ມີເດຍລາວແຂວງຄຳມ່ວນ ກອງປະຊຸມ ສະຫຼຸບວຽກງານ ຖວທ ແຂວງຄຳມ່ວນ ປະຈໍາປີ 2020 ໄດ້ຈັດຂຶ້ນໃນວັນທີ 18 ມີນາ 2021 ໂດຍການເປັນກຽດເຂົ້າຮ່ວມຂອງ ທ່ານ ສົມໃຈ ພານີຈັນ ຄະນະປະຈຳພັກແຂວງ, ຫົວໜ້າຄະນະຈັດຕັ້ງແຂວງຄໍາມ່ວນ, ທ່ານ ໄຊສົມບູນ ສຸວັນດາລາ ຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ, ມີບັນດາທ່ານຕາງໜ້າພະແນກການອ້ອມຂ້າງ, ການນໍາຂັ້ນເມືອງ ແລະ ຫົວໜ້າຫ້ອງການຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ 10 ຕົວເມືອງ ຕະຫຼອດເຖິງບັນດາຂະ ແໜງການ, ກອງວິຊາການ ອ້ອມຂ້າງພະແນກເຂົ້າຮ່ວມ.

ທ່ານ ແສງມະນີ ສີລາເພັດ ຮອງຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ ໄດ້ຂຶ້ນຮ່າງບົດສະຫຼຸບສະຫຼຸບການຈັດຕັ້ງປະຕິບັດວຽກງານ ຖວທ ປະຈຳປີ 2020 ຄື: ດ້ານວຽກງານຖະແຫຼງຂ່າວ ແມ່ນໄດ້ຄຸ້ມຄອງຕິດຕາມ ສະຖານີວິທະຍຸ, ໂທລະພາບ ແລະ ບໍລິສັດໂທລະພາບໃຊ້ສາຍ, ໂທລະພາບດີຈິຕ໋ອນ ພາຍໃນແຂວງໃນການກະຈາຍພາບ ແລະ ສຽງອອກອາກາດເປັນປົກກະຕິ, ສໍາເລັດການຍົກລະດັບເຄື່ອງສົ່ງວິທະຍຸເມືອງນາກາຍຈາກ 120 W ມາເປັນ 1.000 W ແລະ ກໍາລັງດໍາເນີນການສ້າງຕັ້ງ ສະຖານີວິທະຍຸຂອງເມືອງມະຫາໄຊ, ວຽກງານສະຖານີວິທະຍຸກະຈາຍສຽງແຂວງຄຳມ່ວນ ໄດ້ຖ່າຍທອດຂ່າວຈາກວິທະຍຸແຫ່ງຊາດເປັນປົກກະຕິ ແລະ ໄດ້ດຳເນີນຈັດລາຍການຂອງສະຖານີວິທະຍຸ ມີຫຼາຍກວ່າ 30 ລາຍການ, ພ້ອມທັງໄດ້ຖ່າຍທອດສົດ ບັນດາກອງປະຊຸມ ທີ່ສໍາຄັນຂອງແຂວງ ແລະ ໄດ້ເຄື່ອນໄຫວເກັບກຳຂ່າວ, ຮັບຂ່າວຈາກບັນດາພະແນກການ ແລະ ເມືອງ ເພື່ອເຜີຍແຜ່ອອກຂ່າວຜ່ານທາງສະຖານີວິທະຍຸຂອງແຂວງ, ວຽກງານໂທລະພາບ ໄດ້ກະຈາຍພາບອອກອາກາດໂດຍຜ່ານລະບົບດີຈີຕອນ ແລະ ລະບົບໃຊ້ສາຍ ຂອງບໍລິສັດເອກະຊົນ ສາມາດກວມເຖິງ 30% ໃນທົ່ວແຂວງ ເຊິ່ງໄດ້ອອກອາກາດ 15 ຊົ່ວໂມງຕໍ່ມື້ ພ້ອມທັງໄດ້ເຄື່ອນໄຫວເກັບກຳຂ່າວ, ຮັບຂ່າວຈາກພະແນກການ ແລະ ເມືອງ ອອກຂ່າວຜ່ານໂທລະພາບຂອງແຂວງຢ່າງເປັນປົກກະຕິ, ດ້ານວຽກງານໜັງສືພິມ ໄດ້ເຄື່ອນໄຫວເກັບກໍາຂ່າວ, ຮັບຂ່າວຈາກຂະແໜງການຕ່າງໆຂອງແຂວງ, ຂອງເມືອງ ສົ່ງໃຫ້ສູນກາງ ແລະ ອັບເດດຂ່າວ-ບົດ ລົງເວັບໄຊ ໜັງສືພິມຄຳມ່ວນ ແລະ Facebook, ວຽກງານວັດທະນະທໍາ ໄດ້ຄຸ້ມຄອງ ແລະ ອອກໃບອະນຸຍາດນຳໃຊ້ບັນດາປ້າຍໂຄສະນາ, ຮ້ານບໍລິການປ້າຍ, ວົງດົນຕີປະຈໍາປີ, ລົງກວດກາການຕິດຕັ້ງປ້າຍໂຄສະນາ ແລະ ປ້າຍປະເພດຕ່າງໆ ໃນເທສະບານເມືອງທ່າແຂກ ເພື່ອຄວາມເປັນລະບຽບຮຽບຮ້ອຍ, ມອບໃບຢັ້ງຢືນຄອບຄົວວັດທະນະທໍາໄດ້ 492 ຄອບຄົວ, ປະກາດຮັບຮອງເປັນບ້ານວັດທະນະທໍາໄດ້ 09 ບ້ານ.

ມາເຖິງປະຈຸບັນ ມີຄອບຄົວວັດທະນະທຳ 74.050 ຄອບຄົວ ກວມເອົາ 91,49% ຂອງຄອບຄົວໃນທົ່ວແຂວງ, ດ້ານວຽກງານທ່ອງທ່ຽວ ປະຈຸບັນມີແຫຼ່ງທ່ອງທ່ຽວທີ່ໄດ້ສໍາຫຼວດ ແລະ ຂຶ້ນບັນຊີແລ້ວ 207 ແຫ່ງ ໃນນັ້ນມີແຫຼ່ງທ່ອງທ່ຽວທາງທຳມະຊາດ 143 ແຫ່ງ, ວັດທະນະທໍາ 33 ແຫ່ງ ແລະ ປະຫວັດສາດ 31 ແຫ່ງ. ໃນ 01 ປີຜ່ານມາມີນັກທ່ອງທ່ຽວເຂົ້າມາທ່ຽວຊົມແຂວງຄໍາມ່ວນ 313.405 ຄົນ. ໃນນັ້ນນັກທ່ອງທ່ຽວພາຍໃນ 274.122 ຄົນ ແລະ ນັກທ່ອງທ່ຽວສາກົນ 39.283 ຄົນ ສາມາດສ້າງລາຍຮັບສຳພັດໂດຍສະເລ່ຍ 236 ຕື້ກວ່າກີບ. ພ້ອມນັ້ນກໍ່ຍັງໄດ້ວາງທິດທາງແຜນການປະຈຳປີ 2021ເຊິ່ງໂດຍສ່ວນໃຫຍ່ ບັນດາວຽກງານໃນແຕ່ລະຂະແໜງການ ແມ່ນໄດ້ວາງຄາດໝາຍສູ້ຊົນ ເພື່ອຈັດຕັ້ງປະຕິບັດໃຫ້ໄດ້ລື່ນຄາດໝາຍເມື່ອທຽບກັບປີທີ່ຜ່ານມາ. ພ້ອມທັງໄດ້ຮັບຟັງການລາຍງານ ກ່ຽວກັບການອະນຸລັກສົ່ງເສີມສີລະປະມວນຊົນ, ການສ້າງໝໍລໍາມະຫາໄຊ ແລະ ໝໍແຄນຮຸ່ນສືບທອດ, ການຄຸ້ມຄອງສື່ເອເລັກໂຕຼນິກ, ການແກ້ໄຂປະກົດການຫຍໍ້ທໍ້ໃນການຄຸ້ມຄອງຮ້ານບັນເທີງ, ຮ້ານອາຫານ, ຮ້ານປີ້ງແກ້ມ ຢູ່ໃນໄລຍະການສະກັດກັ້ນ, ປ້ອງກັນການແຜ່ລະບາດຂອງພະຍາດໂຄວິດ-19, ການຈັດຕັ້ງປະຕິບັດ ທຸລະກິດການທ່ອງທ່ຽວ ຕິດພັນກັບກິດຈະກຳ ລາວທ່ຽວລາວ. ກອງປະຊຸມດັ່ງກ່າວຍັງໄດ້ມອບໃບຍ້ອງຍໍຂອງທ່ານເຈົ້າແຂວງຄຳມ່ວນ ໃຫ້ແກ່ກົມກອງ, ບຸກຄົນ ແລະ ໃບຍ້ອງຍໍຂັ້ນພະແນກ ຖວທ ແຂວງ ໃຫ້ແກ່ຜູ້ທີ່ມີຜົນງານດີເດັ່ນ ປະກອບສ່ວນເຂົ້າໃນຂະບວນການ ແຂ່ງຂັນ ແລະ ຍ້ອງຍໍ “ຮັກຊາດ ແລະ ພັດທະນາ” ປະຈຳປີ 2019.


ໃນໂອກາດທີ່ເຂົ້າຮ່ວມກອງປະຊຸມດັ່ງກ່າວ ທ່ານ ສົມໃຈ ພານີຈັນ ຄະນະປະຈຳພັກແຂວງ, ຫົວໜ້າຄະນະຈັດຕັ້ງແຂວງ ຍັງໄດ້ມີຄຳເຫັນໂອ້ລົມ ເຊິ່ງທ່ານໄດ້ຮຽກຮ້ອງມາຍັງຄະນະພັກ, ຄະນະນໍາໃນຂົງເຂດ ຖວທ ໄດ້ສືບຕໍ່ປັບປຸງກົງຈັກການຈັດຕັ້ງໃຫ້ມີຄວາມໜັກແໜ້ນ ແລະ ເຂັ້ມແຂງຂຶ້ນກວ່າເກົ່າ, ມີການແບ່ງວຽກງານ, ມີແບບແຜນວິທີເຮັດວຽກ ບົນຫຼັກການລວມສູນປະຊາທິປະໄຕ ພ້ອມທັງມີການຕິດຕາມ, ກວດກາ ແລະ ສະຫຼຸບລາຍງານຢ່າງເປັນປົກກະຕິ, ສືບຕໍ່ເອົາໃຈໃສ່ດ້ານວຽກງານວິຊາສະເພາະເປັນຕົ້ນ: ທາງດ້ານວຽກງານຂ່າວ ປັບປຸງແກ້ໄຂທາງດ້ານເນື້ອໃນຂ່າວ ເພື່ອຮັບປະກັນທາງດ້ານເນື້ອໃນທີ່ຖືກຕ້ອງ, ຄົບຖ້ວນ ແລະ ຊັດເຈນ, ຊຸກຍູ້ປຸກລະດົມໃຫ້ບັນດາບ້ານໄດ້ນໍາໃຊ້ລະບົບໂທລະໂຄ່ງ ເຂົ້າໃນການເຜີຍແຜ່ຂໍ້ມູນຂ່າວສານ, ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ຢ່າງເປັນປົກກະຕິ, ເອົາໃຈໃສ່ຕິດຕາມ, ກວດກາບັນດາຄອບຄົວ ແລະ ບ້ານວັດທະນະທໍາທີ່ໄດ້ປະກາດໄປແລ້ວນັ້ນ ວ່າຍັງຮັກສາໄດ້ຕາມມາດຖານ, ເງື່ອນໄຂທີ່ໄດ້ກໍານົດໄວ້ ຫຼືບໍ່ ພ້ອມທັງຊອກຫາວິທີແກ້ໄຂ, ສືບຕໍ່ຊຸກຍູ້, ສົ່ງເສີມດ້ານວັດທະນະທໍາ, ຮີດຄອງປະເພນີ ຕິດພັນກັບການສ້າງກິດຈະກຳ ເພື່ອສືບທອດໃຫ້ແກ່ຄົນຮຸ່ນໜຸ່ມ ໄດ້ສືບຕໍ່ຈັດຕັ້ງປະຕິບັດ ໂດຍສະເພາະຮີດຄອງປະເພນີທີ່ເປັນເອກະລັກຂອງແຂວງ, ຊຸກຍູ້ສົ່ງເສີມ ແລະ ພັດທະນາແຫຼ່ງທ່ອງທ່ຽວ ຕິດພັນກັບການປັບປຸງຂອດການບໍລິການໃຫ້ດີຂຶ້ນ ເພື່ອດຶງດູດເອົານັກທ່ອງທ່ຽວ ໄດ້ເຂົ້າມາທ່ຽວພາຍໃນແຂວງຫຼາຍຂຶ້ນ ພ້ອມທັງສືບຕໍ່ເອົາໃຈໃສ່ໃນການແກ້ໄຂບັນດາປະກົດການຫຍໍ້ທໍ້ ໃນຂົງເຂດ ຖວທ ໃຫ້ໝົດໄປເທື່ອລະກ້າວ.