ມີເດຍລາວແຂວງຈຳປາສັກ ຂ່າວ-ພາບ: ຖວທ ປະທຸມພອນ.
ໃນວັນທີ 17 ພຶດສະພາ 2021 ຢູ່ທີ່ ສະໂມສອນເມືອງປະທຸມພອນ ແຂວງຈໍາປາສັກ ພະແນກສາທາລະນະສຸກ ແຂວງຈໍາປາສັກ ໄດ້ລົງໄປ ສຸຂະສຶກສາ ສ້າງຄວາມເຂັ້ມແຂງໃຫ້ອົງການປົກຄອງ ຮາກຖານກຸ່ມບ້ານ ໃນການຕ້ານ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ທີ່ກຳລັງລະບາດໃນປະຈຸບັນ ໂດຍໃຫ້ກຽດເປັນປະທານຂອງທ່ານ ວຽງສະໄໝ ສີລິພອນພັນ ກຳມະການພັກແຂວງ ເລຂາພັກເມືອງ ເຈົ້າເມືອງໆ ປະທຸມພອນ, ທ່ານ ດຣ ສີວິໄຊ ໄຊຍະສານ ຮອງຫົວໜ້າພະແນກ ສາທາລະນະສຸກ ແຂວງ ຈໍາປາສັກ, ມີບັນດາທ່ານ ຮອງເລຂາພັກເມືອງ ,ຄະນະປະຈໍາພັກເມືອງ, ກໍາມະການພັກເມືອງ, ຄະນະສະເພາະກິດຂັ້ນແຂວງ-ເມືອງ ແລະ ເລຂາຄະນະພັກຖານກຸ່ມ 9 ກຸ່ມບ້ານ ເຂົ້າຮ່ວມທັງໝົດ 22 ທ່ານ.

ໃນໂອກາດດັ່ງກ່າວ ທ່ານ ດຣ ສີວິໄຊ ໄຊຍະສານ ກໍ່ໄດ້ເວົ້າເຖິງສະພາບການແຜ່ລະບາດຂອງພະຍາດໂຄວິດ -19 ພາຍໃນປະເທດ ກໍ່ຄືແຂວງຈໍາປາສັກ ພ້ອມນັ້ນທ່ານ ກໍ່ສະເໜີໃຫ້ບັນດາທ່ານທີ່ເຂົ້າຮ່ວມປະກອບຄໍາຄິດເຫັນເພື່ອປຶກສາຫາລື ການສະກັດກັ້ນ,ຄວບຄຸບການແຜ່ລະບາດຂອງພະຍາດໂຄວິດ-19 ພາຍໃນທ້ອງຖິ່ນຕົນຢ່າງເຄັ່ງຄັດ. ໃນໂອກາດນີ້ ກໍ່ໄດ້ຮັບຟັງການເຜີຍແຜ່ເນື້ອໃນ ຄູ່ມືການກັກບໍລິເວນຜູ້ສໍາພັດກັບພະຍາດດັ່ງກ່າວໃນຊຸມຊົນ ແລະ ອະທິບາຍກ່ຽວກັບ 10 ຂັ້ນຕອນການເຝົ້າລະວັງ, ຄວບຄຸມການລະບາດໃນຊຸມຊົນໂດຍອີງໃສ່ອໍານາດການປົກຄອງເປັນຕົ້ນ, ພ້ອມທັງເຮັດບົດບັນທຶກລະຫວ່າງເມືອງກັບ 9 ກຸ່ມບ້ານ ໃຫ້ມີສະຕິຮ່ວມກັນບໍ່ໃຫ້ພະຍາດມີການແຜ່ລາມໃນວົງກວ້າງ. ພ້ອມນັ້ນ ທ່ານ ວຽງສະໄໝ ສີລິພອນພັນ ກໍ່ໄດ້ມີຄໍາເຫັນໂອ້ລົມໃນການເພີ້ມທະວີມາດຕະການສະກັດກັ້ນການລະບາດຂອງພະຍາດໂຄວິດ-19 ທັງຮຽກຮ້ອງມາຍັງເລຂາຄະນະພັກຮາກຖານ ຕ່າງໜ້າໃຫ້ອໍານາດການປົກຄອງບ້ານທີ່ຢູ່ໃນທີ່ນີ້ ຈົ່ງພ້ອມໃຈກັນນໍາເອົາເນື້ອໃນຈິດໃຈກອງປະຊຸມ ໄປຝັນຂະຫຍາຍສືບຕໍ່ຈັດຕັ້ງປະຕິບັດຢ່າງເຄັ່ງຮ້ອນ, ຖ້າຫາກມີກໍລະນີເກິດຂື້ນແມ່ນໃຫ້ແຈ້ງໜ່ວຍສະເພາະກິດຂັ້ນເມືອງເພື່ອເຮັດໃຫ້ການສະກັດກັ້ນການລະບາດມີຄວາມວ່ອງໄວ ແລະ ທັນການ .