ມີເດຍລາວແຂວງເຊກອງ (ຂ່າວ-ພາບ: ແກ້ວໄຊຍະວົງ)

ຄະນະບໍລິຫານງານຊາວໝຸ່ມແຂວງເຊກອງໄດ້ມອບໃບຢັ້ງຢືນ 4 ບຸກໃຫ້ຊາວໜຸ່ມຮາກຖານພະແນກສາທາລະນະສຸກແຂວງ ພາຍຫຼັງທີ່ສໍາເລັດໃນການຈັດຕັ້ງປະຕິບັດຂໍ້ແຂ່ງຂັນ 4 ບຸກຂອງສູນກາງຊາວໜຸ່ມປະຊາຊົນປະຕິວັດລາວວາງອອກ. ພິທີມອບ-ຮັບໄດ້ຈັດຂຶ້ນໃນວັນທີ 8 ກໍລະກົດ 2021 ໃຫ້ກຽດມອບໂດຍສະຫາຍ ແສງໂນພາ ມິກດາວົງ ຮອງເລຂາຄະນະບໍລິຫານງານຊາວໝຸ່ມແຂວງ ແລະກ່າວຮັບໂດຍສະຫາຍ ສຸລິຍາ ທັດສະພອນ ຮອງເລຂາຄະນະບໍລິຫານງານຊາວໜຸ່ມຮາກຖານພະແນກສາທາລະນະສຸກແຂວງ, ໂດຍມີສະຫາຍ ນາງ ລໍາພັນ ໄຊຄໍາມີ ຄະນະພັກຮາກຖານ, ຮອງຫົວໜ້າພະແນກສາທາລະນະສຸກແຂວງ, ພ້ອມດ້ວຍຜູ້ຕາງໜ້າຈາກສາມອົງການຈັດ ຕັ້ງມະຫາຊົນ, ບັນດາເລຂາ, ຮອງເລຂາ ແລະສະມາຊິກຈາກໜ່ວຍຊາວໜຸ່ມທີ່ຂຶ້ນກັບເຂົ້າຮ່ວມຢ່າງພ້ອມພຽງ.

ໂອກາດນີ້, ສະຫາຍ ສຸລິຍາ ທັດສະພອນ ກ່າວວ່າ: ຄະນະບໍລິຫານງານຊາວໜຸ່ມຮາກຖານພະແນກສາທາລະນະສຸກແຂວງ ໄດ້ເອົາໃຈໃສ່ ແລະໃຫ້ຄວາມສໍາຄັນຕໍ່ການຈັດຕັ້ງປະຕິບັດວຽກງານຊາວໜຸ່ມໃຫ້ສອດຄ່ອງກັບສະພາບຈຸດພິເສດຂອງຕົນໃນການເປັນເສນາທິການໃຫ້ແກ່ຄະນະພັກ-ຄະນະນໍາພະແນກສາທາລະນະສຸກແຂວງ ເຊິ່ງຜ່ານການຈັດ ຕັ້ງປະຕິບັດວຽກງານຊາວໜຸ່ມ 4 ບຸກຂອງພະແນກສາທາລະນະສຸກແຂວງໃນໄລຍະຜ່ານມາ ສາມາດຕີລາຄາໄດ້ວ່າ ຊາວໜຸ່ມພວກເຮົາໄດ້ປະກອບສ່ວນຢ່າງຕັ້ງໜ້າ ແລະຫ້າວຫັນ ດ້ວຍຄວາມຮັບຜິດຊອບເຂົ້າໃນຫຼາຍຂົງເຂດວຽກງານ ຈົນສາມາດຍາດໄດ້ໃບຍ້ອງຍໍຂອງເລຂາຄະນະບໍລິຫານງານຊາວໝຸ່ມແຂວງທັງໝົດ 119 ສະຫາຍ ແລະໃບຊົມເຊີຍ 8 ສະ ຫາຍ, ເຊິ່ງຜົນງານທີ່ພົ້ນເດັ່ນໃນໄລຍະຜ່ານມາ ແມ່ນໄດ້ປະກາດຮັບຮອງເປັນຄະນະຊາວໜຸ່ມ 4 ບຸກແລ້ວ 3 ຄັ້ງ ແລະໄດ້ຮັບທຸງໄຊນໍາໜ້າຂະບວນການແຂ່ງຂັນ 4 ບຸກແລ້ວ 1 ຄັ້ງ.
ສ່ວນແຜນການໃນຕໍ່ໜ້າ, ຄະນະບໍລິຫານງານຊາວໜຸ່ມຮາກຖານພະແນກສາທາລະນະສຸກແຂວງ ຈະສືບຕໍ່ປະຕິບັດຂໍ້ແຂ່ງຂັນ 4 ບຸກໃຫ້ບັນລຸຜົນ, ເຕົ້າໂຮມຄວາມສາມັກຄີໃນຖັນແຖວພະນັກງານ, ສະມາຊິກຊາວໜຸ່ມໃຫ້ເປັນປຶກແຜ່ນ, ຍຶດໝັ້ນອຸດົມການຂອງພັກ, ເດັດດ່ຽວແກ້ໄຂຈຸດອ່ອນ ແລະຕີຖອຍປະກົດການຫຍໍ້ທໍ້, ສ້າງຂະບວນການຊາວໜຸ່ມໃຫ້ມີບັນຍາກາດຟົດຟື້ນ, ເພີ່ມທະວີຄວາມສາມັກຄີຊາວໜຸ່ມພາຍໃນ-ພາຍນອກ ໂດຍສະເພາະຊາວໜຸ່ມແຮກ ສ່ຽວ ແລະບັນດາພະແນກການຕ່າງໆອ້ອມຂ້າງແຂວງ ເພື່ອຊຸກຍູ້ວຽກງານວິຊາສະເພາະໃຫ້ມີປະສິດທິພາບ ແລະປະສິດ ທິຜົນສູງ.

ໃນໂອກາດນີ້, ສະຫາຍ ແສງໂນພາ ມິກດາວົງ ໄດ້ສະແດງຄວາມຍ້ອງຍໍຊົມເຊີຍຕໍ່ການນໍາພາ-ຊີ້ນໍາການປະຕິບັດພາລະບົດບາດຂອງຄະນະບໍລິຫານງານຊາວໜຸ່ມຮາກຖານພະແນກສາທາລະນະສຸກແຂວງໃນໄລຍະຜ່ານມາ ທີ່ໄດ້ພ້ອມກັນເອົາໃຈໃສ່ ແລະຖືເປັນສໍາຄັນຕໍ່ການຈັດຕັ້ງປະຕິບັດເນື້ອໃນຈິດໃຈຂໍ້ແຂ່ງຂັນ 4 ບຸກຂອງສູນກາງຊາວໜຸ່ມ ປະຊາຊົນປະຕິວັດລາວວາງອອກ ຈົນໄດ້ຮັບນາມມະຍົດຊາວໝຸ່ມ 4 ບຸກຄັ້ງທີ IV ປະຈໍາປີ 2020 ແລະສະຫາຍກໍໄດ້ເນັ້ນໃຫ້ຄະນະບໍລິຫານງານຊາວໝຸ່ມພະແນກສາທາລະນະສຸກແຂວງສືບຕໍ່ປະຕິບັດໜ້າທີ່ວຽກງານຂອງຕົນຕິດພັນກັບການປະຕິ ບັດຂໍ້ແຂ່ງຂັນ 4 ບຸກໃຫ້ບັນລຸຕາມເປົ້າໝາຍທີ່ວາງໄວ້.