ມີເດຍລາວແຂວງບໍ່ແກ້ວ ໂດຍ: ຄຳພອນ ຈະເລີນຜົນ ພະແນກການເງິນແຂວງ
ໃນວັນທີ 21 ມິຖຸນານີ້ ພະແນກການເງິນແຂວງບໍ່ແກ້ວ ນໍາໂດຍ ທ່ານ ຄໍາພອນ ຈະເລີນຜົນ ຫົວໜ້າຂະແໜງຈັດຕັ້ງບໍລິຫານ ພະແນກການເງິນແຂວງ ພ້ອມຄະນະໄດ້ນໍາເອົາເຄື່ອງບໍລິໂພກ, ອຸປະໂພກ ປະເພດສະບູ, ຢາຖູແຂ້ວ, ແຟບ, ແປງນົວ, ໝີ່ໄວໆ, ປ໋ອງປາ ແລະ ອື່ນອີກຈໍານວນໜຶ່ງ ມູນຄ່າ 3 ລ້ານກວ່າກີບ ມອບໃຫ້ພະແນກແຮງງານ ແລະ ສະຫວັດດີການສັງຄົມແຂວງ ເພື່ອສືບຕໍ່ມອບໃຫ້ບັນດາຄອບຄົວທີ່ຖືກຜົນກະທົບຈາກໄພທໍາມະຊາດນໍ້າຖ້ວມ ໃນລະຫວ່າງວັນທີ 13-14 ມິຖຸນາຜ່ານມານີ້ ເປັນການບັນເທົາທຸກ ແລະ ມີເຄື່ອງໃຊ້ຈໍາເປັນ.

ກ່າວຮັບໂດຍທ່ານ ຄໍາຕຸ້ມ ແກ້ວມະນີກອນ ຫົວໜ້າພະແນກແຮງງານ ແລະ ສະຫວັດດີການສັງຄົມ ພ້ອມທັງສະແດງຄວາມຮູ້ບຸນຄຸນ ທີ່ພະແນການເງິນແຂວງ ກໍ່ຄືນໍາໃຈຂອງພະນັກງານທຸກຄົນທີ່ເຫັນໄດ້ຄວາມຫຍຸ້ງຍາກຂອງຜູ້ປະສົບໄພພິບັດໃນຄັ້ງນີ້ ສໍາລັບເຄື່ອງທີ່ນໍາມາມອບຈະນໍາໄປແຈກຢາຍໃຫ້ຜູ້ທີ່ໄດ້ຮັບຜົນກະທົບຢ່າງທົ່ວເຖິງ.