ມີເດຍລາວແຂວງຄຳມ່ວນ ກອງປະຊຸມສະຫຼຸບວຽກງານປະຈໍາປີ 2020 ຂອງພະແນກຍຸຕິທໍາແຂວງຄໍາມ່ວນໄດ້ຈັດຂຶ້ນໃນຕອນເຊົ້າຂອງວັນທີ 06 ເມສາ 2021 ຢູ່ທີ່ຫ້ອງປະຊຸມຂອງພະແນກດັ່ງກ່າວໂດຍການເປັນປະທານຂອງທ່ານ ວິໄຊ ແກ້ວດວງດີ ຮັກສາການຫົວໜ້າພະແນກຍຸຕິທໍາແຂວງ. ກອງປະຊຸມຄັ້ງນີ້ໄດ້ເປັນກຽດຢ່າງສູງທີ່ໄດ້ຕ້ອນຮັບການເຂົ້າຮ່ວມຂອງທ່ານ ວັນໄຊ ພອງສະຫວັນ ກໍາມະການສູນກາງພັກ,ເລຂາພັກແຂວງ,ເຈົ້າແຂວງໆຄໍາມ່ວນ,ພ້ອມນັ້ນຍັງມີບັນດາທ່ານທີ່ຕາງໜ້າໃຫ້ພະແນກການ,ຫ້ອງການຍຸຕິທໍາ 10 ຕົວເມືອງ,ສານປະຊາຊົນແຂວງ,ອົງການໄອຍະການປະຊາຊົນແຂວງ,ປກຊ ແຂວງ,ປກສ ແຂວງ ຕະຫຼອດເຖິງຂະແໜງການອ້ອມຂ້າງພະແນກຍຸຕິທໍາແຂວງເຂົ້າຮ່ວມ.

ທ່ານ ວິໄຊ ແກ້ວດວງດີ ຮັກສາການຫົວໜ້າພະແນກຍຸຕິທໍາແຂວງກໍ່ໄດ້ກ່າວໄຂກອງປະຊຸມຢ່າງເປັນທາງການ , ຈາກນັ້ນທ່ານ ລໍາພອນ ສີອັກສອນ ແລະ ທ່ານ ວຽງວິໄລ ພົມມະວົງ ຮອງຫົວໜ້າພະແນກຍຸຕິທໍາແຂວງກໍ່ໄດ້ຜັດປ່ຽນກັນຜ່ານຮ່າງບົດສະຫຼຸບປະຈໍາປີ 2020 ແລະ ວາງທິດທາງແຜນການປີ 2021 ແລະ ເອກະສານຄໍາແນະນໍາການຈັດຕັ້ງຜັນຂະຫຍາຍຜົນສໍາເລັດຂອງກອງປະຊຸມວຽກງານຍຸຕິທໍາປະຈໍາປີ 2020. ໃນວາລະຂອງການດໍາເນີນກອງປະຊຸມນອກຈາກໄດ້ຮັບຟັງຮ່າງບົດສະຫຼຸບປະຈໍາປີ 2020 ແລະ ທິດທາງແຜນການປີ 2021 ແລ້ວບັນດາຜູ້ແທນທີ່ເຂົ້າຮ່ວມຈາກພາກສ່ວນຕ່າງໆຍັງໄດ້ພ້ອມກັນປະກອບຄໍາຄິດເຫັນກ່ຽວກັບວຽກງານຍຸຕິທໍາຮາກຖານ , ວຽກງານປະຕິບັດຄໍາຕັດສິນຂອງສານ , ວຽກງານທະບຽນສານ ແລະ ວຽກງານອື່ນໆທີ່ຕິດພັນກັບຂົງເຂດຍຸຕິທໍາ.


ໃນໂອກາດເຂົ້າຮ່ວມກອງປະຊຸມສະຫຼຸບວຽກງານຍຸຕິທໍາແຂວງປະຈໍາປີ 2020 ທ່ານເຈົ້າແຂວງໆຄໍາມ່ວນກໍ່ໄດ້ມີຄໍາເຫັນໂອ້ລົມ ,ໃຫ້ທິດຊີ້ນໍາ ແລະ ເນັ້ນໜັກບາງບັນຫາສໍາຄັນຕໍ່ກອງປະຊຸມວ່າ : ໃຫ້ພະນັກງານ-ລັດຖະກອນໃນຂົງເຂດຍຸຕິທໍາແຂວງຕະຫຼອດແຂກທີ່ເຂົ້າຮ່ວມຈົ່ງຫັນເອົາເນື້ອໃນຈິດໃຈຂອງກອງປະຊຸມໄປຈັດຕັ້ງຜັນຂະຫຍາຍພ້ອມທັງຕີລາຄາຄືນການບັງຄັບໃຊ້ກົດໝາຍຂອງອົງການປົກປ້ອງກົດໝາຍ ແລະ ການເຄົາລົບລະບຽບກົດໝາຍຂອງພົນລະເມືອງ, ເພີ່ມທະວີເອົາໃຈໃສ່ໃນການເຜີຍແຜ່,ເຊື່ອມຊຶມກົດໝາຍພ້ອມທັງຊ່ວຍຂະແໜງການອື່ນໃນດ້ານວຽກງານກົດໝາຍ,ເອົາໃຈໃສ່ສົ່ງເສີມວຽກງານຍຸຕິທໍາຮາກຖານໃຫ້ຫຼາຍຂຶ້ນເພື່ອຈໍາກັດບັນຫາປະກົດການຫຍໍ້ທໍ້ໃນສັງຄົມ,ເອົາໃຈໃສ່ສ້າງບ້ານ-ກຸ່ມບ້ານຕົວແບບດ້ານການປະຕິບັດກົດໝາຍທີ່ໄດ້ປະກາດຮັບຮອງໄປແລ້ວໃຫ້ມີຄຸນນະພາບເພື່ອໃຫ້ບ້ານອື່ນໄດ້ມາຖອດຖອນບົດຮຽນ. ນອກນັ້ນແມ່ນໃຫ້ເອົາໃຈໃສ່ປະຕິບັດຄໍາຕັດສິນຂອງສານ ແລະ ແກ້ໄຂບັນຫາຄະດີທີ່ຍັງຄົງຄ້າງຫຼາຍປີໃຫ້ຫຼຸດລົງ ; ເອົາໃຈໃສ່ບັນຫາການຄຸ້ມຄອງຊັບສິນຂອງຜູ້ຖືກຫາທີ່ໄດ້ຍຶດ ຫຼື ຮິບມາເປັນຂອງລັດໃຫ້ມີຄວາມຖືກຕ້ອງສອດຄ່ອງຕາມລະບຽບກົດໝາຍພ້ອມທັງມອບລາຍຮັບເຂົ້າງົບປະມານຂອງລັດ,ດ້ານການຂຶ້ນທະບຽນສານກໍ່ຕ້ອງໄດ້ເອົາໃຈໃສ່ເພື່ອຫຼີກຂໍ້ຂັດແຍ່ງທີ່ຕາມມາເປັນຕົ້ນແມ່ນການອອກໃບຕາດິນຊໍ້າຊ້ອນ , ການແກ້ໄຂຄະດີຄ້າຂາຍ ແລະ ເສບຢາເສບຕິດເຊິ່ງພາໃຫ້ສັງຄົມເກີດຄວາມບໍ່ສະຫງົບ,ສໍາຄັນແມ່ນການສຶກສາອົບຮົມການເມືອງແນວຄິດ,ຈັນຍາບັນ-ຈັນຍາທໍາໃຫ້ແກ່ພະນັກງານ-ລັດຖະກອນໃນຂົງເຂດອົງການປົກປ້ອງກົດໝາຍຕະຫຼອດເຖິງພະນັກງານນໍາພາ,ຄຸ້ມຄອງຕ້ອງເຮັດວຽກເປັນໝູ່ຄະນະໃນນີ້ລວມເຖິງແຜນວຽກ,ແຜນເງິນ ແລະ ແຜນຄົນ.