ມີເດຍລາວແຂວງໄຊສົມບູນ ຂ່າວ: ຈິນລະວອນ ວໍລະສົມບູນ
ກອງປະຊຸມ ສະຫຼຸບການຈັດຕັ້ງປະຕິບັດ ແຜນພັດທະນາວຽກງານສາທາລະນະສຸກ ແຂວງໄຊສົມບູນ 5 ປີ ຄັ້ງທີ VIII 2016-2020 ແລະ ທິດທາງແຜນການ 5 ປີ ຄັ້ງທີ IX 2021-2025 ໄດ້ຈັດຂຶ້ນໃນວັນທີ 6 ເມສາ ນີ້ ທີ່ສະໂມສອນກອງພັນໃຫຍ່ 101 ໂດຍການເປັນປະທານຮ່ວມ ຂອງທ່ານ ຕົ່ງມົວ ຊົວໂກ້, ຮອງເຈົ້າແຂວງໄຊສົມບູນ, ເຂົ້າຮ່ວມກອງປະຊຸມ ຄັ້ງນີ້ ມີທ່ານ ຄຳພອນ ພຸດທະວົງ, ຮອງລັດຖະມົນຕີກະຊວງສາທາລະນະສຸກ ແລະ ທ່ານ ດຣ ບົວເກດ ວົງປະເສີດ, ຫົວໜ້າພະແນກສາທາລະນະສຸກ ແຂວງ ພ້ອມດ້ວຍຫົວໜ້າກົມ-ຮອງກົມ ທີ່ມາຈາກກະຊວງສາທາລະນະສຸກ, ພະແນກການ ອ້ອມຂ້າງແຂວງ, ການນຳ ທັງ 5 ເມືອງ ແລະ ຫ້ອງການສາທາລະນະສຸກ ເມືອງ ໃນທົ່ວແຂວງ ຕະຫຼອດຮອດແຂກຖືກເຊີນ ເຂົ້າຮ່ວມ.

ໂອກາດດັ່ງກ່າວ ຜູ້ເຂົ້າຮ່ວມໄດ້ຮັບຟັງການຜ່ານບົດສະຫຼຸບການຈັດຕັ້ງປະຕິບັດ ແຜນພັດທະນາວຽກງານສາທາລະນະສຸກ 5 ປີ ຄັ້ງທີ VIII 2016-2020 ແລະ ທິດທາງແຜນການ 5 ປີ ຄັ້ງທີ IX 2021-2025 ຈາກທ່ານ ດຣ ບົວເກດ ວົງປະເສີດ, ຫົວໜ້າພະແນກສາທາລະນະສຸກ ແຂວງ ຊຶ່ງຕະຫຼອດໄລຍະຜ່ານມາ ໄດ້ເອົາໃຈໃສ່ຈັດຕັ້ງປະຕິບັດຂົງເຂດວຽກງານ ຂອງຕົນ ທີ່ຂັ້ນເທິງມອບໝາຍໃຫ້ ດ້ວຍຄວາມຮັບຜິດຊອບສູງ ທັງສາມາດບັນລຸຜົນສຳເລັດຫຼາຍດ້ານ ໂດຍສະເພາະການຈັດຕັ້ງປະຕິບັດ 11 ຕົວຊີ້ບອກ ທີ່ສະພາແຫ່ງຊາດໄດ້ຮັບຮອງ ນັບແຕ່ປີ 2016-2020 ໃນນັ້ນ ປີ 2020 ອັດຕາເດັກນ້ອຍລຸ່ມ 5 ປີ ທີ່ມີນໍ້າໜັກຕ່ຳກວ່າມາດຖານ ປະຕິບັດໄດ້ 4,4 %, ເດັກນ້ອຍລຸ່ມ 5 ປີ ທີ່ມີລວງສູງຕໍ່າກວ່າມາດຖານ ປະຕິບັດໄດ້ 5,5 %, ອັດຕາການຕາຍຂອງເດັກ ລຸ່ມ 1 ປີ ໃນຈຳນວນ 1/1000 ເດັກເກີດມີຊີວິດ ປະຕິບັດໄດ້ 7 %, ອັດຕາການຕາຍຂອງເດັກ ລຸ່ມ 5 ປີ ໃນຈຳນວນ 1/1000 ເດັກເກີດມີຊີວິດ ປະຕິບັດໄດ້ 9 %, ອັດຕາການຕາຍຂອງແມ່ ໃນຈຳນວນ 1/100.000 ເດັກເກີດມີຊີວິດ ປະຕິບັດໄດ້ 66/98,4%, ອັດຕາການເກີດລູກມີແພດຊ່ວຍ ປະຕິບັດໄດ້ 67%, ອັດຕາສັກຢາກັນພະຍາດໃນເດັກນ້ອຍລຸ່ມ 1 ປີ ປະຕິບັດໄດ້ 60%, ອັດຕາຊົມໃຊ້ນໍ້າສະອາດ 87 %, ອັດຕາຊົມໃຊ້ວິດຖ່າຍ 92 %, ອັດຕາປຸກຄຸມປະກັນສຸຂະພາບ 100% ແລະ ອັດຕາ ປະກາດບ້ານສາທາລະນະສຸກແບບຢ່າງ 85,4%.

ກອງປະຊຸມຄັ້ງນີ້ ໄດ້ຕີລາຄາຄືນ ຢ່າງພາວະວິໄສ ແລະ ຮອບດ້ານ ພ້ອມທັງວາງທິດທາງການຈັດຕັ້ງປະຕິບັດ ວຽກງານສາທາລະນະສຸກ ປະຈຳປີ 2021-2025 ດ້ວຍຄວາມຮັດກຸມ ເພື່ອເຮັດໃຫ້ວຽກງານດັ່ງກ່າວ ໄດ້ຮັບການຈັດຕັ້ງປະຕິບັດ ຢ່າງມີປະສິດທິພາບ ແລະ ປະກົດຜົນເປັນຈິງ. ທັງໝົດນັ້ນ ກໍເພື່ອສຸມໃສ່ພັດທະນາວຽກງານສາທາລະນະສຸກ ແຂວງໄຊສົມບູນ ໃຫ້ໄດ້ທັງປະລິມານ ແລະ ຄຸນນະພາບ ໂດຍສຸມໃສ່ການຍົກລະດັບຄວາມຮູ້-ຄວາມຊຳນານງານ ດ້ານວິຊາສະເພາະ, ຄຸນສົມບັດ, ຈັນຍາບັນ, ຈັນຍາທຳ ແລະ ກິລິຍາທ່າທີການບໍລິການຮັບໃຊ້ ເພື່ອຮັບປະກັນໃຫ້ການບໍລິການສຸຂະພາບ ທີ່ມີຄຸນນະພາບ ສ້າງໄດ້ຄວາມເພິ່ງພໍໃຈ ແກ່ປະຊາຊົນ ໄປພ້ອມກັບການປັບປຸງການຈັດຕັ້ງ ແລະ ແບບແຜນວິທີເຮັດວຽກ ໃຫ້ມີປະສິດທິພາບ ໂດຍການຈັດຕັ້ງຜັນຂະຫຍາຍຍຸດທະສາດປະຕິຮູບ ຕາມເນື້ອໃນ 4 ບຸກ ແລະ 3 ສ້າງ ເຂົ້າໃນວຽກງານຕົວຈິງ ເພື່ອປະກອບສ່ວນທີ່ສຳຄັນ ເຂົ້າໃນການພັດທະນາເສດຖະກິດ-ສັງຄົມ ແຂວງໄຊສົມບູນ ໃຫ້ມີບາດກ້າວຂະຫຍາຍຕົວດີຂຶ້ນ. ພ້ອມນີ້ ໃນຕອນບ່າຍຂອງວັນດຽວກັນ ຍັງໄດ້ສືບຕໍ່ກອງປະຊຸມ ການຈັດຕັ້ງປະຕິບັດວຽກງານໂພຊະນາການ ປະຈຳປີ 2020 ແລະ ແຜນການ ປີ 2021 ຕື່ມອີກ.