ມີເດຍລາວແຂວງໄຊຍະບູລີ ຂ່າວ: ບຸນທີ
ໃນວັນທີ 18 ມິຖຸນາ 2021 ນີ້ ພະແນກ ຖວທ ແຂວງຫຼວງພະບາງ ໄດ້ນໍາເອົາເຄື່ອງອຸປະໂພກ, ບໍລິໂພກ ມາມອບໃຫ້ພະແນກ ຖວທ ແຂວງໄຊຍະບູລີ ພິທີດັ່ງກ່າວໄດ້ຈັດຂຶ້ນທີ່ພະແນກ ຖວທ ແຂວງ. ທ່ານ ປອ ນາງ ປອ ສຸດາພອນ ຄົມທະວົງ ກໍາມະການພັກແຂວງ ຫົວໜ້າພະແນກ ຖວທ ແຂວງຫຼວງພະບາງ ພ້ອມຄະນະ ແລະ ນັກທຸລະກິດຜູ້ປະກອບການຂອງແຂວງ ໄດ້ສະແດງຄວາມເສຍໃຈ ທີ່ແຂວງໄຊຍະບູລີໄດ້ຮັບຜົນກະທົບຈາກໄພທໍາມະຊາດ ຄືເກີດນໍ້າຖ້ວມອັນໄດ້ເຮັດໃຫ້ຫຼາຍເມືອງ, ຫຼາຍບ້ານ, ຫຼາຍຄອບຄົວ ນັບທັງຖະໜົນຫົນທາງສິ່ງສາທາລະນະໄດ້ຮັບຄວາມເສຍຫາຍຈໍານວນຫຼາຍ.

ດັ່ງນັ້ນທາງຄະນະນໍາພະແນກ ຖວທ ແຂວງຫຼວງພະບາງ ໄດ້ປຸກລະດົມຄວາມຕື່ນຕົວສະໝັກໃຈ ຈາກສະມາຊິກພັກພະນັກງານ ພາຍໃນພະແນກ ແລະ ນັກທຸລະກິດຜູ້ປະກອບການໃນນະຄອນຫຼວງພະບາງ ມາຊ່ວຍເຫຼືອເບື້ອງຕົ້ນໃຫ້ພະແນກ ຖວທ ແຂວງໄຊຍະບູລີ ມີເຄື່ອງອຸປະໂພກ, ບໍລິໂພກ ເຊັ່ນ: ໝີ່, ເຂົ້າສານໜຽວ 500 kg, ສະບູ່, ຄີມອາບນໍ້າ, ນໍ້າດື່ມບໍລິສຸດ ແລະ ເຄື່ອງຮັບໃຊ້ຄົວເຮືອນຈໍານວນໜຶ່ງ ລວມມູນຄ່າເກືອບ 20 ລ້ານກີບ.

ຈາກນັ້ນ ທ່ານ ນາງ ບົວຈັນ ພັນທະວົງ ກໍາມະການພັກແຂວງ ຫົວໜ້າພະແນກ ຖວທ ແຂວງໄຊຍະບູລີ ພ້ອມຄະນະ ແລະ ພະນັກງານຫຼັກແຫຼ່ງ ຜູ້ທີ່ໄດ້ຮັບຜົນກະທົບຈາກອຸທົກກະໄພຄັ້ງນີ້ ໄດ້ສະແດງຄວາມຂອບໃຈ ນໍາບັນດາຄະນະພະແນກ ຖວທ ແຂວງຫຼວງພະບາງ ພ້ອມນັກທຸກິດຜູ້ປະກອບການ ທີ່ໄດ້ບິແບ່ງນໍ້າໃຈ, ຊັບສິນ, ເຄື່ອງຂອງຈໍານວນໜຶ່ງ ເພື່ອມາຊ່ວຍພະແນກ ຖວທ ແຂວງ ໃນຍາມສຸກເສີນ ເໜືອນກັບວ່າສອງແຂວງ, ສອງພະແນກ ຖວທຂອງພວກເຮົາຄືຄອບຄົວດຽວກັນ ແລະ ຮ່ວມອຸດົມການດຽວກັນ, ບໍ່ຖິ້ມກັນ ແລະ ຊ່ວຍເຫຼືອກັນຕະຫຼອດໄປ.

ທ່ານ ນາງ ບົວຈັນ ພັນທະວົງ ຍັງໃຫ້ຮູ້ວ່າ: ການເກີດອຸທົກກະໄພນໍ້າຖ້ວມຄັ້ງນີ້ ແມ່ນມີຄວາມຄວາມຮຸນແຮງ ແລະ ໄດ້ຮັບຜົນເສຍຫາຍຫຼາຍເກືອບ 100 ຕື້ກີບ ຖືວ່າຄັ້ງນີ້ແມ່ນມີຄວາມຮຸນແຮງເທົ່າກັບປີ 1973 ຜ່ານມາ; ພະນັກງານໃນພະແນກ ຖວທ ແຂວງພວກເຮົາແມ່ນໄດ້ຮັບຜົນກະທົບຈາກນໍ້າຖ້ວມຄັ້ງນີ້ມີ 24 ຄອບຄົວ ນັບທັງຄອບຄົວຂອງຫົວໜ້າພະແນກ ຖວທ ແຂວງ. ດັ່ງນັ້ນອີກເທື່ອໜຶ່ງ ຂໍສະແດງຄວາມຂອບໃຈມາຍັງທຸກພາກສ່ວນໃນນະຄອນຫຼວງພະບາງ ເວົ້າລວມ, ເວົ້າສະເພາະກໍ່ຄືພະແນກ ຖວທ ແຂວງຫຼວງພະບາງ ແລະ ນັກທຸລະກິດຈໍານວນໜຶ່ງ ທີ່ໄດ້ສະຫຼະເວລາມາມອບເຄື່ອງ ແລະ ເບິ່ງສະພາບຕົວຈິງເຫດການໃນຄັ້ງນີ້ ແລະ ພ້ອມແລ້ວຈະນໍາເອົາເຄື່ອງຂອງຈໍານວນດັ່ງກ່າວ ແບ່ງປັນມອບໃຫ້ຄອບຄົວສະມາຊິກພັກພະນັກງານທີ່ໄດ້ຮັບຜົນກະທົບໃນຄັ້ງນີ້ໃຫ້ທົ່ວເຖິງ ແລະ ຖືກຕ້ອງຕາມຄວາມເປັນຈິງ. ຈາກນັ້ນ ທ່ານ ປອ ນາງ ສຸດາພອນ ຄົມທະວົງ ຫົວໜ້າພະແນກ ຖວທ ແຂວງຫຼວງພະບາງ ພ້ອມດ້ວຍນັກທຸລະກິດ ໄດ້ມອບເຄື່ອງຂອງດັ່ງກ່າວ ໃຫ້ກຽດຮັບເຄື່ອງຂອງຄັ້ງນີ້ໂດຍ ທ່ານ ນາງ ບົວຈັນ ພັນທະວົງ ຫົວໜ້າພະແນກ ຖວທ ແຂວງໄຊຍະບູລີ ເຂົ້າຮ່ວມມີຄະນະພະແນກ, ຫົວໜ້າ, ຮອງຫົວໜ້າຂະແໜງ ແລະ ຄອບຄົວທີ່ໄດ້ຮັບຜົນກະທົບ.