ພ້ອມນີ້ກໍ່ເອົາໃຈໃສ່ເບີ່ງແຍງຊ່ວຍເຫຼືອກັນ ແລະ ກັນ ພາຍຫຼັງໄດ້ພັກການຮັບອຸດໜູນບຳນານ. ຂ່າວພາບ: ວິໄລວອນ ສິດທິໄຊ