ມີເດຍລາວແຂວງຈຳປາສັກ ຜູ້ໂພສ: ດາວພະຈັນ ໄຊຍະວົງ​ ຂ່າວ-ພາບ: ພຸດທະສິນ ວົງວິໄລທອງ ໃນຕອນເຊົ້າວັນທີ 24 ມິຖຸນາ ນີ້ ທ່ານ ປອ. ສຸກສະຫວັນ ວິໄລວົງ ກຳມະການພັກແຂວງ ຫົວໜ້າພະແນກແຜນການ ແລະ ການລົງທຶນ ແຂວງຈຳປາສັກ ພ້ອມຄະນະໄດ້ເຄື່ອນໄຫວຊຸກຍູ້, ຕິດຕາມ, ກວດກາການຈັດຕັ້ງຜັນຂະຫຍາຍ ແຜນພັດທະນາເສດຖະກິດ-ສັງຄົມ 5 ປີ ແລະ ການສ້າງແຜນປະຕິບັດໄລຍະຕໍ່ໜ້າຂອງເມືອງ; ການລົງມາເຮັດວຽກຄັ້ງນີ້ ໄດ້ຖືກຕ້ອນຮັບຢ່າງອົບອຸ່ນຈາກທ່ານນາງ ຄຳພູ ລິດທິສັກ ກຳມະການພັກແຂວງ ເລຂາພັກເມືອງ, ເຈົ້າເມືອງໆໂຂງ, ມີບັນດາທ່ານກຳມະການພັກເມືອງ, ຫົວໜ້າ-ຮອງຫົວໜ້າຫ້ອງການອ້ອມຂ້າງເມືອງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໂອກາດນີ້, ທ່ານ ຈັນທະນົງສິນ ຈັນທະພິມ ກຳມະການພັກເມືອງ ຫົວໜ້າຫ້ອງການແຜນການ ແລະ ການລົງທຶນເມືອງ ໄດ້ລາຍງານໃຫ້ຮູ້ໂດຍສັງເຂບກ່ຽວກັບການຈັດຕັ້ງຜັນຂະຫຍາຍແຜນພັດທະນາເສດຖະກິດ-ສັງຄົມ 5 ປີວ່າ: ການຈັດຕັ້ງຜັນຂະຫຍາຍແຜນພັດທະນາເສດຖະກິດ-ສັງຄົມ 5 ປີ, ຄັ້ງທີ IX ຂອງເມືອງ (2020-2024) ແມ່ນໄດ້ເລີ່ມຈັດຕັ້ງປະຕິບັດມາແຕ່ປີ 2020 ເປັນຕົ້ນມາ; ປັດຈຸບັນ ແມ່ນເປັນປີທີ 2 ຂອງການຈັດຕັ້ງຜັນຂະຫຍາຍແຜນດັ່ງກ່າວ ແລະ ເປັນປີທີ 1 ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ຂອງແຂວງ ແລະ ລັດຖະບານ; ການຜັນຂະຫຍາຍແຜນ 5 ປີ ຂອງເມືອງ ແມ່ນໄດ້ຜັນຂະຫຍາຍອອກເປັນແຜນງານ, ໂຄງການປະກອບມີ 6 ແຜນງານ 22 ໂຄງການ, ໄດ້ຜັນຂະຫຍາຍເປັນກິດຈະກຳອັນລະອຽດປະຈຳເດືອນ, ປະຈຳ 3 ເດືອນ, 6 ເດືອນ ແລະ ປະຈຳປີ, ມີການນຳພາ-ຊີ້ນຳ, ຊຸກຍູ້ການຈັດຕັ້ງປະຕິບັດຢ່າງໃກ້ຊິດຈາກຄະນະນຳຂອງເມືອງ.

ນອກຈາກນັ້ນ ໄດ້ມີການປັບປຸງແຜນ 5 ປີຂອງເມືອງໃຫ້ສອດຄ່ອງກັບແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ຂອງແຂວງ ໂດຍຈັດຕັ້ງຜັນຂະຫຍາຍອອກເປັນ 4 ເປົ້າໝາຍໃຫຍ່ ແລະ ມີ 22 ວຽກຈຸດສຸມ. ໃນປີ 2020 ການຈັດເກັບລາຍຮັບເຂົ້າງົບປະມານປະຕິບັດໄດ້ 8.309 ຕື້ກີບ,​ ທຽບໃສ່ແຜນປີປະຕິບັດໄດ້ 90,46% ແລະ ໃນ 6 ເດືອນຕົ້ນປີ 2021 ນີ້ການຈັດເກັບລາຍຮັບເຂົ້າງົບປະມານປະຕິບັດໄດ້ 3.084 ຕື້ກີບ ທຽບໃສ່ແຜນປີປະຕິບັດໄດ້ 40%; ສຳລັບການປະຕິບັດໂຄງການລົງທຶນຕ່າງໆນັບແຕ່ປີ 2020 ເປັນຕົ້ນມາ ສາມາດຈັດຕັ້ງປະຕິບັດໂຄງການສຳເລັດລວມມີ 12 ໂຄງການ, ມູນຄ່າ 136.571 ຕື້ກີບ. ໃນນັ້ນ, ໂຄງການລົງທຶນຂອງລັດມີ 3 ໂຄງການ,​ ມູນຄ່າ 17.435 ຕື້ກີບ, ໂຄງການຊ່ວຍເຫຼືອທາງການເພື່ອການພັດທະນາມີ 3 ໂຄງການ, ມູນຄ່າ 115.885 ຕືກີບ ແລະ ທຶນປະກອບສ່ວນຂອງສັງຄົມມີ 5 ໂຄງການ,​ ມູນຄ່າ 3.251 ຕື້ກີບ.
ໃນກອງປະຊຸມ ບັນດາຜູ້ເຂົ້າຮ່ວມຍັງໄດ້ມີການປະກອບຄຳຄິດ-ຄຳເຫັນໃສ່ບັນດາຕົວເລກຄາດໝາຍ, ມີການເຈາະຈີ້ມຂໍ້ສະດວກ, ຂໍ້ຫຍຸ້ງຍາກ ເພື່ອກຳນົດບັນດາມາດຕະການ ແລະ ທົບທວນຄືນຕົວເລກຄາດໝາຍທີ່ວາງໄວ້ ເພື່ອພ້ອມກັນຈັດຕັ້ງປະຕິບັດໃນຕໍ່ໜ້າ.