ກອງປະຊຸມເປີດກວ້າງ ປະຈຳປີ 2020 ແລະ ທິດທາງແຜນການ ປີ 2021 ຂອງພະແນກແຮງງານ ແລະ ສະວັດດີການສັງຄົມ ແຂວງໄຊສົມບູນ ໄດ້ຈັດຂຶ້ນໃນວັນທີ 24 ກຸມພາ ນີ້ ທີ່ສະໂມສອນເມືອງອະນຸວົງ ໂດຍການເຂົ້າຮ່ວມຂອງທ່ານ ຕົ່ງມົວ ຊົວໂກ້ ຮອງເຈົ້າແຂວງໄຊສົມບູນ ຜູ້ຊີ້ນຳວຽກງານວັດທະນະທຳ-ສັງຄົມ, ມີທ່ານ ວັນຄຳເກັ່ງ ຢ່າຊົ່ງກວ່າ ຫົວໜ້າພະແນກແຮງງານ ແລະ ສະວັດດີການສັງຄົມ ແຂວງ, ມີພະແນກການກ່ຽວຂ້ອງອ້ອມຂ້າງແຂວງ, ຮອງເຈົ້າເມືອງ ແລະ ຫ້ອງການແຮງງານ ແລະ ສະວັດດີການສັງຄົມ ທັງ 5 ເມືອງ ພ້ອມດ້ວຍພະ ນັກງານພາຍໃນພະແນກ ເຂົ້າຮ່ວມ.

ໂອກາດນີ້ ທ່ານ ວັນຄຳເກັ່ງ ຢ່າຊົງກົວ ໄດ້ລາຍງານການຈັດຕັ້ງປະຕິບັດແຜນພັດທະນາແຮງງານ ແລະ ສະວັດດີການສັງຄົມ 5 ປີ ຄັ້ງທີ I ( 2016-2020 ) ແລະ ແຜນພັດທະນາແຮງງານ ແລະ ສະຫວັດດີການສັງຄົມ 5 ປີ ຄັ້ງທີ II (2021-2025 ) ຊຶ່ງຕະຫລອດໄລຍະຜ່ານມາ ພະແນກແຮງງານ ແລະ ສະຫວັດດີການສັງຄົມແຂວງ ສາມາດຍາດໄດ້ວຽກງານທີ່ພົນເດັ່ນຫລາດ້ານ ເປັນຕົ້ນ ໄດ້ເອົາໃຈໃສ່ສົ່ງເສີມຈັດຕັ້ງຝຶກອົບຮົມພັດທະ ນາສີມືແຮງງານໄລຍະສັ້ນ ແລະ ໄລຍະຍາວ ໃຫ້ແກ່ກຳລັງແຮງງານ ໄດ້ທັງໝົດ 7.663 ຄົນ, ຍິງ 2.037 ຄົນ ເທົ່າກັບ 102% ຂອງແຜນການ 5 ປີ, ສົ່ງເສີມຈັດຫາວຽກເຮັດງານທຳ ໄດ້ 10.348 ຄົນ, ເທົ່າກັບ122% ພ້ອມນີ້ ຍັງໄດ້ລົງເຜີຍແຜ່ລະບຽບກົດໝາຍວ່າດ້ວຍແຮງງານ ແລະ ນິຕິກຳຕ່າງໆ ຢູ່ບັນດຫົວໜ່ວຍແຮງງານຕ່າງໆ ໄດ້ 88 ເທື່ອຫົວໜ່ວຍ, ໄດ້ແກ້ໄຂຂໍ້ຂັດແຍ່ງດ້ານແຮງງານໄດ້ 10 ກໍລະນີ, ສາມາດອອກໃບອະນຸຍາດເຄື່ອນໄຫວຊົ່ວຄາວໄດ້ 1.426 ຄົນ, ຍິງ 223 ຄົນ, ການຂະຫຍາຍອັດຕາປົກຄົມປະກັນສັງຄົມ ທົ່ວແຂວງ ( 2016-2020 ) ໄດ້ 9.543 ຄົນ ເທົ່າກັບ 10,30% ຂອງພົນລະເມືອງ, ພາກວິສະຫະກິດ ຈຳນວນ 11 ຫົວໜ່ວຍ, ມີຜູ້ຈ່າຍເງິນສົມທົບ 271 ຄົນ ແລະ ພາກສະໝັກໃຈ 139 ຄົນ ວຽກງານນະໂຍບາຍ ໄດ້ປະຕິບັດນະໂຍບາຍໃຫ້ແກ່ບູລິມະສິດ ຈຳນວນ 509 ທ່ານ ເທົ່າກັບ 84,8% ຂອງແຜນການ 5 ປີ ລວມເປັນເງິນ 10.357.260.456 ກີບ ( ສິບຕື້ສາມຮ້ອຍລ້ານກວ່າກິບ) ນອກນີ້ ຍັງໄດ້ຊ່ວຍເຫລືອປະຊາຊົນຜູ້ປະສົບເຄາະຮ້າຍຈາກໄພພິບັດທຳມະຊາດ, ຜູ້ທຸກຍາກ, ຜູ້ດ້ອຍໂອກາດ ແລະ ປ່ຽວພອຍ 1.019 ຄອບຄົວ, 5.089 ຄົນ ລວມມູນຄ່າທັງໝົດ 1.271.719.000 (1ຕື້ສອງຮ້ອຍ70ລ້ານກວ່າກີບ) ແລະ ຍັງໄດ້ຈັດຕັ້ງປະຕິບັດໂຄງການກວດກູ້ລະເບີດບໍ່ທັນແຕກ ຈຳນວນ 96 ເຮັກຕາ ພົບເຫັນ ແລະ ທຳລາຍລະເບີດ ໄດ້ 1,681 ລູກ ສຳລັບວຽກງານກາແດງ ແມ່ນໄດ້ປຸກລະດົມພາກສ່ວນຕ່າງໆ ເຂົ້າຮ່ວມບໍລິຈາກເລືອດແບບສະໝັກໃຈ ໄດ້ຈຳນວນ 958 ຖັງ ເທົ່າກັບ 77% ສ່ວນວຽກງານດ້ານອື່ນໆກໍ່ໄດ້ມີການຈັດຕັ້ງປະຕິບັດ ແລະ ມີຜົນສຳເລັດ. ຈາກນັ້ນຜູ້ເຂົ້າຮ່ວມກໍໄດ້ຜັດປ່ຽນກັນປະກອບຄຳຄິດຄຳເຫັນດ້ວຍຄວາມຮັບຜິດຊອບສູງ. ໃນກອງປະຊຸມຍັງໄດ້ມີພິທີມອບໃບຍ້ອງຍໍໃຫ້ແກ່ພະນັກງານຜູ້ທີ່ມີຜົນງານດີເດັ່ນ ໃນການຈັດຕັ້ງປະຕິບັດວຽກງານໃນໄລຍະຜ່ານມາ.

ໃນຕອນທ້າຍ ຍັງໄດ້ຮັບຟັງການໂອ້ລົມຂອງ ທ່ານ ຕົ່ງມົວ ຊົວໂກ້ ຊຶ່ງທ່ານໄດ້ຮຽກຮ້ອງໃຫ້ ຄະນະພະແນກຕະຫລອດຮອດ ຈົ່ງເອົາໃຈໃສ່ສືບຕໍ່ສຶກສາອົບຮົມການເມືອງແນວຄິດ ພະນັກງານ-ລັດຖະກອນ ເປັນປົກກະຕິ ປັບປຸງໃນການຈັດຕັ້ງປະຕິບັດວຽກງານໃຫ້ດີກວ່າເກົ່າ ເອົາໃຈໃສ່ຄຸ້ມຄອງແຮງງານລາວ ແລະ ຕ່າງປະເທດ ໃຫ້ຖືກຕ້ອງຕາມລະບຽບກົດໝາຍ, ຄົ້ນຄວ້າເປົ້າໝາຍທີ່ມີເງື່ອນໄຂຮັບນະໂຍບາຍຕໍ່ຜູ້ທີ່ມີຜົນງານໃຫ້ຊັດເຈນຖືກຕ້ອງ ພ້ອມນີ້ ກໍໃຫ້ກະກຽມຄວາມພ້ອມໃນການຕອບໂຕ້ ແລະ ປ້ອງກັນໄພພິບັດ ທີ່ອາດຈະເກີດຂຶ້ນ ເພື່ອຮັບມືໃຫ້ທັນການ ພ້ອມກັນຈັດຕັ້ງປະຕິບັດແຜນພັດທະນາວຽກງານໃນຕໍ່ໜ້າ ໃຫ້ສຳເລັດຕາມແຜນການທີກຳນົດໄວ້.
ຂ່າວ: ພຸດທະສອນ ເວດສະວົງ