ມີເດຍລາວແຂວງໄຊຍະບູລີ
ກອງປະຊຸມທາບທາມຮ່າງກົດໝາຍ ວ່າດ້ວຍມໍລະດົກແຫ່ງຊາດສະບັບປັບປຸງ ໄດ້ຈັດຂຶ້ນໃນວັນທີ 11 ຕຸລາ 2021 ນີ້ຢູ່ທີ່ຫ້ອງປະຊຸມພະແນກ ຖວທ ແຂວງ ໂດຍໃຫ້ກຽດເຂົ້າຮ່ວມເປັນປະທານຂອງ ທ່ານ ນາງ ບົວຈັນ ພັນທະວົງ ກໍາມະການພັກແຂວງ ຫົວໜ້າພະແນກ ຖວທ ແຂວງ, ມີຕາງໜ້າຄະນະບໍລິຫານງານຊາວໜຸ່ມແຂວງ, ສະຫະພັນກໍາມະບານແຂວງ, ສະຫະພັນແມ່ຍິງແຂວງ, ແນວລາວສ້າງຊາດແຂວງ ພ້ອມດ້ວຍຫົວໜ້າຂະແໜງ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມ.

ອີງຕາມກົດໝາຍວ່າດ້ວຍມໍລະດົກແຫ່ງຊາດ ສະບັບເລກທີ 022/ສພຊ, ລົງວັນທີ 24 ທັນວາ 2013 ປະກອບມີ 12 ພາກ, 11 ໝວດ ແລະ 92 ມາດຕາ; ສ່ວນສະບັບປັບປຸງປະກອບມີ 13 ພາກ, 8 ໝວດ ແລະ 96 ມາດຕາ ໃນນີ້ປັບປຸງໃໝ່ມີ 17 ມາດຕາຄື: ມາດຕາ 3, 5, 21, 26, 28, 29, 34, 36, 38, 39, 40, 41, 42, 62, 75, 77, 78 ແລະ ໃໝ່ມີ 18 ມາດຕາຄື: ມາດຕາ 9, 13, 17, 49, 58, 66, 67, 68, 69, 70, 71, 85, 86, 89, 90, 91, 92, 93. ພ້ອມນີ້ບັນດາຜູ້ເຂົ້າຮ່ວມ ໄດ້ປະກອບຄໍາຄິດຄໍາເຫັນໃສ່ຮ່າງເນື້ອໃນກົດໝາຍດັ່ງກ່າວ ເພື່ອເຮັດໃຫ້ເນື້ອໃນຂອງຮ່າງບັນດາກົດໝາຍມີຄວາມຮັດກຸມ, ຄົບຖ້ວນ, ຊັດເຈນ, ຖືກຕ້ອງຄວາມເປັນຈິງແຕ່ລະໄລຍະ ແລະ ຈະນໍາເຂົ້າພິຈາລະນາຮັບຮອງເອົາໃນກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດຊຸດທີ IX ຈະໄດ້ເປີດຂຶ້ນໃນເວລາອັນໃກ້ນີ້.

ຈຸດປະສົງ ກໍ່ເພື່ອກໍານົດຫຼັກການ, ລະບຽບການ ແລະ ມາດຕະການ ກ່ຽວກັບການຄຸ້ມຄອງ, ນໍາໃຊ້, ປົກປັກຮັກສາ, ອະນຸລັກ, ບູລະນະ, ປະຕິສັງຂອນມໍລະດົກແຫ່ງຊາດ ເພື່ອຮັກສາໄວ້ ຊຶ່ງຄຸນຄ່າ ຂອງມໍລະດົກແຫ່ງຊາດ ທາງດ້ານວັດທະນະທໍາ, ປະຫວັດສາດ ແລະ ທໍາມະຊາດ, ແນໃສ່ສຶກສາອົບຮົມພົນລະເມືອງໃຫ້ມີນໍ້າໃຈຮັກຊາດ, ຮັກມູນເຊື້ອອັນດີງາມຂອງຊາດ, ເປັນປັດໄຈຄໍ້າປະກັນການຍືນຍົງຄົງຕົວ ຂອງຊາດລາວຕະຫຼອດໄປ ເຊື່ອມໂຍງເຂົ້າກັບພາກພື້ນ ແລະ ສາກົນ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມແຫ່ງຊາດ.
………..
ພາບ+ຂ່າວ: ບຸນທີ